ବାଲୁଚିସ୍ତାନ,୧୧ା୯: ଆଫଗାନିସ୍ତାନରେ ୨୦୨୨ରେ ତାଲିବାନ ଅଫିମ ଚାଷ ଉପରେ କଟକଣା ପରେ ପାକିସ୍ତାନ ବିଶ୍ୱର ନୂଆ ଅଫିମ କେନ୍ଦ୍ର ଭାବେ ଉଭା ହୋଇଛି। ଦି ଟେଲିଗ୍ରାଫ ରିପୋର୍ଟ ଅନୁସାରେ, ବାଲୁଚିସ୍ତାନରେ ବିସ୍ତୀର୍ଣ୍ଣ ପୋପି କ୍ଷେତ୍ର ଦେଖାଯାଇଛି, ଯାହା ପୂର୍ବରୁ ଆଫଗାନିସ୍ତାନର ୮୦% ଅଫିମ ଉତ୍ପାଦନକୁ ଅତିକ୍ରମ କରିଛି। ଯାହା ବର୍ତମାନ ଭାରତ ପାଇଁ ଚିନ୍ତାର କାରଣ ପାଲଟିଛି, କାରଣ ଏହାର ହେରୋଇନ ଭାରତରେ ପହଞ୍ଚିବା ସହ ନାର୍କୋ-ଅର୍ଥ ଆତଙ୍କବାଦୀ କାର୍ଯ୍ୟକଳାପକୁ ଅର୍ଥ ଯୋଗାଇପାରେ।
ଆଫଗାନ ଚାଷୀମାନେ ସୌରଶକ୍ତିଚାଳିତ କୂଅ ବ୍ୟବହାର କରି ବାଲୁଚିସ୍ତାନରେ ପୋପି ଚାଷ କରୁଛନ୍ତି, ଯାହା ସ୍ଥାନୀୟ ବାଲୋଚ ଚାଷୀଙ୍କ ସହ ଭାଗଚାଷ କିମ୍ବା ଜମି ଭଡ଼ା ନେଇ କରାଯାଉଛି। ଏହି ଅଞ୍ଚଳରେ ଇସଲାମିକ ଷ୍ଟେଟ ଓ ବାଲୁଚିସ୍ତାନ ଲିବରେସନ ଆର୍ମୀ ଭଳି ଆତଙ୍କବାଦୀ ଗୋଷ୍ଠୀ ସକ୍ରିୟ, ଯେଉଁମାନେ ଏହି ଲାଭରୁ ଅର୍ଥ ପାଉଛନ୍ତି। ବିଶେଷଜ୍ଞ ଡେଭିଡ ମାନସଫିଲ୍ଡ କହିଛନ୍ତି, ୨୦୨୫ରେ ପାକିସ୍ତାନର ଅଫିମ ଉତ୍ପାଦନ ଆଫଗାନିସ୍ତାନକୁ ବହୁଗୁଣ ଅତିକ୍ରମ କରିବ।
ଏହି ଅଫିମ ବାଣିଜ୍ୟ ଦକ୍ଷିଣ-ପଶ୍ଚିମ ଏସିଆରେ ମାଦକ ଶିଳ୍ପକୁ ପୁନର୍ଗଠନ କରିପାରେ, ଯାହା ଭାରତ ଓ ୟୁରୋପ ପର୍ଯ୍ୟନ୍ତ ପ୍ରଭାବ ପକାଇବ। ଆମେରିକୀୟ କୂଟନୀତିଜ୍ଞ ଜାଲମେ ଖଲିଲଜାଦ ଏହାକୁ “ଆତଙ୍କବାଦୀ ଓ ଅପରାଧୀ ଗୋଷ୍ଠୀଙ୍କ ପାଇଁ ଅର୍ଥ ଯୋଗାଣ ଓ ମାଦକ ଆସକ୍ତିର ବିପଦ” ଭାବେ ବର୍ଣ୍ଣନା କରି ପାକିସ୍ତାନର ଏହାକୁ ନିୟନ୍ତ୍ରଣ ପାଇଁ ଯୋଜନା ଉପରେ ପ୍ରଶ୍ନ ଉଠାଇଛନ୍ତି।
