ନୂଆଦିଲ୍ଲୀ,୧୩।୯: ଯଦି ଆପଣ ନିଜ ବାଇକ୍କୁ ଅନ୍ୟ ସହରକୁ ପଠାଇବାକୁ ଚାହୁଁଛନ୍ତି, ତେବେ ଭାରତୀୟ ରେଳବାଇ ଏକ ସୁରକ୍ଷିତ ଓ ଶସ୍ତା ବିକଳ୍ପ ହୋଇପାରେ। ରେଳବାଇ ପାର୍ସଲ ସେବା ଜରିଆରେ ଆପଣ ସହଜରେ ବାଇକ୍କୁ ଗୋଟିଏ ସହରରୁ ଅନ୍ୟ ସହରକୁ ପଠାଇ ପାରିବେ। ଉଦାହରଣ ସ୍ବରୂପ, ଆପଣ ଭୋପାଳରୁ ଦିଲ୍ଲୀକୁ ନିଜ ବାଇକ ସହଜରେ ପଠାଇପାରିବେ। ଏଥିଲାଗି କେବଳ ଆବଶ୍ୟକ ହେଉଛି ସଠିକ ଡ଼କ୍ୟୁମେଣ୍ଟ ଓ ପ୍ୟାକିଂ ପ୍ରକ୍ରିୟା।ଆସନ୍ତୁ ଜାଣିବା:
୧. ବାଇକ ପଠାଇବା ପାଇଁ ଆବଶ୍ୟକ ଡ଼କ୍ୟୁମେଣ୍ଟ:
ବାଇକ୍କୁ ରେଳବାଇ ପାର୍ସଲ କିମ୍ବା ଲଗେଜ ଭାବେ ପଠାଇବା ପାଇଁ ଆପଣଙ୍କ ପାଖରେ ନିମ୍ନଲିଖିତ ଡ଼କ୍ୟୁମେଣ୍ଟ ଥିବା ଜରୁରୀ:
– ଆର୍ସି (ରେଜିଷ୍ଟ୍ରେସନ ସାର୍ଟିଫିକେଟ)
– ଇନସୁରାନ୍ସ ପେପର
– ବୈଧ ପରିଚୟପତ୍ର
ଏହି ଡ଼କ୍ୟୁମେଣ୍ଟ ବିନା ବାଇକ ବୁକିଂ ହୋଇପାରିବ ନାହିଁ। ବାଇକ୍ର ଓଜନ, ମଡେଲ ଓ ଅନ୍ୟ ଆବଶ୍ୟକ ତଥ୍ୟ ରେକର୍ଡ କରାଯାଇ ଏକ ରସିଦ ପ୍ରଦାନ କରାଯାଏ, ଯାହାକୁ ଗନ୍ତବ୍ୟ ଷ୍ଟେସନରେ ବାଇକ ଗ୍ରହଣ କରିବା ପାଇଁ ଦେଖାଇବାକୁ ପଡ଼ିବ। ଏହି ରସିଦକୁ ସୁରକ୍ଷିତ ରଖିବା ଅତ୍ୟନ୍ତ ଜରୁରୀ।
୨. ପ୍ୟାକିଂ ନିୟମ:
ବାଇକ ପଠାଇବା ପୂର୍ବରୁ ଏହାର ସଠିକ ପ୍ୟାକିଂ କରାଯିବା ଆବଶ୍ୟକ। ସାଧାରଣତଃ ରେଳବାଇ ଷ୍ଟେସନରେ ପ୍ୟାକିଂ ସୁବିଧା ଉପଲବ୍ଧ ଥାଏ। ବାଇକ୍ର ହ୍ୟାଣ୍ଡେଲ, ଫୁଟରେଷ୍ଟ ଓ ଅନ୍ୟ ଅଂଶକୁ ସୁରକ୍ଷିତ ରଖିବା ପାଇଁ ବୋରା କିମ୍ବା କାର୍ଡବୋର୍ଡ ବ୍ୟବହାର କରାଯାଏ। ଆପଣ ପାର୍ସଲ ଅଫିସରେ ପ୍ରାୟ ୫୦୦-୧୦୦୦ ଟଙ୍କା ଦେଇ ବାଇକ୍ର ପ୍ୟାକିଂ କରାଇପାରିବେ। ନଚେତ ଆପଣ ନିଜେ ମଧ୍ୟ ପ୍ୟାକିଂ କରିପାରିବେ। ଏହା ସହ ବାଇକ୍ର ପେଟ୍ରୋଲ ଟ୍ୟାଙ୍କକୁ ପ୍ରାୟ ପୂରା ଖାଲି କରିବାକୁ ପଡ଼ିବ।
