ଭାସ୍କୋ, ୧ା୨(ପି.ଟି.)-ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ)ରେ ରବିବାର ଖେଳାଯାଇଥିବା ପ୍ରଥମ ମ୍ୟାଚରେ ହାଇଦ୍ରାବାଦ ଏଫ୍ସି ୨-୦ ଗୋଲରେ ଚେନ୍ନାଇନ ଏଫ୍ସିକୁ ପରାସ୍ତ କରିଛି। ଏହାଦ୍ୱାରା ପ୍ଲେ-ଅଫ୍ ଯୋଗ୍ୟତା ପାଇଁ ଦଳ ନିଜ ସ୍ଥିତିକୁ ଅଧିକ ସୁଦୃଢ କରିପାରିଛି। ଫ୍ରାନ୍ ସାଣ୍ଡାଜା (୨୮ତମ ମିନିଟ) ଓ ଜୋଏଲ ଚିଆନିଜ୍ (୮୨ତମ) ଗୋଲ ସ୍କୋର କରିଥିଲେ। ଏହି ବିଜୟ ଦ୍ୱାରା ହାଇଦ୍ରାବାଦ ପଏଣ୍ଟ ଟେବୁଲ୍ର ତୃତୀୟ ସ୍ଥାନକୁ ଉନ୍ନୀତ ହୋଇଛି। ପ୍ରଥମ କ୍ୱାର୍ଟର ଖେଳରେ ହାଇଦ୍ରାବାଦ ଆକ୍ରମଣାତ୍ମକ ଖେଳିଥିଲା। ଅଧଘଣ୍ଟା ଖେଳ ପୂର୍ବରୁ ଦଳକୁ ସୁଯୋଗ ମିଳିଥିଲା। ସ୍ପାନିଶ ଖେଳାଳି ଜୋଆଓ ଭିକ୍ଟରଙ୍କଠାରୁ ଥ୍ରୋ-ଇନ୍ ବଲ୍ ପାଇ ସାଣ୍ଡାଜା ଗୋଲ ପୋଷ୍ଟ ଆଡକୁ ଅଗ୍ରସର ହୋଇଥିଲେ। ବିପକ୍ଷ ଦଳର ଦୀପକ ଟାଙ୍ଗ୍ରୀ ତାଙ୍କୁ ବାଧା ଦେବାକୁ ଚେଷ୍ଟା କରି ବିଫଳ ହୋଇଥିଲେ। ସାଣ୍ଡାଜା କିନ୍ତୁ ତାଙ୍କ ଲକ୍ଷ୍ୟ ହାସଲ କରିଥିଲେ ଏବଂ ହାଇଦ୍ରାବାଦକୁ ୧-୦ରେ ଅଗ୍ରଣୀ କରାଇଥିଲେ। ଗୋଲ ବରଣ ପରେ ଚେନ୍ନାଇନ ଦଳ କିଛି ସମୟ ବଲ୍କୁ ନିଜ ନିୟନ୍ତ୍ରଣରେ ରଖିଥିଲା। ଦୁର୍ବଳ ପାସିଂ ଯୋଗୁ ଗୋଲ ଦେବାରେ ସକ୍ଷମ ହୋଇପାରି ନ ଥିଲା। ପ୍ରଥମାର୍ଦ୍ଧ ଖେଳ ପରେ ଚେନ୍ନାଇନ ଦଳ ୨ଜଣ ଖେଳାଳିଙ୍କୁ ବଦଳ କରିଥିଲା। ଜର୍ମନପ୍ରୀତ ସିଂ ଓ ଥୋଇ ସିଂଙ୍କ ସ୍ଥାନରେ ଫାତ୍ଖୁଲୋଭ ଏବଂ ଏଡଓ୍ବିନ ଭାନ୍ସପଲ ପଡ଼ିଆକୁ ଓହ୍ଲାଇଥିଲେ। ଏହା ଦ୍ୱାରା ଖେଳରେ କିଛି ପରିବର୍ତ୍ତନ ଲକ୍ଷ୍ୟ କରାଯାଇଥିଲା। ଦ୍ୱିତୀୟାର୍ଦ୍ଧରେ ଦଳ ଅଧିକାଂଶ ସମୟ ବଲ୍କୁ ନିଜ ନିୟନ୍ତ୍ରଣରେ ରଖିପାରିଥିଲା। ହେଲେ କୌଶଳ ଏବଂ ଫିନିଶିଂ ଅଭାବରୁ ଦଳ ଗୋଲ ଦେଇପାରି ନ ଥିଲା। ଅନ୍ୟପକ୍ଷରେ ଖେଳ ଶେଷ ହେବାକୁ ଆଉ ୧୦ ମିନିଟ ବାକି ରହିଥିବାବେଳେ ଚିଆନିଜ ଏକ ଗୋଲ ସ୍କୋର କରି ହାଇଦ୍ରାବାଦକୁ ୨-୦ରେ ବିଜୟୀ କରାଇଥିଲେ। ରବିବାର ଖେଳାଯାଇଥିବା ଲିଗ୍ର ଦ୍ୱିତୀୟ ମ୍ୟାଚରେ ଏଟିକେ ମୋହନବାଗାନ ୩-୨ ଗୋଲରେ କେରଳ ବ୍ଲାଷ୍ଟର୍ସକୁ ପରାସ୍ତ କରିଛି। ବିଜୟୀ ଦଳ ପକ୍ଷରୁ ରୟ କ୍ରିଷ୍ଣା (୬୫ତମ ଓ ୮୭ତମ ମିନିଟ) ଦୁଇଟି ଏବଂ ମାର୍ସେଲିନୋ ଲିଟ୍ ପେରିରା (୫୯ତମ) ଗୋଟିଏ ଗୋଲ ସ୍କୋର କରିଥିଲେ। ବ୍ଳାଷ୍ଟର୍ସ ପକ୍ଷରୁ ଗ୍ୟାରି ହୁପର (୧୪ତମ) ଏବଂ କୋଷ୍ଟା ଏନ୍ହାମୋନିସୁ (୫୧ତମ) ଗୋଲ ଦେଇଥିଲେ।
