ଇସଲାମାବାଦ,୧୬।୬: ପାକିସ୍ତାନର ଲୋକମାନେ ବିଶ୍ୱାସ କରନ୍ତି ଯେ ଦେଶର ଆର୍ଥିକ ସ୍ଥିରତା ପାଇଁ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କୁ ୨୦୨୯ ପର୍ଯ୍ୟନ୍ତ ପାଞ୍ଚ ବର୍ଷ ଜେଲରେ ରଖିବା ଆବଶ୍ୟକ। ପାକିସ୍ତାନର ଜଣେ ମନ୍ତ୍ରୀ ଏହି ଦାବି କରିଛନ୍ତି।
ସଂଘିୟ ଯୋଜନା ଏବଂ ବିକାଶ ମନ୍ତ୍ରୀ ଅହସାନ ଇକବାଲ ଉଦବେଗ ପ୍ରକାଶ କରିଛନ୍ତି ଯେ ୭୧ ବର୍ଷିୟ ପାକିସ୍ତାନ ତେହେରିକ-ଇ-ଇନସାଫ (ପିଟିଆଇ) ପ୍ରତିଷ୍ଠାତା ମୁକ୍ତ ହେବା ଦ୍ୱାରା ନୂତନ ବିରୋଧ ତଥା ଅଶାନ୍ତି ଦେଖାଦେଇପାରେ, ଯାହା ଦେଶ ସହ୍ୟ କରିପାରିବ ନାହିଁ।
ଶାସକ ପାକିସ୍ତାନ ମୁସଲିମ ଲିଗ (ଏନ) ର ସାଧାରଣ ସମ୍ପାଦକ ଇକବାଲ ଶନିବାର ଖବରଦାତାମାନଙ୍କ ସହ କଥାବାର୍ତ୍ତା କରି କହିଛନ୍ତି ଯେ ଲୋକମାନେ ଆମ ପାଖକୁ ଆସି କୁହନ୍ତି ଯେ ଯଦି ପାକିସ୍ତାନକୁ ଅଗ୍ରଗତି କରିବାକୁ ପଡିବ ତେବେ ଇମ୍ରାନ ଖାଁଙ୍କୁ ୫ବର୍ଷ ଜେଲରେ ରଖିବାକୁ ପଡ଼ିବ। ଖାଁ ଗତ ବର୍ଷ ଅଗଷ୍ଟରୁ ବିଭିନ୍ନ ମାମଲାରେ ଜେଲରେ ଥିଲେ। ଇକବାଲ କହିଛନ୍ତି ଯେ ଖାନ ଜଣେ ‘କ୍ରୋଧିତ ବ୍ୟକ୍ତି’।
ମନ୍ତ୍ରୀ କହିଛନ୍ତି ଯେ ଦେଶର ଆର୍ଥିକ ସ୍ଥିରତା ପାଇଁ ଇମ୍ରାନ ଖାନଙ୍କୁ ବାର୍ ପଛରେ ରଖିବା ଆବଶ୍ୟକ ବୋଲି ଲୋକମାନେ ଅନୁଭବ କରିଛନ୍ତି। ଇକବାଲ କହିଛନ୍ତି ଯେ ଉଭୟ ପାକିସ୍ତାନ ଏବଂ ପିଟିଆଇ ପାଇଁ ଏହା ଏକ ନିର୍ଣ୍ଣାୟକ ମୁହୂର୍ତ୍ତ। ସେ ଯୁକ୍ତି ବାଢିଛନ୍ତି ଯେପର୍ଯ୍ୟନ୍ତ ପାର୍ଟି ରାଜ୍ୟ ଅନୁଷ୍ଠାନ ବିରୋଧରେ ଏକ ଅଭିଯାନରେ ଜଡିତ ନହେବା ପର୍ଯ୍ୟନ୍ତ ପିଟିଆଇ ସହିତ ଅର୍ଥପୂର୍ଣ୍ଣ କଥାବାର୍ତ୍ତା ହୋଇପାରିବ ନାହିଁ। ସେ କହିଛନ୍ତି ଯେ ଯଦି ଇମ୍ରାନ ଖାଁ ସରକାରଙ୍କ ସହ କଥା ହେବାକୁ ଚାହାଁନ୍ତି ତେବେ ତାଙ୍କୁ ଗମ୍ଭୀରତା ଦେଖାଇବାକୁ ପଡ଼ିବ।
