ପୋର୍ଟ ଲୁଇସ,୨୧।୨ : ମରିସସରେ ସାମୁଦ୍ରିକ ଝଡ଼ ଫ୍ରେଡିର ତାଣ୍ଡବ ଜାରି ରହିଛି। ଏହା ଯୋଗୁ ପ୍ରବଳ ବର୍ଷା ହେବାରୁ ବହୁ ଲୋକେ ଜଳବନ୍ଦୀ ଅବସ୍ଥାରେ ରହିଛନ୍ତି। ପାଣିପାଗ ବିଭାଗ ଦ୍ୱାରା ଦିଆଯାଇଥିବା ଚେତାବନୀ ଲୋକଙ୍କ ଆତଙ୍କିତ କରିଛି। ପାଣିପାଗ ବିଭାଗ ଅନୁଯାୟୀ, ସାମୁଦ୍ରିକ ଝଡ଼ ଯୋଗୁ ପବନର ବେଗ ଘଣ୍ଟା ପ୍ରତି ୨୮୦ କିଲୋମିଟରରେ ପହଞ୍ଚିପାରେ। ପାଣିପାଗ ବିଭାଗ ଏହି ସାମୁଦ୍ରିକ ଝଡ଼କୁ ଏକ ଶ୍ରେଣୀ- ୩ ବର୍ଗ ସାଇକ୍ଲୋନ ବୋଲି ବର୍ଣ୍ଣନା କରିଛି।
ସାମୁଦ୍ରିକ ଝଡ଼ ବିପଦକୁ ଦୃଷ୍ଟିରେ ରଖି ଦ୍ୱୀପପୁଞ୍ଜର ଅନେକ ବିମାନ ଉଡ଼ାଣ ବାତିଲ କରାଯିବା ସହିତ ଏହାର ଷ୍ଟକ ଏକ୍ସଚେଞ୍ଜକୁ ବନ୍ଦ କରାଯାଇଛି। ଲୋକଙ୍କୁ ବିନା ଆବଶ୍ୟକତାରେ ଘରୁ ବାହାରକୁ ଯିବାକୁ ବାରଣ କରାଯାଇଛି। ଦେଶରେ ସମସ୍ତ ଦୋକାନ, ବ୍ୟାଙ୍କ ଏବଂ ପେଟ୍ରୋଲ ଷ୍ଟେଶନ ବନ୍ଦ ହୋଇ ଯାଇଛି।
ପାଣିପାଗ ଏଜେନ୍ସି କହିଛି ଯେ ସାମୁଦ୍ରିକ ଝଡ଼ ଯୋଗୁ ବଜ୍ରପାତ ଏବଂ ପ୍ରବଳ ପବନ ଜାରି ରହିବ। ସମୁଦ୍ରରେ ସାତ ମିଟର ଉଚ୍ଚର ଜୁଆର ଉଠିବାର ସମ୍ଭାବନା ରହିଛି। ଲୋକମାନଙ୍କୁ ସମୁଦ୍ରକୂଳକୁ ନ ଆସିବାକୁ ପରାମର୍ଶ ଦିଆଯାଇଛି।
ମରିସସ ପ୍ରଧାନମନ୍ତ୍ରୀ ପ୍ରବୀଣ ଜଗନ୍ନାଥ ନାଗରିକମାନଙ୍କୁ ସମସ୍ତ ଆବଶ୍ୟକୀୟ ସତର୍କତା ଅବଲମ୍ବନ କରିବାକୁ ଅନୁରୋଧ କରିଛନ୍ତି। ସେ କହିଛନ୍ତି ଯେ ସାମୁଦ୍ରିକ ଝଡ଼ ଫ୍ରେଡି ଏକ ଅତ୍ୟନ୍ତ ଭୟଙ୍କର ଘୂର୍ଣ୍ଣିବଳୟ ଯାହା ମରିସସ, ରୋଡ୍ରିଗୁସ ଏବଂ ସେଣ୍ଟ-ବ୍ରେଣ୍ଡନ ଦ୍ୱୀପପୁଞ୍ଜ ପାଇଁ ସିଧାସଳଖ ବିପଦ ସୃଷ୍ଟି କରିବ। ସୋମବାର ଠାରୁ ପରବର୍ତ୍ତୀ ବିଜ୍ଞପ୍ତି ପର୍ଯ୍ୟନ୍ତ ଅନ୍ତର୍ଜାତୀୟ ବିମାନବନ୍ଦର ବନ୍ଦ ରହିବ ବୋଲି ମରିସସ ବିମାନବନ୍ଦର ଘୋଷଣା କରିଛି। ମଙ୍ଗଳବାର ରାତିରେ ସାମୁଦ୍ରିକ ଝଡ଼ ଲ୍ୟାଣ୍ଡଫଲ୍ କରିବ ବୋଲି ଆଶା କରାଯାଉଛି।
