ନୂଆଦିଲ୍ଲୀ,୨୭।୧୨: ଦେଶର ପୂର୍ବତନ ପ୍ରଧାନମନ୍ତ୍ରୀ ତଥା କଂଗ୍ରେସର ବରିଷ୍ଠ ନେତା ଡ. ମନମୋହନ ସିଂଙ୍କର ଗତକାଲି ଅର୍ଥାତ ଗୁରୁବାର ରାତିରେ ଦେହାନ୍ତ ହୋଇଛି। ତାଙ୍କୁ ୯୨ବର୍ଷ ହୋଇଥିଲା। ତାଙ୍କ ସ୍ବାସ୍ଥ୍ୟ ଅବସ୍ଥା ଖରାପ ହେବା ପରେ ତାଙ୍କୁ ଦିଲ୍ଲୀର ଏମ୍ସରେ ଭର୍ତ୍ତି କରାଯାଇଥିଲା, ଯେଉଁଠାରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ। ମନମୋହନ ସିଂଙ୍କ ମୃତ୍ୟୁକୁ ଏମ୍ସ ନିଶ୍ଚିତ କରିଛି। ୨୦୦୪ରୁ ୨୦୧୪ ପର୍ଯ୍ୟନ୍ତ କଂଗ୍ରେସ ନେତୃତ୍ୱାଧୀନ ୟୁପିଏ ସରକାରରେ ମନମୋହନ ସିଂ ଦୁଇଥର ଦେଶର ପ୍ରଧାନମନ୍ତ୍ରୀ ଥିଲେ। ଏହି ସମୟ ମଧ୍ୟରେ ସେ ଦେଶର ଅର୍ଥନୀତିକୁ ବୃଦ୍ଧି କରିବା ପାଇଁ କାର୍ଯ୍ୟ କରିଥିଲେ। ତେବେ ପ୍ରଧାନମନ୍ତ୍ରୀ ପଦ ଛାଡିବା ପରେ ସେ ସକ୍ରିୟ ରାଜନୀତିରୁ ଅଲଗା ହୋଇଯାଇଥିଲେ।
ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ଦେହାନ୍ତ ପରେ ଦେଶରେ ଶୋକର ଲହରୀ ଖେଳିଯାଇଛି। ମନମୋହନଙ୍କ ବିଷୟରେ ସମସ୍ତ ତଥ୍ୟ ସୋସିଆଲ ମିଡିଆରେ ଶେୟାର କରାଯାଉଛି। ଏହି ସମୟରେ ମନମୋହନ ସିଂଙ୍କ ସହ ଜଡିତ ସମସ୍ତ ତଥ୍ୟ ଇଣ୍ଟରନେଟରେ ଖୋଜାଯାଉଛି। ଗୁଗୁଲରେ ଖୋଜାଯାଉଥିବା ସୂଚନା ମଧ୍ୟରେ ତାଙ୍କ ରାଜନୈତିକ ଯାତ୍ରା, ତାଙ୍କ ପରିବାର ଏବଂ ସମ୍ପତ୍ତି ସର୍ବାଧିକ ଖୋଜା ଚାଲିଛି। ପରିବାର ବିଷୟରେ କହିଲେ ମନମୋହନ ସିଂ ତାଙ୍କ ପଛରେ ପତ୍ନୀ ଗୁରୁଶରଣ କୌର ଏବଂ ତିନି ଝିଇଙ୍କୁ ଛାଡିଛନ୍ତି। ଏକ ମିଡିଆ ରିପୋର୍ଟ ଅନୁଯାୟୀ ତାଙ୍କ ମୋଟ ସମ୍ପତ୍ତି ୧୫ କୋଟି ୭୭ଲକ୍ଷ ଟଙ୍କା ରହିଛି। ୨୦୧୯ରେ ରାଜ୍ୟ ସଭା ନିର୍ବାଚନ ସମୟରେ ଦିଆଯାଇଥିବା ଆଫିଡେଭିଟ ଅନୁଯାୟୀ ଦିଲ୍ଲୀ ଏବଂ ଚଣ୍ଡିଗଡ଼ରେ ତାଙ୍କର ଗୋଟିଏ ଗୋଟିଏ ଫ୍ଲାଟ ଅଛି। ତାଙ୍କ ପାଖରେ ୭କୋଟି ୭୨ ଲକ୍ଷ ୫୪ ହଜାର ୩୭୦ ଟଙ୍କା ଥିଲା।
ଏହା ବ୍ୟତୀତ ମନମୋହନ ସିଂଙ୍କ ପାଖରେ ୧୨ଲକ୍ଷ ୭୬ ହଜାର ଟଙ୍କା ଏନଏଏସ ଏବଂ ଡାକ ସଞ୍ଚୟ ଯୋଜନା ଥିଲା। ପୂର୍ବତନ ପ୍ରଧାନମନ୍ତ୍ରୀଙ୍କ ପାଖରେ ୩ ଲକ୍ଷ ୮୬ହଜାର ୫୦୦ଟଙ୍କା ମୂଲ୍ୟର ଅଳଙ୍କାର ଥିବା କୁହାଯାଉଛି। ଏହା ସହିତ, ୨୦୧୩ରେ ଦିଆଯାଇଥିବା ଆଫିଡେଭିଟ ଅନୁଯାୟୀ, ତାଙ୍କର ଏକ ମାରୁତି ୮୦୦ କାର୍ ଥିଲା । ୧୧ ବର୍ଷ ପୂର୍ବେ ଦିଲ୍ଲୀ ଏବଂ ଚଣ୍ଡିଗଡ଼ରେ ଫ୍ଲାଟର ମୂଲ୍ୟ ପ୍ରାୟ ୮ କୋଟି ଟଙ୍କା ଥିଲା। ତାଙ୍କ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ ଆକାଉଣ୍ଟରେ ୩.୪୬ କୋଟି ଟଙ୍କା ଜମା ଏବଂ ପୁଞ୍ଜି ବିନିଯୋଗ ହୋଇଥିଲା।
