ନୂଆଦିଲ୍ଲୀ,୨୩।୭: ICC ଦ୍ୱାରା ବୁଧବାର ନୂତନ ରାଙ୍କିଙ୍ଗ ଜାରି କରାଯାଇଛି। ଦିନିକିଆ ବ୍ୟାଟିଂ ରାଙ୍କିଙ୍ଗ୍ରେ ଭାରତୀୟ ବ୍ୟାଟ୍ସମ୍ୟାନମାନଙ୍କ ଦବଦବା ଜାରି ରହିଥିବାବେଳେ କ୍ୟାପଟେନ ଶୁବମନ ଗିଲ୍ ନମ୍ବର-୧ ହେବାରୁ ଅଳ୍ପକେ ବର୍ତ୍ତିଯାଇଛନ୍ତି। ଟପ-୪ ଜଣଙ୍କ ମଧ୍ୟରେ ୩ ଜଣ ଭାରତୀୟ ଖେଳାଳି ସାମିଲ ଅଛନ୍ତି, ଯେଉଁଥିରେ କ୍ୟାପଟେନ ଗିଲ୍ଙ୍କ ସହିତ ରୋହିତ ଶର୍ମା ଏବଂ ବିରାଟ କୋହଲି ଅଛନ୍ତି। ଟପ-୧୦ କଥା କହିବାକୁ ଗଲେ ୩ଟି ପରିବର୍ତ୍ତନ ଘଟିଛି। ଟିମ ଇଣ୍ଡିଆ ବିରୁଦ୍ଧରେ ନିକଟରେ ଶେଷ ହୋଇଥିବା ଦିନିକିଆ ସିରିଜରେ ଚମତ୍କାର ପ୍ରଦର୍ଶନ କରିଥିବା ଜୋ ରୁଟ ୪ଟି ସ୍ଥାନ ଉପରକୁ ଉଠିଛନ୍ତି।
ନ୍ୟୁଜିଲାଣ୍ଡର ଡେରିଲ ମିଚେଲ ଆଇସିସି ଦିନିକିଆ ବ୍ୟାଟିଂ ରାଙ୍କିଙ୍ଗ୍ର ପ୍ରଥମ ସ୍ଥାନରେ ଅଛନ୍ତି। ତାଙ୍କର ୮୦୨ ରେଟିଂ ରହିଥିବାବେଳେ ୮୦୧ ରେଟିଂ ସହିତ ଭାରତୀୟ କ୍ୟାପଟେନ ଶୁବମନ ଗିଲ ଦ୍ୱିତୀୟ ସ୍ଥାନରେ ଅଛନ୍ତି। ବିରାଟ କୋହଲି ଏହି ତାଲିକାର ତୃତୀୟ ସ୍ଥାନରେ ଥିବାବେଳେ ସେ ଇଂଲଣ୍ଡ ବିରୁଦ୍ଧରେ ଦ୍ୱିତୀୟ ଦିନିକିଆରେ ୬୫ ଏବଂ ତୃତୀୟ ଦିନିକିଆରେ ୭୪ ରନର ଚମତ୍କାର ଇନିଂସ ଖେଳିଥିଲେ। ରୋହିତ ଶର୍ମା ଚତୁର୍ଥ ସ୍ଥାନରେ ଥିବାବେଳେ ସେ ଇଂଲଣ୍ଡ ବିରୁଦ୍ଧରେ ତୃତୀୟ ଦିନିକିଆରେ ୧୩୮ ରନର ଏକ ଐତିହାସିକ ଇନିଂସ ଖେଳିଥିଲେ। ସେ ହେଉଛନ୍ତି ଲଡର୍ସରେ ଦିନିକିଆ ଶତକ ହାସଲ କରିଥିବା ଏକମାତ୍ର ଭାରତୀୟ ବ୍ୟାଟ୍ସମ୍ୟାନ। ରୋହିତଙ୍କର ୭୫୮ ରେଟିଂ ପଏଣ୍ଟ ରହିଛି।
ODI ପାଇଁ ଆଇସିସି ଦିନିକିଆ ବ୍ୟାଟିଂ ରାଙ୍କିଙ୍ଗ୍ର ଶୀର୍ଷ ୧୦ ଜଣ ଖେଳାଳିଙ୍କ ତାଲିକା:
୧. ଡେରିଲ ମିଚେଲ (ନ୍ୟୁଜିଲାଣ୍ଡ)
୨. ଶୁବମନ ଗିଲ (ଭାରତ)
୩. ବିରାଟ କୋହଲି (ଭାରତ)
୪. ରୋହିତ ଶର୍ମା (ଭାରତ)
୫. ଇବ୍ରାହିମ ଜାଦ୍ରାନ (ଆଫଗାନିସ୍ତାନ)
୬. ବାବର ଆଜମ (ପାକିସ୍ତାନ)
୭. ହ୍ୟାରି ଟ୍ରେକ୍ଟର (ଆୟର୍ଲ୍ୟାଣ୍ଡ)
୮. ଜୋ ରୁଟ (ଇଂଲଣ୍ଡ)
୯. ଶାଇ ହୋପ (ୱେଷ୍ଟଇଣ୍ଡିଜ)
୧୦. ଚରିଥ ଅସଲଙ୍କା (ଶ୍ରୀଲଙ୍କା)