୩. ପାର୍ସଲ ଓ ଲଗେଜରେ ପାର୍ଥକ୍ୟ:
ଯଦି ଆପଣ ସେହି ଟ୍ରେନରେ ଯାତ୍ରା କରୁଛନ୍ତି, ତେବେ ବାଇକ୍କୁ ଲଗେଜ ଭାବେ ବୁକ କରାଯାଇପାରିବ, ଯାହା ସେହି ଟ୍ରେନର ପାର୍ସଲ ଭ୍ୟାନରେ ଯିବ। କିନ୍ତୁ ଯଦି ଆପଣ ସାଙ୍ଗରେ ଯାଉନାହାନ୍ତି, ତେବେ ବାଇକ୍କୁ ପାର୍ସଲ ଭାବେ ବୁକ କରାଯିବ, ଯାହା ରେଳବାଇ ର୍ନିଦ୍ଦିଷ୍ଟ ସମୟରେ ଗନ୍ତବ୍ୟକୁ ପହଞ୍ଚାଇବ।
୪. ଶୁଳ୍କ ଓ ରସିଦ
ବାଇକ ପଠାଇବାର ଶୁଳ୍କ ଦୂରତ୍ୱ ଓ ଓଜନ ଉପରେ ନିର୍ଭରର କରେ। ସାଧାରଣତଃ ୫୦୦ରୁ ୧୫୦୦ ଟଙ୍କା ପର୍ଯ୍ୟନ୍ତ ଖର୍ଚ୍ଚ ହୋଇପାରେ। ପେମେଣ୍ଟ ପରେ ଆପଣଙ୍କୁ ପାର୍ସଲ ରସିଦ କିମ୍ବା ଲଗେଜ ଟିକେଟ ମିଳିବ, ଯାହାକୁ ଗନ୍ତବ୍ୟ ଷ୍ଟେସନରେ ଦେଖାଇ ବାଇକ ଗ୍ରହଣ କରିବାକୁ ହେବ।
୫. ବାଇକ ଗ୍ରହଣ ପ୍ରକ୍ରିୟା:
ଗନ୍ତବ୍ୟ ଷ୍ଟେସନରେ ପହଞ୍ଚିବା ପରେ ରିସିଭରଙ୍କୁ ପାର୍ସଲ ରସିଦ ଓ ପରିଚୟପତ୍ର ଦେଖାଇବାକୁ ପଡ଼ିବ। ରେଳବାଇ କର୍ମଚାରୀ ଯାଞ୍ଚ ପରେ ବାଇକ ହସ୍ତାନ୍ତର କରିବେ। ଯଦି ପ୍ୟାକିଂରେ କୌଣସି କ୍ଷତି ଦେଖାଯାଏ, ତୁରନ୍ତ ଷ୍ଟେସନ ମାଷ୍ଟରଙ୍କ ନିକଟରେ ଅଭିଯୋଗ ଦାୟର କରାଯାଇପାରିବ। ଏହାଛଡ଼ା, ବାଇକ ପହଞ୍ଚିବା ପରେ ଯଦି ଆପଣ କିଛି ଦିନ ମଧ୍ୟରେ ଏହା ଗ୍ରହଣ ନକରନ୍ତି, ତେବେ ଆପଣଙ୍କୁ ଜରିମାନା ଦେବାକୁ ପଡ଼ିବ, ଯାହା ଦିନ ଓ ଘଣ୍ଟା ହିସାବରେ ୨୦୦ରୁ ୫୦୦ ଟଙ୍କା ପର୍ଯ୍ୟନ୍ତ ହୋଇପାରେ।
ତେଣୁ, ଭାରତୀୟ ରେଳବାଇର ପାର୍ସଲ ସେବା ବ୍ୟବହାର କରି ଆପଣ ସୁରକ୍ଷିତ ଓ ସୁଲଭ ଭାବେ ନିଜ ବାଇକ୍କୁୁ ଅନ୍ୟ ସହରକୁ ପଠାଇପାରିବେ।
