ବନ୍ତ,୨୨।୪(କିଶୋର କୁମାର ସେଠୀ): ଭଦ୍ରକ ଜିଲା ବନ୍ତ ବ୍ଲକ ସମ୍ମୁଖରେ ଥିବା ଏକ ବାଉଁଶ ବଣରେ ବୁଧବାର ଏକ ଭୟାବହ ଅଗ୍ନିକାଣ୍ଡ ଘଟିଯାଇଛି। ଏହି ଅଗ୍ନିକାଣ୍ଡରେ ସ୍ଥାନୀୟ ସୌମିତ୍ରୀ ମଲ୍ଲିକଙ୍କ ବାଉଁଶ ବଣ ସମ୍ପୂର୍ଣ୍ଣ ରୂପେ ପ୍ରଭାବିତ ହୋଇଥିବା ବେଳେ ପ୍ରାୟ ୫୦୦ରୁ ଅଧିକ ମୂଲ୍ୟବାନ ବାଉଁଶ ପୋଡ଼ି ପାଉଁଶ ହୋଇଯାଇଛି।
ସୂଚନା ଅନୁଯାୟୀ, ବୁଧବାର ପୂର୍ବାହ୍ନ ପ୍ରାୟ ୧୧.୩୦ ସମୟରେ ବାଉଁଶ ବଣରେ ହଠାତ୍ ନିଆଁ ଲାଗିଥିବା ଦେଖିବାକୁ ମିଳିଥିଲା। ଖରା ଦିନ ହୋଇଥିବାରୁ ନିଆଁ ଅତି ଶୀଘ୍ର ଚାରିଆଡ଼କୁ ବ୍ୟାପିବାରେ ଲାଗିଥିଲା।ଖବର ପାଇ ପ୍ରଥମେ ଆଗରପଡ଼ା ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁ ଲିଭାଇବା କାର୍ଯ୍ୟ ଆରମ୍ଭ କରିଥିଲେ। ମାତ୍ର ନିଆଁର ଭୟାବହତା ଅଧିକ ଥିବାରୁ ଆଗରପଡ଼ା ଏବଂ ହାଟଡିହି ଦମକଳ ବାହିନୀର ମୋଟ ୪ଟି ଟିମ୍ ଏହି ଅପରେସନରେ ସାମିଲ ହୋଇଥିଲେ। ଦୀର୍ଘ ୭ ଘଣ୍ଟାର କଠିନ ପରିଶ୍ରମ ପରେ, ଅର୍ଥାତ ସନ୍ଧ୍ୟା ପ୍ରାୟ ୭ଟାରେ ନିଆଁକୁ ସମ୍ପୂର୍ଣ୍ଣ ଭାବେ ଆୟତ୍ତ କରାଯାଇଥିଲା।ଦମକଳ ବାହିନୀର ତ୍ୱରିତ ପଦକ୍ଷେପ ଯୋଗୁଁ ନିକଟରେ ଥିବା ବସତିକୁ ନିଆଁ ବ୍ୟାପି ପାରି ନ ଥିଲା, ଯାହାଫଳରେ ଏକ ବଡ଼ ଧରଣର ବିପଦ ଟଳିଯାଇଛି l ତେବେ ଏହି ଅଗ୍ନିକାଣ୍ଡ କେଉଁ କାରଣରୁ ଘଟିଲା, ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇନାହିଁ। କେହି ଦୁର୍ବୃତ୍ତ ନିଆଁ ଲଗାଇ ଦେଇଛନ୍ତି କିମ୍ବା ଅନ୍ୟ କୌଣସି କାରଣରୁ ଏହି ଅଘଟଣ ଘଟିଲା, ସେ ନେଇ ଅନୁସନ୍ଧାନ ଜାରି ରହିଛି ।