ବଲାଙ୍ଗୀର, ୨୦।୯ (ବୀରେନ୍ଦ୍ର କୁମାର ଝାଙ୍କର): ବଲାଙ୍ଗୀର-ସୋନପୁର ଜାତୀୟ ରାଜପଥର ଗିରିଗୋବର୍ଦ୍ଧନ ନିକଟରେ ଥିବା ଏକ ହୋଟେଲ ଏବଂ ଜାତୀୟ ରାଜପଥରେ ଜଣେ ଯୁବକ ମଙ୍ଗଳବାର ଅପରାହ୍ନ ପ୍ରାୟ ୫ଟାରେ ବନ୍ଧୁକ ଧରି ଆତଙ୍କ ସୃଷ୍ଟି କରିଥିଲେ। ହୋଟେଲର କାଚ, ଆସବାବପତ୍ର ଭଙ୍ଗାରୁଜା କରିବା ସହ ଗୁଳି ଫୁଟାଇଥିଲେ। ଏହାପରେ ଜାତୀୟ ରାଜପଥରେ ଯାଉଥିବା ଲୋକଙ୍କୁ ବନ୍ଧୁକ ଦେଖାଇ ଭୟଭୀତ କରିଥିବା ଅଭିଯୋଗ ହୋଇଛି। ତେବେ ବଲାଙ୍ଗୀର ପୋଲିସ ସମ୍ପୃକ୍ତ ଯୁବକଙ୍କୁ ଗିରଫ କରିଛି। ଗିରଫ ଯୁବକ ବଲାଙ୍ଗୀର ବେହେରାପାଲିର ରାଜୁ ମାଝି ବୋଲି ପୋଲିସ ସୂଚନା ଦେଇଛି।
ହୋଟେଲ ଭିତରେ ରାଜୁ ଗୁଳି ଫୁଟାଇ କର୍ମଚାରୀଙ୍କୁ ଭୟଭୀତ କରିଥିଲେ। ଏଭଳି ଏକ ଅଭାବନୀୟ ପରିସ୍ଥିତି ଦେଖି ହୋଟେଲ କର୍ମଚାରୀ ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚତ୍ବା ପରେ ମଧ୍ୟ ଯୁବକ ବନ୍ଧୁକ ଧରି ଆତଙ୍କ ସୃଷ୍ଟିକରି ଚାଲିଥିଲେ। ହୋଟେଲରୁ ୮ହଜାର ଟଙ୍କା ମଧ୍ୟ ନେଇଯାଇଥିବା ହୋଟେଲ ଲିଜ୍ ନେଇଥିବା ସନ୍ଦୀପ ନନ୍ଦ ଅଭିଯୋଗ କରିଛନ୍ତି। ଏହାପରେ ହୋଟେଲରୁ ବାହାରି ଜାତୀୟ ରାଜପଥରେ ଲୋକଙ୍କୁ ଭୟଭୀତ କରିଥିଲେ। ବୁଧବାର ନୂଆଖାଇ ତିହାର ଥିବାରୁ ରାସ୍ତାଘାଟରେ ଭିଡ଼ ପରିଲକ୍ଷିତ ହୋଇଥିଲା। ବନ୍ଧୁକଧାରୀ ଯୁବକଙ୍କୁ ଦେଖି ଲୋକେ ଭୟଭୀତ ହୋଇପଡିଥିଲେ। ବନ୍ଧୁକଧାରୀ ଯୁବକ ସାମ୍ନାପଟରୁ ଆସୁଥିବା ଏକ ବୋଲେରୋ ଗାଡ଼ିକୁ ଅଟକାଇ ଡ୍ରାଇଭରଙ୍କୁ ବନ୍ଧୁକ ଦେଖାଇ ଭୟଭୀତ କରିଥିଲେ। ଡ୍ରାଇଭରଙ୍କୁ ଗାଡି ବୁଲାଇ ବେହେରାପାଲି ଅଭିମୁଖେ ଯିବାକୁ ନିର୍ଦ୍ଦେଶ ଦେଇ ଉକ୍ତ ବୋଲେରୋରେ ବସି ପଡ଼ିଥିଲେ। ଭୟଭୀତ ଡ୍ରାଇଭର ଗାଡ଼ି ବୁଲାଇ ବେହେରାପାଲି ଅଭିମୁଖେ ଯିବାବେଳେ ପୋଲିସ ଟିମ୍ ଉକ୍ତ ଗାଡ଼ିକୁ ଅଟକାଇ ବନ୍ଧୁକଧାରୀ ଯୁବକଙ୍କୁ କାବୁ କରିନେଇଥିଲେ ବୋଲି ବଲାଙ୍ଗୀର ଏସ୍ଡିପିଓ ତୋଫାନ୍ ବାଗ ସୂଚନା ଦେଇଛନ୍ତି। ରାଜୁ ଉକ୍ତ ହୋଟେଲ ମାଲିକ ବିଷ୍ଣୁ ପତିଙ୍କ ଡ୍ରାଇଭର ଭାବେ ପୂର୍ବରୁ କାମ କରୁଥିବା ପୋଲିସ ସୂଚନା ଦେଇଛି। କେଉଁ କାରଣରୁ ସେ ବନ୍ଧୁକ ଧରି ଏଭଳି କାଣ୍ଡ ଭିଆଇଲେ ସେନେଇ ତଦନ୍ତ ଜାରି ରହିଛି ବୋଲି ଏସ୍ଡିପିଓ ବାଗ କହିଛନ୍ତି। ଯୁବକଙ୍କ ପାଖରୁ ବନ୍ଧୁକ ଜବତ କରାଯାଇଥିବା ସେ କହିଛନ୍ତି। ତେବେ ଯୁବକ ଗୁଳି ଫୁଟାଇଛନ୍ତି କି ନାହିଁ ସେନେଇ ତଦନ୍ତ କରାଯାଉଛି ବୋଲି ସେ କହିଛନ୍ତି।
