ବିଞ୍ଝାରପୁର,୬।୮(ଡି.ଏନ.ଏ.): ଯାଜପୁର ଜିଲା ବିଞ୍ଝାରପୁର ଥାନା ପ୍ରୀତିପୁର ଅଞ୍ଚଳର ଜଣେ ଚତୁର୍ଥ ଶ୍ରେଣୀ ଛାତ୍ରୀଙ୍କୁ ଶୁକ୍ରବାର ସ୍କୁଲ୍ରୁ ଉଠାଇ ନେଇ ବଳାତ୍କାର କରାଯାଇଥିବା ଅଭିଯୋଗ ହୋଇଛି। ଉକ୍ତ ଅଭିଯୋଗ ଆଧାରରେ ପୋଲିସ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଛି। ଘଟଣାପରେ ଏସ୍ପି ରାହୁଲ୍ ପିଆର୍ ଥାନାରେ ପହଞ୍ଚତ୍ ତଦନ୍ତ କରିଛନ୍ତି। ଗିରଫ ଅଭିଯୁକ୍ତ ହେଲେ ଉକ୍ତ ଥାନା ଅଧୀନ ପ୍ରୀତିପୁର ପଞ୍ଚାୟତ ନୂଆଗାଁ ଗ୍ରାମର ପ୍ରକାଶ ମଳିକ(୨୮)।
ଅଭିଯୋଗ ମୁତାବକ, ଛାତ୍ରୀ ଜଣକ ମଧ୍ୟାହ୍ନଭୋଜନ ଖାଇସାରିବା ପରେ ବିଦ୍ୟାଳୟରେ ଥିଲେ। ଏହି ସମୟରେ ଅଭିଯୁକ୍ତ ବିଦ୍ୟାଳୟରେ ପହଞ୍ଚତ୍ ଛାତ୍ରୀଙ୍କୁ ନିଜ ସାଇକେଲରେ ବସାଇ ପ୍ରୀତିପୁର ବଜାର ଆଡ଼କୁ ନେଇଥିଲେ। ଅନ୍ୟପଟେ ସ୍କୁଲ୍ ଛୁଟି ହେଲାପରେ ସବୁପିଲା ଘରକୁ ଯାଇଥିଲା ବେଳେ ଛାତ୍ରୀ ଫେରି ନ ଥିଲେ। ପରିବାର ଲୋକ ଛାତ୍ରୀଙ୍କୁ ବହୁ ଖୋଜାଖୋଜି କରିଥିଲେ ମଧ୍ୟ କୌଣସି ସ୍ଥାନରେ ପାଇ ନ ଥିଲେ। ଛାତ୍ରୀଙ୍କୁ ପ୍ରକାଶ ସାଇକଲରେ ବସାଇ ପ୍ରୀତିପୁର ଆଡ଼କୁ ନେଇଥିବା ଜଣେ ବ୍ୟକ୍ତି ତାଙ୍କ ପରିବାର ଲୋକଙ୍କୁ କହିଥିଲେ। ଏହାଶୁଣି ପରିବାର ଲୋକ ପ୍ରୀତିପୁର ଆଡ଼କୁ ଦୌଡ଼ି ଯାଇଥିଲେ। ରାସ୍ତାର ଏକସ୍ଥାନରେ ପ୍ରକାଶ ସହିତ ଛାତ୍ରୀଙ୍କୁ ପରିବାର ଲୋକ ପାଇଥିଲେ। ଛାତ୍ରୀଙ୍କୁ ପ୍ରକାଶ ବଳାତ୍କାର କରିଥିବା ଛାତ୍ରୀ ପରିବାର ଲୋକଙ୍କୁ କହିଥିଲେ। ପରିବାର ଲୋକେ ଅଭିଯୁକ୍ତ ପ୍ରକାଶଙ୍କୁ ଧରି ଅଳକୁଣ୍ଡ ଫାଣ୍ଡି ଜିମା ଦେଇଥିଲେ। ଫାଣ୍ଡି ଅଧିକାରୀ ସୁରେନ୍ଦ୍ର ରଥ ଅଭିଯୁକ୍ତ ଓ ଛାତ୍ରୀଙ୍କୁ ବିଞ୍ଝାରପୁର ଥାନାକୁ ନେଇଥିଲେ। ପୀଡ଼ିତା ଛାତ୍ରୀଙ୍କ ମା’ ଥାନାରେ ଅଭିଯୋଗ କଲାପରେ ଆଇଆଇସି ରଞ୍ଜିତ ମହାନ୍ତି ନଂ.୪୬୯/୨୨ରେ ଏକ ମାମଲା ରୁଜୁ କରିଛନ୍ତି। ଶନିବାର ଡାକ୍ତରୀ ମାଇନା କରାଯାଇ ଅଭିଯୁକ୍ତଙ୍କୁ କୋର୍ଟଚାଲାଣ କରାଯିବ ବୋଲି ଥାନାଧିକାରୀ ସୂଚନା ଦେଇଛନ୍ତି। ଏହି ଘଟଣା ଅଞ୍ଚଳରେ ଆଲୋଡ଼ ସୃଷ୍ଟି କରିଛି।
