ଢେଙ୍କାନାଳ ଅଫିସ, ୨୮ା୩: ଢେଙ୍କାନାଳ ବସ୍ଷ୍ଟାଣ୍ଡ ଟ୍ରାଫିକ୍ ଛକ ନିକଟରେ ଥିବା ହନୁମାନ ବାଟିକାର ନବକଳେବର ପରେ ବଢ଼ିଛି ଏହାର ଆକର୍ଷଣ। ଏହି ସ୍ଥାନ କେବଳ ଆଧ୍ୟାତ୍ମିକ ପରିବେଶ ସୃଷ୍ଟି କରୁଛି ତାହା ନୁହେଁ, ଅଧିକନ୍ତୁ ବୟସ୍କମାନେ ଏଠାରୁ ପାଉଛନ୍ତି ମାନସିକ ଶାନ୍ତି। ସକାଳେ ସନ୍ଧ୍ୟାରେ ଦିଅଁ ଦର୍ଶନ କରିବା ସହିତ କିଛି ସମୟ ଅତିବାହିତ କରିବାକୁ ସହରବାସୀଙ୍କ ପସନ୍ଦର ସ୍ଥାନ ପାଲଟିଛି ହନୁମାନ ବାଟିକା।
୨୦୦୮ ମେରେ ବସ୍ଷ୍ଟାଣ୍ଡ ଟ୍ରାଫିକ୍ ଛକରେ ହନୁମାନଜୀଉଙ୍କ ୧୮ ଫୁଟ ଉଚ୍ଚତାର ମୂର୍ତ୍ତି ସ୍ଥାପନ କରାଯାଇଥିଲା। ସ୍ଥାନୀୟ ଶ୍ରଦ୍ଧାଳୁଙ୍କ ଉଦ୍ୟମରେ ଏହାକୁ ଆକର୍ଷଣୀୟ ରୂପ ଦିଆଯାଇଛି। ହନୁମାନ ବାଟିକା ପରିସରରେ ଚିତ୍ରରେ ଚିତ୍ରରେ ଦର୍ଶାଯାଇଛି ରାମକଥା। ଶ୍ରୀରାମଙ୍କ ବନବାସଠାରୁ ଆରମ୍ଭ କରି ସେତୁବନ୍ଧ ନିର୍ମାଣ, ଅଶୋକ ବନରେ ସୀତାଙ୍କୁ ଠାବ, ଲଙ୍କା ଦହନ, ଅସୁରଙ୍କୁ ନିପାତ ଆଦି ପୌରାଣିକ ବିଷୟ ଚିତ୍ରରେ ପ୍ରଦର୍ଶିତ ହୋଇଛି। ହନୁମାନ ବାଟିକାକୁ ଆସୁଥିବା ଶ୍ରଦ୍ଧାଳୁମାନେ ରାମକଥାକୁ ବେଶ୍ ଉପଭୋଗ କରୁଛନ୍ତି। ପ୍ରତି ମାସ ସଂକ୍ରାନ୍ତିରେ ପବନପୁତ୍ରଙ୍କ ସ୍ବତନ୍ତ୍ର ପୂଜାର୍ଚ୍ଚନା କରାଯାଉଛି। ଏହାକୁ ବାଦ୍ଦେଲେ ହନୁମାନ ଜୟନ୍ତୀ, ଶ୍ରୀରାମ ନବମୀ, ହୋମଯଜ୍ଞ, ରାମଚରିତ ମାନସ ପାଠ ଓ ହନୁମାନ ଚାଳିଶା ପାଠ ମଧ୍ୟ ଆୟୋଜିତ ହେଉଛି। ମାନସିକଧାରୀମାନେ ୧୦୮ ହନୁମାନ ଚାଳିଶା ପାଠ କାର୍ଯ୍ୟକ୍ରମ ପାଇଁ ହନୁମାନ ବାଟିକାକୁ ଆସୁଛନ୍ତି।
