ଭୁବନେଶ୍ୱର,୧।୧୦( ବ୍ୟୁରୋ): ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଓଡ଼ିଶା ଇଣ୍ଡଷ୍ଟ୍ରିଆଲ ଇନ୍ଫ୍ରାଷ୍ଟ୍ରକ୍ଚର୍ ଡେଭଲପ୍ମେଣ୍ଟ କର୍ପୋରେଶନ(ଇଡ୍କୋ)ର ଆସିଷ୍ଟାଣ୍ଟ ମ୍ୟାନେଜର (ସିଭିଲ୍) ମନୋଜ କୁମାର ଲେଙ୍କାଙ୍କୁ ଶୁକ୍ରବାର ଭିଜିଲାନ୍ସ ଗିରଫ କରିଛି। ଭିଜିଲାନ୍ସ ପକ୍ଷରୁ ଚଢ଼ାଉ ଓ ଯାଞ୍ଚ ପରେ ତାଙ୍କ ନିକଟରୁ ମୋଟ ୩ କୋଟି ୩୮ ଲକ୍ଷ ୬୫ ହଜାର ୮୭୯ ଟଙ୍କାର ଆୟ ବହିର୍ଭୂତ ସମ୍ପତ୍ତି ଠାବ କରାଯାଇଛି। ଏହି ବେଆଇନ ସମ୍ପତ୍ତି ତାଙ୍କ ପ୍ରକୃତ ଆୟଠାରୁ ୩୮୭ ପ୍ରତିଶତ ଅଧିକ। ଆୟ ବହିର୍ଭୂତ ସମ୍ପତ୍ତି ନେଇ ସନ୍ତୋଷଜନକ ଉତ୍ତର ଦେଇ ନ ପାରିବାରୁ ମନୋଜ ଓ ତାଙ୍କ ସ୍ତ୍ରୀଙ୍କ ନାମରେ ଭୁବନେଶ୍ୱର ଭିଜିଲାନ୍ସ ଥାନାରେ ଏକ ମାମଲା (ନଂ.୩୧/୨୦୨୨) ରୁଜୁ କରାଯାଇଛି। ଗିରଫ ପରେ ମନୋଜଙ୍କୁ ଭୁବନେଶ୍ୱର ସ୍ବତନ୍ତ୍ର ଭିଜିଲାନ୍ସ କୋର୍ଟକୁ ଚାଲାଣ କରାଯାଇଥିଲା। ସେଠାରେ ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ସୂଚନା ଅନୁଯାୟୀ, କିଛିଦିନ ହେଲା ମନୋଜଙ୍କ ନାମରେ ମାଳ ମାଳ ଦୁର୍ନୀତି ଅଭିଯୋଗ ଆସିଥିଲା। ଭୁବନେଶ୍ୱର ଭିଜିଲାନ୍ସ ସ୍ବତନ୍ତ୍ର ଜଜ୍ଙ୍କ ଦ୍ୱାରା ଜାରି ସର୍ଚ୍ଚ ୱାରେଣ୍ଟ ବଳରେ ଗୁରୁବାର ତାଙ୍କ କାର୍ଯ୍ୟାଳୟ ସମେତ ଭୁବନେଶ୍ୱର, ପୁରୀ ଓ କେନ୍ଦ୍ରାପଡ଼ାର ୯ଟି ସ୍ଥାନରେ ଏକକାଳୀନ ଚଢ଼ାଉ କରାଯାଇଥିଲା। ଚଢ଼ାଉରେ ଭିଜିଲାନ୍ସର ୨ଜଣ ଡିଏସ୍ପି, ୧୦ଜଣ ଇନ୍ସପେକ୍ଟର, ୨ଜଣ ସବ୍-ଇନ୍ସପେକ୍ଟର, ୫ଜଣ ଏଏସ୍ଆଇ ଏବଂ ଅନ୍ୟ କର୍ମଚାରୀ ସାମିଲ ଥିଲେ। ଚଢ଼ାଉ ବେଳେ ଭୁବନେଶ୍ୱର କୋରଡ଼କଣ୍ଟାରେ ତିନି ମହଲା କୋଠା, ଉତ୍ତରା ଛକରେ ମାର୍କେଟ କମ୍ପ୍ଲେକ୍ସ, ରବି ଟକିଜ୍ସ୍ଥିତ ମେଟ୍ରୋ ମ୍ୟାନ୍ସନରେ ଥିବା ଗୋଟିଏ ଦୋକାନ ଘର, ପୁରୀସ୍ଥିତ ଗ୍ରାଣ୍ଡ୍ ଆସିଆନା ଆପାର୍ଟମେଣ୍ଟରେ ଗୋଟିଏ ଫ୍ଲାଟ୍, କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବେଲତଳରେ ଥିବା ୩ ମହଲା କୋଠା, ପଟ୍ଟାମୁଣ୍ଡାଇ କେଶପୁରସ୍ଥିତ ପୈତୃକ ଗାଁରେ ଘର ଓ ଭୁବନେଶ୍ୱର ଝାରପଡ଼ା ନୀଳାଦ୍ରିନଗରସ୍ଥିତ ଘର ଠାବ ହୋଇଥିଲା। ସେହିପରି ତାଙ୍କ ନାମରେ ଭୁବନେଶ୍ୱର, ପୁରୀ ଓ କେନ୍ଦ୍ରାପଡ଼ାର ମୁଖ୍ୟ ଅଞ୍ଚଳରେ ୬ଟି ପ୍ଲଟ ଥିବା ଜଣାପଡ଼ିଥିଲା। ଏଥିସହ ତାଙ୍କ ଘରୁ ୧୨.୩୨ ଲକ୍ଷର ସୁନା ଓ ରୁପା ଅଳଙ୍କାର, ୨.୭୮ ଲକ୍ଷ ଟଙ୍କାର ୩ଟି ବାଇକ, ୩.୯୩ ଲକ୍ଷର ଗୋଟିଏ ଚାରିଚକିଆ ଯାନ, ୧୪.୬୦ ଲକ୍ଷ ଟଙ୍କାର ଘରୋଇ ଉପକରଣ ଏବଂ ୧ ଲକ୍ଷ ୭ ହଜାର ୮୫୦ ଲକ୍ଷ ନଗଦ ଟଙ୍କା ଏବଂ ବିଭିନ୍ନ ବ୍ୟାଙ୍କରେ ୬୫.୭୬ ଲକ୍ଷ ଟଙ୍କା ଜମାରାଶି ଓ ଜୀବନବୀମା ପଲିସି ଠାବ କରାଯାଇଥିଲା।
