ଗାଜା ସିଟି/ଜେରୁଜେଲମ୍,୧୬ା୧୧ : ଉତ୍ତର ଗାଜାକୁ ଇସ୍ରାଏଲ ନିଜ ସୈନ୍ୟ ଓ ଟ୍ୟାଙ୍କ୍ ପ୍ରେରଣର ଅଢ଼େଇ ସପ୍ତାହ ପରେ ବୁଧବାର ଇସ୍ରାଏଲୀ ବଳ ଅଲ୍ ଶିଫା ହସ୍ପିଟାଲରେ ପ୍ରବେଶ କରିଛି। ଇସ୍ରାଏଲ ସୈନ୍ୟମାନେ ସେଠାରେ ଆଶ୍ରୟ ନେଇଥିବା ବହୁ ଲୋକଙ୍କୁ ବାହାର କରିଛନ୍ତି। ହସ୍ପିଟାଲ ପରିସରରେ ହମାସ୍ ଗଚ୍ଛିତ ରଖିଥିବା ଅସ୍ତ୍ରଶସ୍ତ୍ର ଠାବ ହୋଇଥିବା ଇସ୍ରାଏଲ ସୈନ୍ୟ ସୂଚନା ଦେଇଛନ୍ତି।
ଗାଜା ଷ୍ଟ୍ରିପ୍ର ଏହି ସର୍ବବୃହତ୍ ହସ୍ପିଟାଲରେ ଇସ୍ରାଏଲର ଆକ୍ରମଣକୁ ଅନ୍ତର୍ଜାତୀୟ ସମୁଦାୟ ନିନ୍ଦା କରିବା ସହ ‘ଡାକ୍ତରଖାନା ଯୁଦ୍ଧଭୂଇଁ ନୁହେଁ’ ବୋଲି ଅସନ୍ତୋଷ ବ୍ୟକ୍ତ କରିଛି। ଅକ୍ଟୋବର ୭ରେ ସଂଘର୍ଷ ଆରମ୍ଭ ପରଠୁ ହମାସ୍ ଆତଙ୍କବାଦୀମାନେ ୧୨୦୦ ଇସ୍ରାଏଲୀଙ୍କୁ ହତ୍ୟା କରିଥିବାବେଳେ ୨୪୦ ଜଣଙ୍କୁ ପଣବନ୍ଦୀ ରଖିଥିଲେ। ହମାସ୍ର ମୂଳୋତ୍ପାଟନ ପାଇଁ ପଣ କରିଥିବା ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ନିର୍ଦ୍ଦେଶକ୍ରମେ ସାମରିକ ବଳ ଗାଜାକୁ ଏକପ୍ରକାର ଦଖଲ କରିସାରିଲେଣି। ଯୁଦ୍ଧର ଘନଘଟା ଭିତରେ ଗାଜା ସିଟିର ଅଲ୍ ଶିଫା ହସ୍ପିଟାଲ ପାଲେଷ୍ଟିନୀୟ ନାଗରିକଙ୍କ ଦୁର୍ଦ୍ଦଶାର କାହାଣୀ ବୟାନ କରୁଛି।
ଏହି ହସ୍ପିଟାଲ ତଳେ ଥିବା ଅଣ୍ଡରଗ୍ରାଉଣ୍ଡ୍କୁ ହମାସ୍ ନିଜ କମାଣ୍ଡ୍ ସେଣ୍ଟର ରୂପେ ବ୍ୟବହାର କରୁଥିବା ଦର୍ଶାଇ ଇସ୍ରାଏଲ ଏହାକୁ ଦଖଲ ଉଦ୍ୟମ ଚଳାଇଛି। ଅନ୍ୟପକ୍ଷେ ଉଭୟ ହମାସ୍ ଓ ହସ୍ପିଟାଲ କର୍ତ୍ତୃପକ୍ଷ ଏଭଳି ଅଭିଯୋଗକୁ ଖଣ୍ଡନ କରିଛନ୍ତି। ଗାଜାରେ ହସ୍ପିଟାଲ ନିର୍ଦ୍ଦେଶକ ମୋହମେଦ୍ ଜାକୋଉଟ୍ କହିଛନ୍ତି, ଇସ୍ରାଏଲୀ ଟ୍ୟାଙ୍କ୍ଗୁଡ଼ିକ ମେଡିକାଲ ପରିସରକୁ ପ୍ରବେଶ କରିଛି। ସୈନ୍ୟମାନେ ହସ୍ପିଟାଲର ଇନ୍ଟେନ୍ସିଭ୍ କେୟାର ୟୁନିଟ୍ (ଆଇସିୟୁ) ଥିବା ଜରୁରିକାଳୀନ ସେବା ଓ ଅସ୍ତ୍ରୋପଚାର ବିଭାଗ ବିଲ୍ଡିଂରେ ପଶିଛନ୍ତି। ହସ୍ପିଟାଲରୁ ଅନେକ ହଜାର ଲୋକ ପଳାୟନ କରିଥିବାବେଳେ ଶିଶୁଙ୍କ ସମେତ ଶତାଧିକ ଲୋକ ଏବେ ମଧ୍ୟ ଯୁଦ୍ଧ ଯୋଗୁ ଫସିରହିଛନ୍ତି।
ଜାତିସଂଘ ସୁରକ୍ଷା ପରିଷଦ (ୟୁଏନ୍ଏସ୍ସି) ଇସ୍ରାଏଲ-ହମାସ୍ ଯୁଦ୍ଧ ଉପରେ ପଞ୍ଚମ ସଂକଳ୍ପନାମା ଗୃହୀତ କରାଇବା ପାଇଁ ଉଦ୍ୟମ ଆରମ୍ଭ କରିଛି। ଦକ୍ଷିଣପୂର୍ବ ଏସୀୟ ରାଷ୍ଟ୍ରଗୁଡ଼ିକର ସଙ୍ଗଠନ (ଆସିଆନ୍) ପ୍ରତିରକ୍ଷା ମୁଖ୍ୟମାନେ ଗାଜାରେ ଯୁଦ୍ଧବିରତି ପାଇଁ ଆହ୍ବାନ ଦେଇଛନ୍ତି। ଓ୍ବାଶିଂଟନ୍ରେ ଇସ୍ରାଏଲ ସମର୍ଥକମାନେ ବିକ୍ଷୋଭ ପ୍ରଦର୍ଶନ କରିଛନ୍ତି।
ଗାଜାବାସୀ ଆସିସିଙ୍କ ଦ୍ୱାରସ୍ଥ
ଗାଜାର ଯୁଦ୍ଧ ପ୍ରଭାବିତଙ୍କ ଓକିଲମାନେ ନେଦରଲାଣ୍ଡ୍ସର ହେଗ୍ସ୍ଥିତ ଅନ୍ତର୍ଜାତୀୟ ଆପରାଧିକ ଅଦାଲତ (ଆଇସିସି)ରେ ପିଟିଶନ ଦାଖଲ କରିଛନ୍ତି। ପାଲେଷ୍ଟିନୀୟଙ୍କ ବିରୋଧରେ ଇସ୍ରାଏଲର କାର୍ଯ୍ୟାନୁଷ୍ଠାନକୁ ସେମାନେ ଗଣହତ୍ୟା ରୂପେ ଅଭିହିତ କରିଛନ୍ତି। ଆଇସିସି ଏହାର ଉପଯୁକ୍ତ ବିଚାର କଲେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ବିରୋଧରେ ଗିରଫ ପରଓ୍ବାନା ଜାରି ହୋଇପାରେ।