ସେହିପରି ଶ୍ରଦ୍ଧାଳୁମାନେ ସମୟ ଅତିବାହିତ କରିବାକୁ ବାଟିକାରେ
ଆଧ୍ୟାତ୍ମିକ ବାତାବରଣ ସୃଷ୍ଟି ହେଉଛି
ଶ୍ରୀ ହନୁମାନ ଜୀଉଙ୍କ ମୂର୍ତ୍ତି ପ୍ରତିଷ୍ଠା ହେବାପରେ ହନୁମାନ ବାଟିକାରେ ବିଭିନ୍ନ ପର୍ବପର୍ବାଣି ଆୟୋଜନ କରାଯାଉଛି। ସେଠାରେ ଆୟୋଜିତ ପ୍ରସାଦ ସେବନ କାର୍ଯ୍ୟକ୍ରମରେ ବହୁ ଲୋକ ସାମିଲ ହେଉଛନ୍ତି। ସହର ଉପକଣ୍ଠରେ ଆଧ୍ୟାତ୍ମିକ ବାତାବରଣ ସୃଷ୍ଟି ହେଉଛି। ଖରାବେଳେ ଗଛ ଛାଇରେ ଲୋକମାନେ ବିଶ୍ରାମ ମଧ୍ୟ ନେଉଛନ୍ତି।
-ରୁଦ୍ରନାରାୟଣ ତ୍ରିପାଠୀ
ସମୟ ଅତିବାହିତ କରିବାର ପ୍ରକୃଷ୍ଟ ସ୍ଥାନ
ସମସ୍ତ ବର୍ଗର ଲୋକଙ୍କ ପାଇଁ ଅବସର ସମୟ ଅତିବାହିତ କରିବା ନିମନ୍ତେ ଏକ ପ୍ରକୃଷ୍ଠ ସ୍ଥାନ ହେଉଛି ହନୁମାନ ବାଟିକା। ଏହି ସ୍ଥାନକୁ ବୟସ୍କ, ଯୁବପିଢ଼ି, ସରକାରୀ କର୍ମଚାରୀ ସମସ୍ତ ଆସୁଛନ୍ତି। ସକାଳେ ସନ୍ଧ୍ୟାରେ ଚା ପିଇବାର ମଜା ନେବା ସହ ସହରର ବିଭିନ୍ନ ସମସ୍ୟା, ରାଜନୀତି, ଆଧ୍ୟାତ୍ମିକ ଚର୍ଚ୍ଚା କରୁଛନ୍ତି।
-ପ୍ରିୟବ୍ରତ ଗଡ଼ନାୟକ
ସୌନ୍ଦର୍ଯ୍ୟକରଣ ସ୍ବାଗତଯୋଗ୍ୟ ପଦକ୍ଷେପ
ହନୁମାନ ବାଟିକାର ସୌନ୍ଦର୍ଯ୍ୟକରଣ ସ୍ବାଗତଯୋଗ୍ୟ ପଦକ୍ଷେପ। ବିଭିନ୍ନ ପ୍ରଜାତିର ଗଛ ଲଗାଯିବା ପରେ ସବୁଜବନାନୀ ସୃଷ୍ଟି ହୋଇଛି। ପ୍ରମୁଖ ପର୍ବପର୍ବାଣିରେ ସାମୂହିକ ପ୍ରସାଦ ସେବନ ଲାଗି ଏଠାରେ ସମସ୍ତ ସୁବିଧା ରହିଛି। ସବୁବର୍ଗର ଲୋକେ ଏଥିରେ ସାମିଲ ହେଉଥିବାରୁ ଭାଇଚାରା ବଢୁଛି। ସନ୍ଧ୍ୟାରେ ହନୁମାନ ଚାଳିଶା ପାଠରେ ଆଧ୍ୟାତ୍ମିକ ବାତାବରଣ ସୃଷ୍ଟି ହେଉଛି।
-ଅଥୟ କୁମାର ସାହୁ
