ନୂଆଦିଲ୍ଲୀ,୨୨।୪: ୧୪୦ କୋଟି କାଥୋଲିକ୍ଙ୍କର ଧର୍ମୀୟ ମୁଖ୍ୟ ଥିବା ପୋପ୍ ଫ୍ରାନ୍ସିସଙ୍କ ପରଲୋକ ପରେ ଭାଟିକାନ୍ ନେତୃତ୍ୱବିହୀନ ହୋଇଛି। ନୂଆ ନେତା ନିର୍ବାଚନ ହେବା ପର୍ଯ୍ୟନ୍ତ ଏକ ଏହା ଏକ ଅନ୍ତରାଳ ସମୟ ମଧ୍ୟରେ ଗତି କରିବ। କାମେରଲେଙ୍ଗୋ (ଭାଟିକାନ୍ର ସମ୍ପତ୍ତି ଓ ରାଜସ୍ବ ପ୍ରଶାସକ) ପ୍ରଥମେ ତାଙ୍କ ମୃତ୍ୟୁକୁ ଯାଞ୍ଚ କରିବେ। ଏଥିପାଇଁ ସେ ପୋପ୍ଙ୍କ ନାମକୁ ୩ ଥର ଡାକିବେ। ଯଦି କୌଣସି ଉତ୍ତର ନ ଆସେ ତେବେ ସେ ମୃତ ବୋଲି ଘୋଷଣା କରାଯିବ। ପୋପ୍ଙ୍କ ମୃତ୍ୟୁ ପରେ ଏକ ଛୋଟ ରୁପା ହାତୁଡ଼ିରେ ତାଙ୍କ କପାଳରେ ମୃଦୁ ଆଘାତ ଦିଆଯାଉଥିଲା। ଏହି ପରମ୍ପରାକୁ ୧୯୬୩ରେ ଉଠାଇ ଦିଆଯାଇଥିଲା। ପୋପ୍ ମୃତ୍ୟୁ ଘୋଷିତ ହେବା ପରେ କାମେରଲେଙ୍ଗୋଙ୍କ ଦ୍ୱାରା ପାପାଲ ଆପାର୍ଟମେଣ୍ଟକୁ ବନ୍ଦ କରିଦିଆଯିବ। ଏହା ପରେ ଫିସରମ୍ୟାନ୍ଙ୍କ ରିଙ୍ଗ୍ ଏବଂ ପୋପ୍ଙ୍କ ସିଲ୍କୁ ଭଙ୍ଗାଯିବାର ଆୟୋଜନ ହେବ। ଏହା ପୋପ୍ଙ୍କ ଶାସନ ଅନ୍ତର ହେବାର ପ୍ରତୀକ। ପରଲୋକର ୪ରୁ ୬ ଦିନ ମଧ୍ୟରେ ପୋପ୍ଙ୍କ ଅନ୍ତ୍ୟେଷ୍ଟିକ୍ରିୟା ଅନୁଷ୍ଠିତ ହେବ। ଏହା ପରେ ତାଙ୍କ ମରଶରୀରକୁ ସେଣ୍ଟ ପିଟର୍ସ ବାସିଲିକା କିମ୍ବା ତାଙ୍କ ପୂର୍ବ ଇଚ୍ଛା ଅନୁଯାୟୀ ଅନ୍ୟତ୍ର ସମାଧି ଦିଆଯିବା ସହ ୯ ଦିନିଆ ଶୋକ ପାଳନ ହେବ।
ପୋପ୍ଙ୍କ ମୃତ୍ୟୁରୁ ୧୫ରୁ ୨୦ ଦିନ ମଧ୍ୟରେ ପରବର୍ତ୍ତୀ ପୋପ୍ ନିର୍ବାଚନ ପ୍ରକାୟା ଆରମ୍ଭ ହେବ। ଏହି ଗୋପନ ପ୍ରକ୍ରିୟା ପାଇଁ ୮୦ ବର୍ଷରୁ କମ୍ ବୟସର କାର୍ଡିନାଲମାନେ ଭାଟିକାନ୍ରେ ଏକତ୍ର ହେବେ। ସେମାନଙ୍କୁ ସିଷ୍ଟାଇନ ଚାପେଲ୍ରେ ବନ୍ଦ କରି ରଖାଯିବା ସହ ବାହାର ଦୁନିଆ ସହ ଯୋଗାଯୋଗ ବିଚ୍ଛିନ୍ନ କରିଦିଆଯିବ। ନୂଆ ପୋପ୍ ନିର୍ବାଚନରେ ଭାରତରୁ ୪ ଜଣ କାର୍ଡିନାଲ ସାମିଲ ହେବେ। ସେମାନେ ହେଲେ ଜର୍ଜ ଜାକୋବ କୁଭାକାଡ୍, ଫିଲିପେ ନେରି ଆଣ୍ଟୋନିଓ ସେବାଷ୍ଟିଓ ଡୋ ରୋସାରିଓ ଫେରାଓ, ଆନ୍ଥାନୀ ପୂଲା ଏବଂ ବାସେଲିଓସ୍ କ୍ଲିମିସ୍ ଥୋଟ୍ଟୁଙ୍କଲ। ପ୍ରାର୍ଥୀ ଦୁଇତୃତୀୟଂଶ ସଂଖ୍ୟାଗରିଷ୍ଠତା ହାସଲ କରିବା ପର୍ଯ୍ୟନ୍ତ ସେମାନେ ଏକାଧିକ ଥର ଭୋଟ ଦେବେ। ପ୍ରତ୍ୟେକ ଭୋଟ ପରେ ବାଲଟକୁ ଜାଳିଦିଆଯିବ। ଭାଟିକାନ୍ରୁ କଳାଧୂଆଁ ଉଠିଲେ, ନିଷ୍ପତ୍ତି ହୋଇପାରି ନ ଥିବା ସଙ୍କେତ ମିଳିଥାଏ ଏବଂ ଧଳା ଧୂଆଁ ଉଠିଲେ ନୂଆ ପୋପ୍ ନିର୍ବାଚିତ ହୋଇଥିବା ଜଣାପଡ଼ିଥାଏ। ନିର୍ବାଚିତ ନୂଆ ନେତା ପୋପ୍ ପଦ ଗ୍ରହଣ କରିବାକୁ ଆନୁଷ୍ଠାନିକ ଭାବେ ରାଜି ହେବା ପରେ ନିଜ ପାଇଁ ନୂଆ ନଁା ବାଛିବାକୁ କୁହାଯିବ। ଏହା ପରେ ସେଣ୍ଟ ପିଟର୍ସ ବାସିଲିକା ବାଲ୍କୋନିରୁ ବରିଷ୍ଠ କାର୍ଡିନାଲ ଡିକନ୍ ଲାଟିନ୍ ଭାଷାରେ ‘ହାବେମସ୍ ପାପାମ୍’ (ଆମେ ପୋପ୍ ପାଇଲୁ) ବୋଲି ଘୋଷଣା କରିବେ। ସେଣ୍ଟ ପିଟର୍ସ ସ୍କୋୟାରରେ ନୂଆ ପୋପ୍ ଲୋକମାନଙ୍କୁ ଅଭିନନ୍ଦନ ଜଣାଇବେ ଓ ପ୍ରଥମ ଆର୍ଶୀବାଦ ଦେବେ।
