ଭୁବନେଶ୍ୱର,୧୮।୭(ବ୍ୟୁରୋ): କାଉନ୍ସିଲ ଫର୍ ଦି ଇଣ୍ଡିଆନ୍ ସ୍କୁଲ ସାର୍ଟିଫିକେଟ୍ ଏକ୍ଜାମିନେଶନ(ସିଆଇଏସ୍ସିଇ) ଦ୍ୱାରା ପରିଚାଳିତ ଆଇସିଏସ୍ଇ ଦଶମ ପରୀକ୍ଷା ଫଳ ରବିବାର ପ୍ରକାଶ ପାଇଛି। ଚଳିତବର୍ଷ ପାସ୍ ହାର ୯୯.୯୭% ରହିଛି। ଛାତ୍ରୀଙ୍କ ପାସ୍ ହାର ୯୯.୯୮% ଥିବାବେଳେ ଛାତ୍ରଙ୍କ ପାସ୍ ହାର ୯୯.୯୭%। ଦେଶ ତଥା ବାହାରୁ ମୋଟ ୨,୩୧,୦୬୩ଜଣ ଛାତ୍ରୀଛାତ୍ର ପରୀକ୍ଷା ଦେଇଥିଲେ। ସେମାନଙ୍କ ମଧ୍ୟରୁ ୨,୩୧,୦୦୪ ଉତ୍ତୀର୍ଣ୍ଣ ହୋଇଥିବାବେଳେ ୫୯ଜଣ ଫେଲ୍ ହୋଇଛନ୍ତି। ଏଥର ୪ଜଣ ଛାତ୍ରୀଛାତ୍ର ୯୯.୮୦% ମାର୍କ ରଖି ସର୍ବଭାରତୀୟ ସ୍ତରରେ ଟପ୍ପର ହୋଇଛନ୍ତି। ସେମାନେ ହେଲେ ପୁଣେର ହର୍ଗୁନ୍ କୌର୍ ମଠାରୁ, କାନପୁରର ଅନିକା ଗୁପ୍ତା ଓ କନିଷ୍କା ମିତ୍ତଲ ଏବଂ ଉତ୍ତରପ୍ରଦେଶ ବଳରାମପୁରର ପୁଷ୍କର ତ୍ରିପାଠୀ। ସେହିଭଳି ୩୪ଜଣ ଛାତ୍ରୀଛାତ୍ର ୯୯.୬୦% ସହ ଦ୍ୱିତୀୟ ସ୍ଥାନରେ ରହିଥିବାବେଳେ ୭୨ଜଣ ୯୯.୪୦% ସହ ତୃତୀୟ ସ୍ଥାନରେ ରହିଛନ୍ତି। ସେପଟେ ଓଡ଼ିଶା ମଧ୍ୟ ଆଇସିଏସ୍ଇ ଦଶମରେ ଭଲ ରେଜଲ୍ଟ କରିଥିବା ଦେଖାଯାଇଛି। ଓଡ଼ିଶାର ବି ୪ ଜଣ ଛାତ୍ରୀଛାତ୍ର ୯୯.୨୦% ସହ ରାଜ୍ୟ ଟପ୍ପର ହୋଇଛନ୍ତି। ସେମାନେ ହେଲେ କଟକ ଏସ୍ସିବି ମେଡିକାଲ ପବ୍ଲିକ ସ୍କୁଲର ଋଷି ସାଗର ଶତପଥୀ, ରାଉରକେଲା ଇସ୍ପାତ ଇଂଲିଶ ମିଡିୟମ ସ୍କୁଲର ସାଇ କ୍ରିଷ୍ଣା ପଣ୍ଡା, ଭୁବନେଶ୍ୱର ସେଣ୍ଟ ଯୋସେଫ ହାଇସ୍କୁଲର ଶ୍ରୀଧାରା ବାରିକ ଏବଂ କେନ୍ଦୁଝରର
ନିର୍ମଳା କନ୍ଭେଣ୍ଟ ସ୍କୁଲର ଆଶୁତୋଷ ଦେବପ୍ରିୟମ ନାୟକ। ସେହିଭଳି ୮ଜଣ ଛାତ୍ରୀଛାତ୍ର ୯୯% ସହ ରାଜ୍ୟରେ ଦ୍ୱିତୀୟ ସ୍ଥାନରେ ଥିବାବେଳେ ୯ଜଣ ୯୮.୮୦% ସହ ତୃତୀୟ ସ୍ଥାନରେ ରହିଛନ୍ତି।
