ଜୟପୁର, ୨୨।୫ : ପାକିସ୍ତାନୀ ମହିଳା ଏଜେଣ୍ଟଙ୍କ ହନି ଟ୍ରାପ୍ରେ ପଡ଼ି ଦେଶର ଗୁପ୍ତ ସୂଚନା ଦେଇଥିବା ଅଭିଯୋଗରେ ଭାରତୀୟ ଯବାନଙ୍କୁ ଗିରଫ କରାଯାଇଛି। ରାଜସ୍ଥାନ ପୋଲିସ ଯବାନଙ୍କ ଗିରଫଦାରୀ ସମ୍ପର୍କରେ ସୂଚନା ପ୍ରଦାନ କରିଛନ୍ତି। ରାଜସ୍ଥାନ ପୋଲିସ କହିଛି ଯେ ପାକିସ୍ତାନୀ ଗୁପ୍ତଚର ଏଜେନ୍ସିରେ କାର୍ଯ୍ୟ କରୁଥିବା ଜଣେ ମହିଳା ଏଜେଣ୍ଟଙ୍କୁ ଗୁପ୍ତ ସୂଚନା ଲିକ ଅଭିଯୋଗରେ ଯବାନଙ୍କୁ ଗିରଫ କରାଯାଇଛି। ପୋଲିସ କହିଛି ଯେ ଭାରତୀୟ ସେନା ଯବାନଙ୍କ ନାମ ପ୍ରଦୀପ କୁମାର ବୋଲି ଜଣାପଡିଛି।
ରାଜସ୍ଥାନ ପୋଲିସର ମହାନିର୍ଦ୍ଦେଶକ (ଇଣ୍ଟେଲିଜେନ୍ସ) ଉମେଶ ମିଶ୍ର ଏକ ବିବୃତ୍ତିରେ କହିଛନ୍ତି ଯେ ପାକିସ୍ତାନୀ ଗୁପ୍ତଚର ଏଜେନ୍ସିରେ କାର୍ଯ୍ୟ କରୁଥିବା ଜଣେ ମହିଳା ଏଜେଣ୍ଟଙ୍କ ନିକଟରେ ସୂଚନା ଲିକ କରିବା କାରଣରୁ ରାଜସ୍ଥାନ ପୋଲିସ ଯୋଧପୁରରେ ଏକ ଅତ୍ୟଧିକ ସମ୍ବେଦନଶୀଳ ରେଜିମେଣ୍ଟରେ ପୋଷ୍ଟ ହୋଇଥିବା ଭାରତୀୟ ସେନା ଯବାନଙ୍କୁ ଗିରଫ କରିଛି। ପୋଲିସର ସୂଚନାନୁସାରେ, ପ୍ରଦୀପଙ୍କୁ ଯୋଧପୁରରେ ଭାରତୀୟ ସେନାର ଅତ୍ୟଧିକ ସମ୍ବେଦନଶୀଳ ରେଜିମେଣ୍ଟରେ ପୋଷ୍ଟ କରାଯାଇଥିଲା।
ସୋସିଆଲ ମିଡିଆ ମାଧ୍ୟମରେ ମହିଳା ଏଜେଣ୍ଟଙ୍କ ସହ ସେ ନିରନ୍ତର ସମ୍ପର୍କରେ ରହିଥିଲେ ଏବଂ ରଣନୈତିକ ଗୁରୁତ୍ୱପୂର୍ଣ୍ଣ ସୂଚନା ତାଙ୍କୁ ଦେଇଥିଲେ। ପୋଲିସ ଏକ ପ୍ରେସ ବିବୃତ୍ତିରେ କହିଛି ଯେ ସେନା ଯବାନଙ୍କୁ ଗିରଫ ପରେ ପୋଲିସ ହେପାଜତରେ ପଚରାଉଚରା ମେ ୧୮ ତାରିଖ ଅପରାହ୍ନରେ ଆରମ୍ଭ ହୋଇଥିଲା। ପ୍ରାୟ ଛଅ-ସାତ ମାସ ପୂର୍ବେ ଅଭିଯୁକ୍ତଙ୍କ ମୋବାଇଲ ଫୋନରେ ଉକ୍ତ ମହିଳାଙ୍କଠାରୁ ଏକ କଲ ଆସିଥିଲା। ଏହା ପରେ ହ୍ବାଟସ ଆପ୍ ଚାଟ, ଭଏସ କଲ ଏବଂ ଭିଡିଓ କଲ ମାଧ୍ୟମରେ ଉଭୟ ପରସ୍ପର ସହ କଥା ହେବା ଆରମ୍ଭ କରିଥିଲେ।
ପରିଚୟ ସମୟରେ ମହିଳା ଜଣକ ନିଜକୁ ମଧ୍ୟପ୍ରଦେଶ ଗୋୱାଲିଅରର ବାସିନ୍ଦା ବୋଲି କହିଥିଲେ। ସେ ବିବାହର ବାହାନା କରି ଭାରତୀୟ ସେନା ସମ୍ବନ୍ଧୀୟ ଗୁପ୍ତ ସୂଚନା ସମ୍ପର୍କରେ କଥାରେ କଥାରେ ଅଭିଯୁକ୍ତ ଯବାନଙ୍କୁ ପଚାରିଥିଲେ। ପୋଲିସ କହିଛି ଯେ ଅଭିଯୁକ୍ତ ତାଙ୍କ କାର୍ଯ୍ୟାଳୟରୁ ସେନାର ଗୁପ୍ତ କାଗଜପତ୍ରର ଫଟୋ ଚୋରି କରି ମହିଳା ଏଜେଣ୍ଟଙ୍କ ନିକଟକୁ ପଠାଇଥିଲେ। ଏହି ମାମଲା ନିଶ୍ଚିତ ହେବାପରେ, ଅଫିସିଆଲ ସିକ୍ରେଟ ଆକ୍ଟ, ୧୯୨୩ ଅନୁଯାୟୀ ଅଭିଯୁକ୍ତଙ୍କ ବିରୋଧରେ ଏକ ମାମଲା ରୁଜୁ କରାଯାଇ ଗିରଫ କରାଯାଇଥିଲା।
