ମସ୍କୋ, ୨୪ା୩: ୟୁକ୍ରେନ୍-ରୁଷିଆ ଯୁଦ୍ଧ ବୁଧବାର ୪ ସପ୍ତାହ ପୂରିଥିବାବେଳେ ରୁଷୀୟ ସୈନ୍ୟ ଘାତକ ଆକ୍ରମଣ ଜାରି ରଖିଛନ୍ତି। ଦୁଇ ପକ୍ଷ ମଧ୍ୟରେ ଆଲୋଚନା ଏଯାଏ ସଫଳ ହୋଇପାରି ନ ଥିବାରୁ କେବେ ଯୁଦ୍ଧବିରତି ହେବ ତାହା ସନ୍ଦେହରେ। ସେପଟେ ୟୁକ୍ରେନ୍ ଉପରେ ଆକ୍ରମଣ ପାଇଁ ରୁଷିଆକୁ ଏକଘରକିଆ କରିବା ନିମନ୍ତେ ଆମେରିକା ସମେତ ୟୁରୋପୀୟ ଦେଶଗୁଡ଼ିତ ବିଭିନ୍ନ କଟକଣା ଲଗାଇଥିବାରୁ ଏହି ଶକ୍ତିଶାଳୀ ରାଷ୍ଟ୍ରର ଅର୍ଥନୀତି ବ୍ୟାପକ ପ୍ରଭାବିତ ହୋଇଛି। ଆକ୍ରମଣାତ୍ମକ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ କେତେବେଳେ ନ୍ୟୁକ୍ଲିୟର ଅସ୍ତ୍ର ବ୍ୟବହାର ନିମନ୍ତେ ନିର୍ଦ୍ଦେଶ ଦେବାର ଆଶଙ୍କା ମଧ୍ୟ ଉପୁଜିଛି। ଏପରିକି ୟୁକ୍ରେନ୍ରେ ନ୍ୟୁକ୍ଲିୟର ଅସ୍ତ୍ର ବ୍ୟବହାର ନିମନ୍ତେ ପୁଟିନ୍ ଆଣବିକ ଫୋର୍ସକୁ ଆଲର୍ଟରେ ରଖିଥିବା ରିପୋର୍ଟ ପ୍ରକାଶ ପାଉଛି। ତେବେ ମସ୍କୋ କେତେବେଳେ ନ୍ୟୁକ୍ଲିୟର ଅସ୍ତ୍ର ବ୍ୟବହାର କରିବ, ସେ ନେଇ ୟୁକ୍ରେନ୍ ଆକ୍ରମଣର ୪ ସପ୍ତାହ ପରେ କ୍ରେମଲିନ୍ ପ୍ରତିକ୍ରିୟା ରଖିଛି। ନିଜ ଅସ୍ତିତ୍ୱ ପ୍ରତି ବିପଦ ସୃଷ୍ଟି ହେଲେ ରୁଷିଆ ଆଣବିକ ଅସ୍ତ୍ର ପ୍ରୟୋଗ କରିବ ବୋଲି କ୍ରେମଲିନ୍ ମୁଖପାତ୍ର ଡିମିଟ୍ରି ପେସ୍କୋଭ୍ ଏକ ନ୍ୟୁଜ୍ ଚ୍ୟାନେଲ୍କୁ ସାକ୍ଷାତକାର ଦେଇ କହିଛନ୍ତି।
ଯୁଦ୍ଧରେ ନ୍ୟୁକ୍ଲିୟର ଅସ୍ତ୍ର ବ୍ୟବହାର କରିବା ସଂକ୍ରାନ୍ତୀୟ ପ୍ରଶ୍ନରେ ପେସ୍କୋଭ୍ କହିଥିଲେ, ଦେଶର ଆଭ୍ୟନ୍ତରୀଣ ସୁରକ୍ଷା ସମ୍ବନ୍ଧରେ ଆମର ଏକ ନୀତି ରହିଛି ଏବଂ ତାହା ସାର୍ବଜନୀନ। କେତେବେଳେ ନ୍ୟୁକ୍ଲିୟର ଅସ୍ତ୍ର ବ୍ୟବହାର କରାଯିବ ସେ ବାବଦରେ ଏଥିରୁ ସମସ୍ତେ ପଢ଼ିପାରିବେ। ଯଦି ଆମ ଦେଶର ଅସ୍ତିତ୍ୱ ବିପଦରେ ପଡ଼େ ତେବେ ନୀତି ଅନୁଯାୟୀ ଆଣବିକ ଅସ୍ତ୍ର ପ୍ରୟୋଗ କରାଯାଇପାରିବ। ସେହିପରି ପଡ଼ୋଶୀ ୟୁକ୍ରେନ୍କୁ ଅକ୍ତିଆର କରିବାକୁ କୌଣସି ଯୋଜନା ନ ଥିବା ଏବଂ କେବଳ ଏହି ଦେଶକୁ ନିରସ୍ତ୍ର କରିବା ରୁଷିଆର ଉଦ୍ଦେଶ୍ୟ ବୋଲି ପେସ୍କୋଭ୍ ଦୋହରାଇଛନ୍ତି। ପେସ୍କୋଭ୍ଙ୍କ ଏହି ବିବୃତି ଉପରେ ପେଣ୍ଟାଗନ୍ ମୁଖପାତ୍ର ଜନ୍ କିର୍ବି କହିଛନ୍ତି, ନ୍ୟୁକ୍ଲିୟର ଅସ୍ତ୍ର ସମ୍ଭାବ୍ୟ ବ୍ୟବହାର ଉପରେ କ୍ରେମ୍ଲିନ୍ର ଏଭଳି ମନ୍ତବ୍ୟ ବିପଜ୍ଜନକ। ଏକ ଦାୟିତ୍ୱପୂର୍ଣ୍ଣ ନ୍ୟୁକ୍ଲିୟର ଶକ୍ତିସମ୍ପନ୍ନ ରାଷ୍ଟ୍ର ଏପରି କାର୍ଯ୍ୟ କରିବା ଉଚିତ ନୁହେଁ। ୟୁକ୍ରେନ୍ ଆକ୍ରମଣରେ ହସ୍ତକ୍ଷେପ ନ କରିବା ପାଇଁ ପୁଟିନ୍ ବିଶ୍ୱ ସମୁଦାୟକୁ ନ୍ୟୁକ୍ଲିୟର ‘ବ୍ଲାକମେଲ୍’ କରୁଥିବା ନେଇ ଆଣବିକ ଅସ୍ତ୍ରଶସ୍ତ୍ର ଧ୍ୱଂସ କରିବା ପାଇଁ ଅନ୍ତର୍ଜାତୀୟ ଅଭିଯାନର ନେତୃତ୍ୱ ନେଉଥିବା ବିଟ୍ରିସ୍ ଫିହ୍ନ କହିଥିଲେ।
