ଆଜିର ବ୍ୟସ୍ତବହୁଳ ଜୀବନଚର୍ଯ୍ୟା ମଧ୍ୟରେ ନିଜର ଯତ୍ନ(ସେଲ୍ଫ କେୟାର) ଅତ୍ୟନ୍ତ ଜରୁରୀ। କାରଣ ଯେତେବେଳେ ଆମେ ନିଜର ଯତ୍ନ ନେଉନା, ସେତେବେଳେ ଧୀରେ ଧୀରେ ଥକାପଣ, ଚିଡ଼ଚିଡ଼ ହେବା ଏବଂ ଟେନସନ ଆଦି ଆମର ଜୀବନର ଅଂଶ ହୋଇଯାଏ। ରୋଜଗାରର ଭାଗଦୌଡ଼ରେ ଯଦି ଆମେ ନିଜ ମନ ଓ ଶରୀରକୁ ବିଶ୍ରାମ ନ ଦେବା, ତେବେ କାମ ଠିକରେ କରିପାରିବା ନାହିଁ। ସେଲ୍ଫ କେୟାର ଆମକୁ ଭିତରୁ ମଜବୁତ କରେ। କଠିନ ପରିସ୍ଥିତିରେ ମଧ୍ୟ ଆମକୁ ସନ୍ତୁଳନ ବଜାୟ ରଖିବାରେ ସାହାଯ୍ୟ କରେ। ଯେତେବେଳେ ଆମେ ନିଜକୁ ସମୟ ଦେବା, ତେବେ ହିଁ ଜୀବନକୁ ଭଲ ଭାବରେ ଜିଇଁପାରିବା। ତେଣୁ ଯଦି ଆପଣ ମଧ୍ୟ ୨୦୨୬ ବର୍ଷରେ ସେଲ୍ଫ କେୟାରର ପ୍ରତିଜ୍ଞା ନେଇଛନ୍ତି, ତେବେ ଆମଠାରୁ କିଛି ସ୍ବତନ୍ତ୍ର ଟିପ୍ସ ନେଇପାରିବେ।
ଦିନର ଆରମ୍ଭ:
ସକାଳେ ଉଠିବା ମାତ୍ରେ ଫୋନ ଦେଖିବା ବଦଳରେ ୧୦ରୁ ୧୫ ମିନିଟ ନିଜ ପାଇଁ ବାହାର କରନ୍ତୁ। ହାଲୁକା ଷ୍ଟ୍ରେଚିଙ୍ଗ, ବୁଲିବା କିମ୍ବା ଚୁପ ବସି ଗଭୀର ନିଃଶ୍ୱାସ ନେବା ଭଳି କିଛି ବି ଚଳିବ। ଏହାଦ୍ୱାରା ଦିନର ଆରମ୍ଭ ଶାନ୍ତ ମନରେ ହୁଏ ଏବଂ ପୁରା ଦିନ ଭଲରେ ଯାଏ।
ଡିଜିଟାଲ ବାଲାନ୍ସ ବଜାୟ ରଖନ୍ତୁ:
୨୦୨୬ରେ ସ୍କ୍ରିନ୍ରୁ ବଞ୍ଚିବା କଷ୍ଟକର, କିନ୍ତୁ ସନ୍ତୁଳନ ଗଢ଼ିବା ସମ୍ଭବ। ଦିନରେ କିଛି ସମୟ ଏପରି ରଖନ୍ତୁ ଯେତେବେଳେ ଆପଣ ମୋବାଇଲ, ଲ୍ୟାପଟପ କିମ୍ବା ସୋସିଆଲ ମିଡିଆରୁ ଦୂରେଇ ରହିବେ। ଖାଦ୍ୟ ଖାଉଥିବା ସମୟରେ ଫୋନ ଦେଖନ୍ତୁ ନାହିଁ ଏବଂ ଶୋଇବା ପୂର୍ବରୁ ସ୍କ୍ରିନ ଟାଇମ କମ କରନ୍ତୁ। ଏହି ଛୋଟ ଅଭ୍ୟାସ ମନକୁ ବହୁତ ଆରାମ ଦେଇଥାଏ।
ନିଜ ଶରୀରର କଥା ଶୁଣନ୍ତୁ:
ସେଲ୍ଫ କେୟାରର ଏକ ବଡ଼ ଅଂଶ ହେଉଛି ଶରୀରର ଆବଶ୍ୟକତାଗୁଡ଼ିକ ବୁଝିବା। ସମୟରେ ଖାଦ୍ୟ ଖାଇବା, ପର୍ଯ୍ୟାପ୍ତ ପାଣି ପିଇବା ଏବଂ ପୂରା ନିଦ ନେବା ବହୁତ ଜରୁରୀ। ଫିଟ ରହିବା ପାଇଁ ଘଣ୍ଟା ଘଣ୍ଟା ଜିମ ଯିବା ଜରୁରୀ ନୁହେଁ, ରୋଜ ୨୦ରୁ ୩୦ ମିନିଟ ବୁଲିବା କିମ୍ବା ହାଲୁକା ବ୍ୟାୟାମ ମଧ୍ୟ ଯଥେଷ୍ଟ।
ମନର ଭାବନାଗୁଡ଼ିକୁ ଦବାନ୍ତୁ ନାହିଁ:
ଆମେ ପ୍ରାୟତଃ ସବୁ ଠିକ ଅଛି କହି ନିଜ ଭାବନାଗୁଡ଼ିକୁ ଅବହେଳା କରିଦେଉ। କିନ୍ତୁ ସେଲ୍ଫ କେୟାରର ଅର୍ଥ ହେଉଛି ନିଜର ଖୁସି, ଦୁଃଖ, ରାଗ, ସବୁକୁ ଗ୍ରହଣ କରିବା। ଯଦି ମନ ଭାରି ଲାଗେ ତେବେ କୌଣସି ବିଶ୍ୱସ୍ତ ବ୍ୟକ୍ତି ସହିତ କଥା କହନ୍ତୁ କିମ୍ବା ନିଜ କଥାଗୁଡ଼ିକ ଲେଖି ରଖନ୍ତୁ। ଏହା ମନକୁ ହାଲୁକା କରିଥାଏ।
ନିଜକୁ ଅନ୍ୟମାନଙ୍କ ସହିତ ତୁଳନା କରିବା ବନ୍ଦ କରନ୍ତୁ:
ସୋସିଆଲ ମିଡିଆରେ ଅନ୍ୟମାନଙ୍କର ଜୀବନ ପରଫେକ୍ଟ ଲାଗିପାରେ, କିନ୍ତୁ ବାସ୍ତବତା ଭିନ୍ନ ହୋଇଥାଏ। ୨୦୨୬ରେ ସବୁଠାରୁ ଜରୁରୀ ସେଲ୍ଫ କେୟାର ହେଉଛି, ନିଜକୁ ଅନ୍ୟମାନଙ୍କ ସହିତ ତୁଳନା ନ କରିବା। ଆପଣଙ୍କର ଗତି, ଆପଣଙ୍କର ଯାତ୍ରା ଅଲଗା। ଏହା ସଂପୂର୍ଣ୍ଣ ରୂପେ ଠିକ।
