ଟୋକିଓରେ ଅଲିମ୍ପିକ୍ସ-୨୦୨୦ ଜାରି ରହିଛି। ଚଳିତ ବର୍ଷ ଜୁଲାଇ ୨୩ରୁ ଆରମ୍ଭ ହୋଇଥିବା ଏହି ପ୍ରତିଯୋଗିତା ଅଗଷ୍ଟ ୮ ଯାଏ ଚାଲିବ। ଏଥିରେ ଚାଇନା ପାଖାପାଖି ୭୫ ପଦକ ଜିତିଥିବା ବେଳେ ସେଥିରେ ୩୪ ସ୍ବର୍ଣ୍ଣ ରହିଛି। ସେହିଭଳି ଭାରତ ପଦକ ତାଲିକାରେ ୬୫ତମ ସ୍ଥାନରେ ରହିଛି। ଏଯାବତ ୫ ମେଡାଲ ନିଜ ନାମରେ କରିଛି ଭାରତ। ସେଥିରେ ୨ ରୋପ୍ୟ ଏବଂ ୩ ବ୍ରୋଞ୍ଚ ରହିଛି।
ପ୍ରତି ୪ ବର୍ଷରେ ଥରେ ଏହି ଅଲିମ୍ପିକ୍ ଅନୁଷ୍ଠିତ ହୋଇଥାଏ। ସାରା ବିଶ୍ୱରୁ ସର୍ବଶ୍ରେଷ୍ଠ ଖେଳାଳିମାନେ ଏହି ଅଲିମ୍ପିକ୍ସରେ ଭାଗ ନେବାକୁ ଆସିଥାନ୍ତି। ବିଜେତାମାନଙ୍କୁ ପୁରସ୍କାରସ୍ବରୂପ ସ୍ବର୍ଣ୍ଣ, ରୋପ୍ୟ, ବ୍ରୋଞ୍ଚ ପଦକ ମିଳିଥାଏ। ଆସନ୍ତୁ ଜାଣିବା ଏହି ପଦକ ବିଷୟରେ…
-ପ୍ରତିଥର ଡିଜାଇନ୍ ବଦଳିଥାଏ: ଟୋକିଓ ଗେମ୍ସ ପାଇଁ ପଦକଗୁଡ଼ିକୁ ଜାପାନର ଡିଜାଇନର ଜୁନିଚି କାଓ୍ବାନିସି ଡିଜାଇନ୍ କରିଥାନ୍ତି। ଏହି ପଦକରେ ଅଲିମ୍ପିକ୍ର ପ୍ରତୀକସହ ବିଜୟର ଗ୍ରିକ୍ ଦେବୀ ନାଇକିଙ୍କ ଚିତ୍ର ରହିଥାଏ। ଚଳିତ ଥର ଜାପାନର ପାଖାପାଖି ୬.୨୧ ମିଲିୟନ ଇଲେକ୍ଟ୍ରୋନିକ୍ ଉପକରଣକୁ ଏକତ୍ରିତ କରି ଧାତୁମାନଙ୍କର ରିସାଇକେଲ୍ କରାଯାଇ ପଦକ ଗୁଡ଼ିକୁ ନିର୍ମାଣ କରାଯାଇଛି।
-ପଦକର ବିଶେଷତା: ସ୍ବର୍ଣ୍ଣ, ରୋପ୍ୟ, ବ୍ରୋଞ୍ଚ ପଦକର ବ୍ୟାସ ପାଖାପାଖି ୮୫ ସେମି। ସେହିଭଳି ମେଡାଲଟି ୭.୭ ମିମିରୁ ୧୨.୧ ମିମି ମୋଟା ରହିଥାଏ।
-ସ୍ବର୍ଣ୍ଣ ପଦକରେ କେତେ ସୁନା ଥାଏ: ଅଲିମ୍ପିକ୍ ଖେଳର ପ୍ରତ୍ୟେକ ଫାଇନାଲ ମୁକାବିଲାରେ ବିଜେତା ଟିମ୍କୁ ସ୍ବର୍ଣ୍ଣ ପଦକ ମିଳିଥାଏ। ହେଲେ କ’ଣ ଆପଣ ଜାଣନ୍ତି ପଦକରେ ନାମମାତ୍ରକୁ ସୁନା ରହିଥାଏ। ବାସ୍ତବରେ ଶୁଦ୍ଧ ଚାନ୍ଦି ଉପରେ ସୁନାର ପ୍ରଲେପ ଦିଆଯାଇ ଏହାକୁ ପ୍ରସ୍ତୁତ କରାଯାଇଥାଏ। ମେଡାଲର ଓଜନ ୫୫୬ ଗ୍ରାମ ଥିଲେ ହେଁ ସେଥିରେ ୬ ଗ୍ରାମର ସୁନା ଥାଏ। ସେହିଭଳି ରୋପ୍ୟ ପଦକରେ ଓଜନ ପାଖାପାଖଇ ୫୫୦ ଗ୍ରାମ ଥାଏ। ଏଥିରେ ଶୁଦ୍ଧ ଚାନ୍ଦି ରହିଥାଏ। ବ୍ରୋଞ୍ଚ ପଦକରେ କପର୍ ଏବଂ ଜିଙ୍କ୍କୁ ମିଶାଯାଇଥାଏ। ଏଥିରେ ୯୫% କପର ଥିବା ବେଳେ ୫% ଜିଙ୍କ ଥାଏ।
-ପଦକର ମୂଲ୍ୟ କେତେ: ଏବେର ବଜାର ଦର ଅନୁଯାୟୀ ଯଦି ପଦକଗୁଡ଼ିକୁ ତରଳାଇ ଦିଆଯାଏ ତେବେ ସ୍ବର୍ଣ୍ଣ ପଦକର ମୂଲ୍ୟ ୮୦୦ ଡଲାର ଅର୍ଥାତ ୫୯୩୧୯ ଟଙ୍କା ହେବ। ସେହିଭଳି ରୌପ୍ୟ ଏବଂ ବ୍ରୋଞ୍ଚ ପଦକର ମୂଲ୍ୟ କ୍ରମଶଃ ୪୫୦ ଏବଂ ୫ ଡଲାର ହେବ। ହେଲେ ତରଳାଇବାଠାରୁ ସାମାନ୍ୟ ପଦକର ମୂଲ୍ୟ ଅଧିକ ଥାଏ।
