ଭୁବନେଶ୍ୱର,୨୪।୭: ୧୯୮୦ ଦଶକର କଥା। ସେତେବେଳେ ଜଣେ କୁଖ୍ୟାତ ଅପରାଧି ଥିଲେ ରବୀନ୍ଦ୍ର ବେହେରା। ତାଙ୍କର ଅପରାଧର ଶାଖା ମେଲାଇଥିଲେ ଟିଟୋ, ହାଇଦର ଏବଂ ସୁଲେମାନ। ଏମାନଙ୍କ ନାମ ଶୁଣିଲେ ଥରୁଥିଲା କେନ୍ଦ୍ରାପଡ଼ାରୁ କଟକ। ରବୀନ୍ଦ୍ରଙ୍କ କଳାକାରନାମା ଜାଣିବା ପରେ ଟିଟୋ, ହାଇଦର ଏବଂ ସୁଲେମାନ ମିଶି ରବୀନ୍ଦ୍ରଙ୍କୁ ରାସ୍ତାରୁ ହଟାଇ ଦେଇଥିଲେ। ତା’ପରେ ଟିଟୋ ସାଜିଥିଲା ଗ୍ୟାଙ୍ଗ ଲିଡର। ୨୦୦୯ ପର୍ଯ୍ୟନ୍ତ ସବୁ କିଛି ଠିକ୍ ଥିଲା। ସେହି ବର୍ଷ ସେମାନଙ୍କ ମଧ୍ୟରେ ବିବାଦ ଦେଖାଦେବାରୁ ସୁଲେମାନଙ୍କୁ ହତ୍ୟା କରିଥିଲେ ଟିଟୋ ଏବଂ ହାଇଦର।
ପରେ ଦୁହେଁ ନିଜ ନିଜର ପିଲାଙ୍କୁ ଧରି ଅଲଗା ହୋଇଯାଇଥିଲେ। ୧୯୯୧ରେ କେନ୍ଦ୍ରାପଡ଼ା କୋର୍ଟ ପରିସରରେ ବୁଲା ସେଠୀ ନାମକ ଜଣେ ଅପରାଧୀକୁ ଗୁଳିକରି ହତ୍ୟା କରିଥିଲା ହାଇଦାର । ୧୯୯୭ରେ ହାଇଦର ପୋଲିସ ଗୁଳିରେ ଆହତ ହୋଇଥିଲା। ଏହି ଘଟଣାର ୮ ବର୍ଷ ପରେ ୨୦୦୫ରେ ସୁଲେମାନର ସାନ ଭାଇ ସେଖ ଚୁନାଙ୍କୁ ହତ୍ୟା କରିଥିଲେ ହାଇଦର। ଏହି ମାମଲାରେ ତାଙ୍କୁ ଆଜୀବନ କାରାଦଣ୍ଡ ହୋଇଥିଲା।
ଜେଲରେ ଥିଲା ବେଳେ ମଧ୍ୟ ସକ୍ରିୟ ଥିଲା ହାଇଦର ଗ୍ୟାଙ୍ଗ। ୨୦୦୭ରେ କେନ୍ଦୁଝର ଖଣି ବ୍ୟବସାୟୀ ରଶ୍ମିରଞ୍ଜନ ମହାପାତ୍ର ଏବଂ ତାଙ୍କ ଡ୍ରାଇଭରକୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିଲା। ୨ କୋଟି ଟଙ୍କା ଲାଞ୍ଚ ମାଗିବା ପରେ ରଶ୍ମିରଞ୍ଜନ ୧.୧୨ କୋଟି ଟଙ୍କା ଦେଇଥିଲେ। ତଥାପି ତାଙ୍କୁ ହତ୍ୟାକରି ପୋଡି ଦିଆଯାଇଥିଲା। ଏହି ମାମଲାରେ ୨୦୧୫ରେ ତାଙ୍କୁ ଆଜୀବନ କାରାଦଣ୍ଡାଦେଶ ହୋଇଥିଲା । ସେବେଠାରୁ ସେ ଜେଲରେ ଥିଲେ।
