ଅହମଦାବାଦ,୯ ।୧୦: ଗୁଜରାଟ ବିଧାନସଭା ନିର୍ବାଚନକୁ ନେଇ ଏବେଠାରୁ ରାଜନୀତି ହେଲାଣି ସରଗରମ । କଂଗ୍ରେସ ଦଳ ଭାରତୀୟ ଜନତା ପାର୍ଟି(ଭାଜପା)କୁ ଟକ୍କର ଦେବାକୁ ଖୁବ୍ ପ୍ରଚାର କଲାଣି । ଏହାସହ ଉଭୟ ଦଳ ପରସ୍ପରକୁ ଟାର୍ଗେଟ କରିବାକୁ ବି ଭୁଲୁ ନାହାନ୍ତି । ଏହାରି ଭିତରେ ଶନିବାର ନବସାରି ଜିଲାର ଖେରଗାମ ଅଞ୍ଚଳରେ କେତେଜଣ ଅଜ୍ଞାତ ବ୍ୟକ୍ତି କଂଗ୍ରେସ ବିଧାୟକ ଅନନ୍ତ ପଟେଲଙ୍କୁ ଆକ୍ରମଣ କରିଥିବା ସୂଚନା ମିଳିଛି । ଏହି ଆକ୍ରମଣରେ ତାଙ୍କ ଆଖିରେ ଗଭିର ଆଘାତ ଲାଗିଛି । ଏହାସହ ତାଙ୍କ ଗାଡି ଉପରକୁ ବି ପଥର ମାଡ କରାଯାଇଛି ।
କଂଗ୍ରେସ ବିଧାୟକ ତଥା ଆଦିବାସୀ ନେତା ଅନନ୍ତ ପଟେଲଙ୍କ ସମର୍ଥନରେ ଶନିବାର ରାତି ପର୍ଯ୍ୟନ୍ତ ପ୍ରଦର୍ଶନକାରୀ ବିରୋଧ ପ୍ରଦର୍ଶନ କରିଥିବା ଦେଖାଯାଇଛି । ଏମାନେ ଗୋଟିଏ ଦୋକାନରେ ନିଆଁ ଲଗାଇ ଦେଇଛନ୍ତି ଓ ଘଟଣାସ୍ଥଳରେ ପହଞ୍ଚିଥିବା ଦମକଳ ଗାଡିକୁ ବି ଭଙ୍ଗାରୁଜା କରିଛନ୍ତି । ଏହାକୁ ନେଇ ଅନନ୍ତ ପଟେଲ କହିଛନ୍ତି, ଯେତେବେଳେ ସେ ନବସାରୀର ଖେରଗାମରେ ଏକ ସଭା ପାଇଁ ପହଞ୍ଚିଥିଲେ ଜିଲା ପଞ୍ଚାୟତର ମୁଖିଆ ଓ ତାଙ୍କର ଗୁଣ୍ଡାମାନେ ମୋ ଉପରେ ଆକ୍ରମଣ କରିଥିଲେ । ମୁଁ ଜଣେ ଆଦିବାସୀ ହୋଇଥିବାରୁ ସେ ଏହାକୁ ଗ୍ରହଣ କରିବେ ନାହିଁ ଅର୍ଥାତ୍ ଜଣେ ଆଦିବାସୀ ନେତାଙ୍କୁ ସେମାନେ ଗ୍ରହଣ କରିବେ ନାହିଁ ବୋଲି କହିଥିଲେ । ଏହି ଆକ୍ରମଣ ପରେ ଅନନ୍ତ ପଟେଲ ଧାରଣାରେ ବସିଛନ୍ତି ।
