ପରଜଙ୍ଗ, ୨।୬(ଡି.ଏନ.ଏ.) – କରୋନା ମହାମାରୀ ସମୟରେ ସ୍ବାସ୍ଥ୍ୟସେବାର ଗୁରୁତ୍ୱ ଅନେକାଂଶରେ ବଢ଼ିଯାଇଛି। ଜରୁରିକାଳୀନ ସମୟରେ ହାତପାହାନ୍ତାରେ ସ୍ବାସ୍ଥ୍ୟସେବା ଉପଲବ୍ଧ କରାଇବା ଗୁରୁତ୍ୱପୂର୍ଣ୍ଣ ପ୍ରସଙ୍ଗ ପାଲଟିଛି। ଆଦିବାସୀ ଅଧ୍ୟୁଷିତ ଅଞ୍ଚଳର ରୋଗୀଙ୍କୁ ଉନ୍ନତମାନର ଚିକିତ୍ସା ସୁବିଧା ଯୋଗାଇଦେବାକୁ ସରକାର ଗୁରୁତ୍ୱ ଦେଉଛନ୍ତି। ହେଲେ ଢେଙ୍କାନାଳ ଜିଲାର ପଛୁଆ ଅଞ୍ଚଳ ଭାବେ ପରିଚିତ କଙ୍କଡ଼ାହାଡ଼ ବ୍ଲକର ମହାବିରୋଡ ପ୍ରାଥମିକ ଡାକ୍ତରଖାନାରେ ଏହାର ଓଲଟା ଚିତ୍ର ଦେଖିବାକୁ ମିଳିଛି। ଏଠାରେ ଭଙ୍ଗା ଦଦରା ଘରେ ସ୍ବାସ୍ଥ୍ୟକେନ୍ଦ୍ର ଚାଲିଛି। ଦୀର୍ଘଦିନ ହେଲା ଡାକ୍ତର ପଦବୀ ଖାଲିପଡ଼ିଛି। ନର୍ସ ଏବଂ ଫାର୍ମାସିଷ୍ଟଙ୍କ କାନ୍ଧରେ ହସ୍ପିଟାଲର ସମସ୍ତ ଦାୟିତ୍ୱ ନ୍ୟସ୍ତ କରାଯାଇଥିବାବେଳେ ରୋଗୀମାନେ ବିଶେଷଜ୍ଞ ଡାକ୍ତରଙ୍କ ଅଭାବ ଅନୁଭବ କରୁଛନ୍ତି, ଯାହାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି।
କଙ୍କଡ଼ାହାଡ଼ ବ୍ଲକବାସୀଙ୍କୁ ଚିକିତ୍ସା ସେବା ଯୋଗାଇଦେବାକୁ ୧୯୭୨ରେ ସ୍ଥାପିତ ହୋଇଥିଲା ମହାବିରୋଡ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର। ଏହି ଡାକ୍ତରଖାନା ଉପରେ ବ୍ଲକର ୨୫ ହଜାର ଜନସାଧାରଣ ନିର୍ଭରଶୀଳ। ହେଲେ ମରାମତି ଅଭାବରୁ ସ୍ବାସ୍ଥ୍ୟକେନ୍ଦ୍ର କୋଠା ଜରାଜୀର୍ଣ୍ଣ ହୋଇଗଲାଣି। ଅନେକ ଦିନ ହେଲା ଡାକ୍ତର ପଦବୀ ଖାଲି ପଡ଼ିଛି। ୨ଜଣ ନର୍ସ, ଜଣେ ଫାର୍ମାସିଷ୍ଟ ଏବେ ସମସ୍ତ ଦାୟିତ୍ୱ ତୁଲାଉଛନ୍ତି। ଆମ୍ବୁଲାନ୍ସ ଓ ଆବଶ୍ୟକ ଉପକରଣ ନ ଥିବାରୁ ରୋଗୀମାନେ ଅସୁବିଧାରେ ପଡୁଛନ୍ତି। ଦୁର୍ଘଟଣାରେ ଗୁରୁତର, ଗର୍ଭବତୀଙ୍କୁ ପ୍ରାଥମିକ ଚିକିତ୍ସା ପରେ ଅନ୍ୟତ୍ର ପଠାଇ ଦିଆଯାଉଛି। ସେମାନେ ଖର୍ଚ୍ଚାନ୍ତ ହୋଇ ପରଜଙ୍ଗ, ତାଳଚେର, ପାଲଲହଡ଼ା ଏବଂ ଢେଙ୍କାନାଳ ଯିବାକୁ ବାଧ୍ୟ ହେଉଛନ୍ତି। ଅନ୍ୟପଟେ ରୋଗୀଙ୍କ ମୃତ୍ୟୁ ଘଟିଲେ କିମ୍ବା ଅପମୃତ୍ୟୁ ମାମଲାରେ ମୃତଦେହ ବ୍ୟବଚ୍ଛେଦ ଲାଗି ସୁବିଧା ନ ଥିବାରୁ ଶବ ଦୀର୍ଘ ସମୟ ପଡ଼ିରହୁଛି। ମହାବିରୋଡ ଡାକ୍ତରଖାନାରେ ଡାକ୍ତର ନିଯୁକ୍ତି ଏବଂ ଅନ୍ୟାନ୍ୟ ଆନୁଷଙ୍ଗିକ ଉପକରଣ ପ୍ରଦାନ ଦାବିରେ କିଛିଦିନ ତଳେ ଅଞ୍ଚଳର ବୁଦ୍ଧିଜୀବୀମାନେ ଆନ୍ଦୋଳନ କରିଥିଲେ। ଏହା ସତ୍ତ୍ୱେ ସରକାର କିମ୍ବା ସ୍ବାସ୍ଥ୍ୟ ବିଭାଗ ଏଥିପ୍ରତି ଗୁରୁତ୍ୱ ଦେଉ ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି।
ଏ ସଂକ୍ରାନ୍ତରେ ଫାର୍ମାସିଷ୍ଟ ମୁନିରାମ ମୁର୍ମୁ କୁହନ୍ତି, ଡାକ୍ତରଖାନାରେ ୨ ଜଣ ଷ୍ଟାଫ୍ନର୍ସ, ଜଣେ ଫାର୍ମାସିଷ୍ଟ, ନାଇଟ୍ ଓ୍ବାଚର, ସୁଇପର ଏବଂ ଆଟେଣ୍ଡାଣ୍ଟଙ୍କୁ ମିଶାଇ ମୋଟ ୮ ଜଣ କର୍ମଚାରୀ ଅଛନ୍ତି। ଆସୁଥିବା ରୋଗୀଙ୍କୁ ଠିକ୍ ଭାବେ ସେବା ଯୋଗାଇ ଦିଆଯାଉଛି। ଅନ୍ୟପଟେ ଏ ନେଇ ସିଡିଏମ୍ଓଙ୍କୁ ଯୋଗାଯୋଗ କରିବାକୁ ଉଦ୍ୟମ କରାଯାଇଥିଲେ ମଧ୍ୟ ତାଙ୍କର ପ୍ରତିକ୍ରିୟା ମିଳିପାରି ନାହିଁ। ତୁରନ୍ତ ଡାକ୍ତରଖାନାର ନବକଳେବର ସହିତ ଡାକ୍ତର ନିଯୁକ୍ତ କରିବାକୁ ବୁଦ୍ଧିଜୀବୀମାନେ ଦାବି କରିଛନ୍ତି।
