ଜଳେଶ୍ୱର,୭ା୧(ଡି.ଏନ.ଏ.): ବାଲେଶ୍ୱର ଜିଲାରେ ଆମ ହସ୍ପିଟାଲ ଯୋଜନାରେ ପ୍ରଥମ ପର୍ଯ୍ୟାୟରେ ୫ଟି ଡାକ୍ତରଖାନାକୁ ସାମିଲ କରାଯାଇଛି। ଶୁକ୍ରବାର ଜିଲାପାଳ ଜିକେ ଭଟ୍ଟର ହସ୍ପିଟାଲ ପରିଦର୍ଶନରେ ଆସି ପୁରୁଣା ଗୃହରୁ ନୂତନ ଭାବେ ତିଆରି ହୋଇଥିବା ମାତୃ ଓ ଶିଶୁ ମଙ୍ଗଳ ଗୃହକୁ ସ୍ଥାନାନ୍ତର ହେବ ବୋଲି କହିଛନ୍ତି ା
ଡାକ୍ତରଖାନାଗୁଡିକର ରୂପାନ୍ତରୀକରଣ ଲାଗି ସ୍ବାସ୍ଥ୍ୟବିଭାଗକୁ ୫ଟିରେ ସାମିଲ କରାଯାଇଛି ା ଏଥିରେ ଜିଲାପାଳମାନଙ୍କୁ ଦାୟିତ୍ୱ ଦିଆଯାଇଛି। ବାଲେଶ୍ୱର ଜିଲାପାଳ ଦତ୍ତାତ୍ରେୟ ଭାଉସାହେବ ଶିନ୍ଦେ ଜିକେଭଟ୍ଟର ହସ୍ପିଟାଲରେ ପହଞ୍ଚି ପରିଦର୍ଶନ କରିଛନ୍ତି ା ଏଣିକି ପୁରୁଣା ଡାକ୍ତରଖାନାରେ ରୋଗୀ ଚିକିତ୍ସା ନ ହୋଇ ନିକଟରେ ଥିବା ମାତୃ ଓ ଶିଶୁ ମଙ୍ଗଳ ନୂତନ କୋଠାଘରେ ସମସ୍ତ ଚିକିତ୍ସା କରାଯିବା ଲାଗି ଜିଲାପାଳ ନିର୍ଦ୍ଦେଶ ଦେଇଛନ୍ତି ା ପୂର୍ବରୁ ଥିବା ଫାଟକ ବନ୍ଦ କରାଯାଇ ନୂତନ ଗୃହ ପର୍ଯ୍ୟନ୍ତ ଥିବା ରାସ୍ତାକୁ ପ୍ରଧାନ ରାସ୍ତାକୁ ସମ୍ପ୍ରସାରଣ କରାଯିବ। ଏଥିଲାଗି ପୂର୍ତ୍ତ ବିଭାଗର ୫୭ ରାଜ୍ୟ ରାଜପଥ କଡରେ ଥିବା ଦୋକାନୀମାନଙ୍କୁ ଉଚ୍ଛେଦ କରାଯିବାକୁ ତହସିଲଦାର ମିହିର ରଞ୍ଜନ ବେହେରାଙ୍କୁ ନିର୍ଦ୍ଦେଶ ଦେଇଛନ୍ତି ା ନୂତନ କୋଠଘରେ ସ୍ବଚ୍ଛତା, ରୋଗୀଙ୍କ ଚିକିତ୍ସା ବ୍ୟବସ୍ଥା, ଡାକ୍ତର ଓ ନର୍ସମାନଙ୍କ ଲାଗି ସ୍ବତନ୍ତ୍ର କୋଠରୀ ବ୍ୟବସ୍ଥା, ପ୍ରସୂତି ଗୃହ, ଶୌଚାଳୟ, ପିଇବା ପାଣି, ବିଦ୍ୟୁତୀକରଣ, ଶୀତତାପ ନିୟନ୍ତ୍ରଣ ବ୍ୟବସ୍ଥା, ଆଧୁନିକ ଯନ୍ତ୍ରପାତି ସଂଯୋଗ, ସର୍ବୋପରି ଡାକ୍ତର ପଦବୀ ପୂରଣ ହେବ ବୋଲି ଜିଲାପାଳ କହିଛନ୍ତି ା ଶୃଙ୍ଖଳିତ ଭାବେ ଘରୋଇ ଓ ସରକାରୀ ଆମ୍ବୁଲାନ୍ସ ରହିବା ବ୍ୟବସ୍ଥା, ରୋଗୀଙ୍କ ସମ୍ପକୀୟଙ୍କ ଲାଗି ପ୍ରେକ୍ଷାଳୟ ବ୍ୟବସ୍ଥା କରିବାକୁ ସେ ସିଡିଏମ୍ଓ ଦୁଲାଲସେନ୍ ଜଗଦେବଙ୍କୁ ନିର୍ଦ୍ଦେଶ ଦେଇଛନ୍ତି ା ପରିଦର୍ଶନ ବେଳେ ବିଡିଓ ପୁନମ ରାଉତ, ଡିପିଏମ୍ ଅନୀଲ କୁମାର ମହାନ୍ତି, ଭାରପ୍ରାପ୍ତ ଡାକ୍ତର ବିନୋଦ ପ୍ରଧାନ, ବନମାଳୀ ଜେନା ଓ ଶଶିକାନ୍ତ ଜେନା ପ୍ରମୁଖ ଉପସ୍ଥିତ ଥିଲେ ା ବାଲେଶ୍ୱର ଜିଲାର ପ୍ରଥମ ପର୍ଯ୍ୟାୟରେ ଜଳେଶ୍ୱର, ବସ୍ତା, ସୋର, ନୀଳଗିରି ଓ ବାଲେଶ୍ୱର ଡିଡିଏଚ୍ ଡାକ୍ତରଖାନାକୁ ଫାଷ୍ଟ ରେଫେରାଲ ୟୁନିଟ୍ ଭାବେ ଗ୍ରହଣ କରାଯାଇଥିବାରୁ ଏହାର ସମସ୍ତ ଉନ୍ନତୀକରଣ ହେବ ବୋଲି ଜଣାଯାଇଛି ା
