ନୂଆଦିଲ୍ଲୀ,୨୪।୧୨: ୨୦୧୬ ପରଠୁ ଜାତୀୟ ଦଳରେ ସୁଯୋଗ ମିଳିବା ବନ୍ଦ ହୋଇଯାଇ ଥିଲା। ତଥାପି ୬ ବର୍ଷ ଧରି ଫିଲ୍ଡରେ ସକ୍ରିୟ ଥିଲେ ପୂର୍ବତନ ସ୍ପିନର ହରଭଜନ ସିଂ। ଭାରତକୁ ଅନେକ ମ୍ୟାଚ୍ ଜିତାଇଥିବା ଭଜି ଶୁକ୍ରବାର ୨୩ ବର୍ଷର କ୍ୟାରିୟରର ସମାପ୍ତି ଘୋଷଣା କରିଛନ୍ତି। କିନ୍ତୁ ସନ୍ନ୍ୟାସ ଅବସରରେ କୌଣସି ପଶ୍ଚାତାପ ନାହିଁ ବୋଲି କହିଛନ୍ତି ।
“ଅବସର ନେବାରେ ବିଳମ୍ବ ହୋଇଛି, ଏହା ମୋତେ ସ୍ବୀକାର କରିବାକୁ ପଡ଼ିବ। ସାଧାରଣତଃ ମୋ ଜୀବନରେ ଖୁବ୍ ସମୟାନୁବର୍ତ୍ତୀ। ବୋଧ ହୁଏ କେବଳ ଏହି ନିଷ୍ପତ୍ତିରେ ବିଳମ୍ବ କରିଛି। କିନ୍ତୁ ମୋ କ୍ୟାରିୟରକୁ ନେଇ ମୋର କୌଣସି ପଶ୍ଚାତାପ ନାହିଁ। ସିଡ୍ନୀ ଟେଷ୍ଟରେ ଯାହା ଘଟିଗଲା ଏବଂ ତା’ ପରେ ଯାହା ହେଲା, ସେ ସବୁ ଉଚିତ ନ ଥିଲା। ଏହା ଅନାବଶ୍ୟକ ଥିଲା। କିଏ କ’ଣ କହିଲେ ଭୁଲି ଯାଅ। ସତର ଦୁଇଟି ପକ୍ଷ ଥାଏ। ଏହି ଘଟଣାରେ ମୋ ପକ୍ଷ କେହି ଜାଣିବାକୁ ଚେଷ୍ଟା କଲେ ନାହିଁ। ମୁଁ କେବେ କି ନିଜ ଆଡ଼କୁ ମୋ ପକ୍ଷ ରଖି ନାହିଁ। ଏ ସମ୍ପର୍କରେ ମୋ ଅଟୋବାୟୋଗ୍ରାଫି ଉଲ୍ଲେଖ କରିବି। ମୋ ଉପରେ କ’ଣ ଘଟିଗଲା, ମୋତେ ହିଁ ଜଣା। ଏହା କାହା ସହ ଘଟିବା ଉଚିତ ନୁହେଁ” ବୋଲି ଏକ ସାକ୍ଷାତ୍କାରରେ କହିଛନ୍ତି।
ଉଲ୍ଲେଖଯୋଗ୍ୟ, ୧୯୯୮ରେ ପଦାର୍ପଣ କରିଥିବା ଭଜି ୨୦୧୬ରେ ଅନ୍ତିମ ମ୍ୟାଚ୍ ଖେଳିଥିଲେ। ମୋଟ ଉପରେ ୩୭୭ ଅନ୍ତର୍ଜାତୀୟ ମ୍ୟାଚ୍ରେ ସେ ହାତେଇଥିଲେ ୭୧୧ ଉଇକେଟ। ୨୦୦୭ ଟି୨୦ ବିଶ୍ୱକପ୍ ଓ ୨୦୧୧ ଦିନିକିଆ ବିଶ୍ୱକପ୍ ଦଳର ସେ ଗୁରୁତ୍ୱପୂର୍ଣ୍ଣ ଅଂଶ ଥିଲେ।
