ଓମାନ,୨୭।୧:ଭାରତୀୟ କ୍ରିକେଟ ଦଳର ପୂର୍ବତନ ଅଧିନାକୟ ମହେନ୍ଦ୍ର ସିଂ ଧୋନୀଙ୍କ ଜଣେ କିମ୍ବଦନ୍ତୀ କ୍ରିକେଟର ଭାବେ ଜଣାଶୁଣା। ତାଙ୍କ ଅଧିନାୟକତ୍ୱରେ ଟିମ ଇଣ୍ଡିଆକୁ ୩ଟି ଆଇସିସି ଟ୍ରଫିରେ ଜିତିଛି। ଦେଶ-ବିଦେଶରେ ତାଙ୍କର ବହୁ ପ୍ରଶଂସକ ମଧ୍ୟ ଅଛନ୍ତି। କିନ୍ତୁ ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ଧୋନୀ ତାଙ୍କ ସହିତ କେବେ ଫୋନ ରଖନ୍ତି ନାହିଁ। ଭାରତୀୟ କ୍ରିକେଟ ଦଳର ପୂର୍ବତନ ମୁଖ୍ୟ କୋଚ ରବି ଶାସ୍ତ୍ରୀ ଏହି ଦାବି କରିଛନ୍ତି। ପାକିସ୍ତାନର ପୂର୍ବତନ ପେସର୍ ଶୋଏବ ଅଖତରଙ୍କ ଏକସାକ୍ଷାତକାରରେ ସେ ଏହା କହିଛନ୍ତି। ଏକ ଭିଡିଓରେ ଶାସ୍ତ୍ରୀ କହିଛନ୍ତି, ଧୋନୀ ନିଜ ପାଖରେ ମୋବାଇଲ ରଖୁ ନ ଥିବାରୁ ତାଙ୍କ ଫୋନ ନମ୍ବର ମୋ ପାଖରେ ନାହିଁ।
ନିକଟରେ ଶାସ୍ତ୍ରୀ ଓମାନରେ ଶୋଏବ ଅଖତରଙ୍କ ସହ ଏକ ବିଶେଷ ବାର୍ତ୍ତାଳାପ କରିଥିଲେ। ଶୋଏବ ଅଖତର ଏହି ଭିଡିଓକୁ ତାଙ୍କ ୟୁଟ୍ୟୁବ ଚ୍ୟାନେଲରେ ପୋଷ୍ଟ କରିଛନ୍ତି। ଅଖତର ଧୋନୀଙ୍କ ବିଷୟରେ ପଚାରବାରୁ ଶାସ୍ତ୍ରୀ କହିଛନ୍ତି ସେ ତାଙ୍କ ଭଳି ଖେଳାଳିଙ୍କୁ କେବେ ଦେଖି ନାହାଁନ୍ତି। ଧୋନୀ ଯେ କୌଣସି ପରିସ୍ଥିତିରେ ମଧ୍ୟ ରାଗନ୍ତି ନାହିଁ। ସର୍ବଦା କୁଲ୍ ରହିବାକୁ ଚେଷ୍ଟା କରନ୍ତି। ପ୍ରତ୍ୟେକ ପରିସ୍ଥିତିରେ ସେ ସର୍ବଦା ସମାନ ରୁହନ୍ତି। ତେବେ ଶୂନରେ ଆଉଟ୍ ହୁଅନ୍ତୁ କି ୧୦୦ ରନ ସ୍କୋର କରନ୍ତୁ, ବିଶ୍ୱକପ ଟ୍ରଫି ଉଠାନ୍ତୁ କିମ୍ବା ପ୍ରଥମ ରାଉଣ୍ଡରେ ହାରିଯାଆନ୍ତୁ, ଏଥିରେ କିଛି ଫରକ ପଡେ ନାହିଁ।ି ମୁଁ ଅନେକ ଖେଳାଳିଙ୍କୁ ଦେଖିଛି କିନ୍ତୁ ଆଜି ପର୍ଯ୍ୟନ୍ତ ଧୋନୀଙ୍କ ଭଳି କେହି ଦେଖି ନାହାଁନ୍ତି। ମୁଁ ସଚିନଙ୍କୁ ମଧ୍ୟ ଦେଖିଥିଲି, ଯିଏ ଜଣେ ମହାନ କ୍ରିକେଟର ଥିଲେ କିନ୍ତୁ ସେ ବେଳେବେଳେ ରାଗି ଯାଉଥିଲେ ବୋଲି ସେ କହିଛନ୍ତି।