୩୦ଟି ଭାଷାରେ ପରୀକ୍ଷା ହୋଇଥିଲା। ୨୦ଟି ଭାରତୀୟ ଭାଷା, ୯ଟି ବିଦେଶୀ ଏବଂ ଗୋଟିଏ କ୍ଲାସିକାଲ ଭାଷା ରହିଥିଲା। ୨,୫୩୫ ସ୍କୁଲରୁ ପାସ୍ ହୋଇଥିବା ମୋଟ ୨,୩୧,୦୦୪ ଛାତ୍ରୀଛାତ୍ରଙ୍କ ମଧ୍ୟରୁ ୧,୦୫,୩୬୯ଜଣ ଛାତ୍ରୀ ଓ ୧,୨୫,୬୩୫ଜଣ ଛାତ୍ର ଅଛନ୍ତି। ୧୨,୯୮୦ଜଣ ଏସ୍ସି, ୭,୯୭୫ଜଣ ଏସ୍ଟି ଏବଂ ୪୯,୭୩୧ଜଣ ପଛୁଆବର୍ଗର ପିଲା ରହିଛନ୍ତି। ୭୧୨ଜଣ ସ୍ବତନ୍ତ୍ର ପିଲା ଏହି ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି। ତେବେ ଦକ୍ଷିଣ ଓ ପଶ୍ଚିମ ରିଜିଅନରୁ ସର୍ବାଧିକ ୯୯.୯୯% ରେଜଲ୍ଟ ହୋଇଛି। ସେହିଭଳି ଉତ୍ତର ରିଜିଅନରେ ୯୯.୯୮%, ପୂର୍ବ ରିଜିଅନରେ ୯୯.୯୬% ଏବଂ ଫରେନ୍ରେ ୯୯.୫୦% ପାସ୍ହାର ରହିଛି।
ଚଳିତବର୍ଷ ସିଆଇଏସ୍ସିଇ ପକ୍ଷରୁ ଆଇସିଏସ୍ଇ ଦଶମର ଦୁଇଟି ସେମିଷ୍ଟର ପରୀକ୍ଷା ହୋଇଥିଲା। ନଭେମ୍ବର-ଡିସେମ୍ବରରେ ସେମିଷ୍ଟର-୧ ଏବଂ ଏପ୍ରିଲ-ମେ’ରେ ସେମିଷ୍ଟର-୨ ଅନୁଷ୍ଠିତ ହୋଇଥିଲା। ଦୁଇଟି ସେମିଷ୍ଟରର ରେଜଲ୍ଟ ଏବଂ ପ୍ରୋଜେକ୍ଟ(ଇଣ୍ଟରନାଲ ଆସେସମେଣ୍ଟ)କୁ ଆଧାର କରି ଚୂଡ଼ାନ୍ତ ଫଳ ପ୍ରକାଶ ପାଇଛି। ଦୁଇଟି ଯାକ ସେମିଷ୍ଟର ଦେଇଥିବା ଛାତ୍ରୀଛାତ୍ରଙ୍କ ଫଳାଫଳ ପ୍ରକାଶ ପାଇଛି। ଯେଉଁମାନେ ସେମିଷ୍ଟର-୧ କିମ୍ବା ୨ ଦେଇ ନ ଥିଲେ, ସେମାନଙ୍କର ରେଜଲ୍ଟ ବାହାରି ନାହିଁ। ଛାତ୍ରୀଛାତ୍ରମାନେ ସିଆଇଏସ୍ସିଇ ଓ୍ବେବ୍ସାଇଟ୍ www.cisce.orgକୁ ଯାଇ କିମ୍ବା ନଂ.୦୯୨୪୮୦୮୨୮୮୩କୁ ଏସ୍ଏମ୍ଏସ୍ କରି ରେଜଲ୍ଟ ପାଇପାରିବେ।
