ଭୂକମ୍ପ ନାଁ ଶୁଣିଲେ ମନରେ ଅଜଣା ଭୟ ଜାଗିଉଠେ। ଭୂକମ୍ପ ଆସିଲେ ଲୋକେ ହଡ଼ବଡ଼େଇ ଯାଇଥାନ୍ତି। ତେଣୁ ଏହି ସମୟରେ ଲୋକେ କ’ଣ କରିବେ ନ କରିବେ ଚିନ୍ତା କରିପାରନ୍ତି ନାହିଁ। ବିଳମ୍ବ ଯୋଗୁ ଅନେକ ଜୀବନ ହାନି ହୋଇଥାଏ। କିନ୍ତୁ ଭୂକମ୍ପ ସମୟରେ କିଛି ସାବଧାନତା ଅବଲମ୍ବନ କଲେ ନିଜର ଜୀବନ ରକ୍ଷା ହେବା ସହ ଅନ୍ୟମାନଙ୍କର ମଧ୍ୟ ଜୀବନ ରକ୍ଷା ହୋଇପାରବ।
– ଭୂକମ୍ପ ଅନୁଭୂତ ହେଲେ ସବୁଠୁ ଭଲ ଘରୁ ବାହାରକୁ ଚାଲିଯିବା ବା ଖୋଲା ପଡ଼ିଆକୁ ଚାଲିଯିବା। ମାତ୍ର ବହୁ କୋଠା ବିଶିଷ୍ଟ ଘରୁ ତ ଶ୍ରୀଘ୍ର ବାହାରି ହେବନି। ତେଣୁ ଘର ଭିତରେ ଥିବା ଯେକୌଣସି ମଜଭୁତ ଆସବାବପତ୍ର ତଳେ ହିଁ ପଶିଯାନ୍ତୁ। ଏହାଦ୍ୱାରା ମୁଣ୍ଡ ରକ୍ଷା ପାଇବା ସହ ଶରୀରର ଅନ୍ୟ ଅଙ୍ଗଗୁଡ଼ିକ ମଧ୍ୟ ସୁରକ୍ଷିତ ରହିପାରିବ।
– ଘରୁ ବାହାରି କେବେ ବି ବିଜୁଳି ଖୁଣ୍ଟ, ଟେଲିଫୋନ୍ ଖୁଣ୍ଟ କିମ୍ବା ଗଛ ତଳେ ଆଦୌ ଠିଆ ହୁଅନ୍ତୁ ନାହିଁ।
– ଭୂକମ୍ପ ହେବା କ୍ଷଣି ସଙ୍ଗେ ସଙ୍ଗେ ଟିଭି, ଫ୍ରିଜ୍ ଆଦି ବୈଦ୍ୟୁତିକ ଉପକରଣରୁ ପ୍ଲଗ୍ କାଢ଼ି ଦିଅନ୍ତୁ।
– ଥରେ ଭୂକମ୍ପ ଆସିଲେ କିଛି ଘଣ୍ଟା ପର୍ଯ୍ୟନ୍ତ ଏହା ପୁଣି ହେବାର ସମ୍ଭାବନା ରହିଥାଏ। ତେଣୁ ଯେଉଁ ସୁରକ୍ଷିତ ସ୍ଥାନରେ ରହିଥିବେ ସେଠାରେ ହିଁ କିଛି ସମୟ ରୁହନ୍ତୁ।
ସୂଚନାଯୋଗ୍ୟ, ବୁଧବାର ସକାଳେ ଆସାମର ରାଜଧାନୀ ଗୌହାଟୀରେ ଭୂକମ୍ପ ଅନୁଭୂତ ହୋଇଛି। ରିକ୍ଟର ସ୍କେଲରେ ଏହାର ତୀବ୍ରତା ୬.୪ ଥିଲା। ବର୍ତ୍ତମାନ ସୁଦ୍ଧା କୌଣସି ବଡ଼ଧରଣର କ୍ଷୟକ୍ଷତି ହୋଇଥିବା ସୂଚନା ମିଳିନାହିଁ।
