ମହାକାଳପଡ଼ା,୧୧ା୫ (ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଜମ୍ବୁ ସାମୁଦ୍ରିକ ଥାନା ଅଧୀନ ସ୍ଥାନୀୟ ଖରିନାଶୀ ଗ୍ରାମର ମନୋରଞ୍ଜନ ଗିରି ୧୪ ବର୍ଷ ପୂର୍ବେ ଜମ୍ବୁ ଗ୍ରାମର ସାରଥି ମାନ୍ନାଙ୍କୁ ବୈଦିକ ରୀତିରେ ବିବାହ କରିଥିଲେ। ସେମାନଙ୍କର ଝିଅ ପୁଅ ଅଛନ୍ତି। ଅନେକ ସମୟରେ ସ୍ବାମୀ ଓ ସ୍ତ୍ରୀଙ୍କ ମଧ୍ୟରେ କୌଣସି କାରଣକୁ ନେଇ ଗଣ୍ଡଗୋଳ ଲାଗି ରହୁଥିଲ। ବିଭିନ୍ନ ସମୟରେ ଉଭୟ ପକ୍ଷ ଆପୋଷ ମିଳାମିଶା କରିଥିଲେ ମଧ୍ୟ ପୂର୍ବ ଭଳି ବିବାଦ ଲାଗି ରହିଥିଲା। ଏ ନେଇ ସ୍ତ୍ରୀ ସାରଥି ସ୍ବାମୀଙ୍କ ନିର୍ଯାତନା ସହି ନ ପାରି ପ୍ରାୟ ଦେଢ଼ ବର୍ଷ ଧରି ବାପଘରେ ରହୁଥିଲେ। କିଛି ମାସ ପୂର୍ବେ ଘଟଣାର ସମାଧାନ ହୋଇ ଶାଶୁଘରକୁ ଆସିଥିଲେ। ଶନିବାର କୌଣସି କାରଣରୁ ସ୍ବାମୀ ମନୋରଞ୍ଜନ ସ୍ତ୍ରୀଙ୍କୁ କାଠ ଫାଳିଆରେ ମାଡ ମାରିବା ସହ ଗୋଡ଼ ହାତ ବାନ୍ଧି ଡିଜେଲ ଢାଳି ଜୀବନରୁ ମାରିଦେବା ପାଇଁ ଉଦ୍ୟମ କରିଥିବା ସାରଥିଙ୍କ ମା’ ସାଧନା ମାନ୍ନା ଥାନାରେ ଲିଖିତ ଅଭିଯୋଗ କରିଛନ୍ତି। ନଂ. ୮୧/୨୬ରେ ମାମଲା ରୁଜୁ କରାଯାଇଛି। ଅପରପକ୍ଷରେ ଖବର ପାଇ ଝିଅର ବାପଘରର କେତେକ ଲୋକ ଖରିନାଶୀ ଗ୍ରାମର ମନୋରଞ୍ଜନଙ୍କ ଘରେ ପହଞ୍ଚି ଆମ ଝିଅକୁ କାହିଁକି ବାଡେଇଲ ବୋଲି ପଚାରିବା ସହ ଘରୁ ଘୋଷାଡି ରାସ୍ତାରେ ବାଡେଇ ଖଣ୍ଡିଆଖାବରା କରିଥିବା ଦେଖିବାକୁ ମିଳିଛି। ଏ ନେଇ ମନୋରଞ୍ଜନ ଶ୍ୱଶୁର ଘର ଲୋକଙ୍କ ବିରୋଧରେ ଥାନାରେ ଲିଖିତ ଅଭିଯୋଗ କରିଛନ୍ତି। ନଂ.୮୨/୨୬ରେ ମାମଲା ରୁଜୁ କରାଯାଇଥିବା ଜଣାପଡିଛି। ମନୋରଞ୍ଜନଙ୍କ ମାଡରେ ସ୍ତ୍ରୀ ସାରଥି ଆହତ ହୋଇ କେନ୍ଦ୍ରାପଡ଼ା ମେଡିକାଲରେ ଚିକିତ୍ସିତ ହେଉଛନ୍ତି। ମନୋରଞ୍ଜନ ଶ୍ୱଶୁର ଘର ଲୋକଙ୍କ ମାଡ଼ରେ ଆହତ ହୋଇ କେନ୍ଦ୍ରାପଡ଼ା ମେଡିକାଲରେ ମଧ୍ୟ ଚିକିତ୍ସିତ ହେଉଥିବା ଜଣାପଡିଛି।