କେନ୍ଦୁଝର,୧୨।୭(ସ୍ବ.ପ୍ର.)-ଏକଦା କେନ୍ଦୁଝର ଓ ମୟୂରଭଞ୍ଜ ଜିଲାର ମହୁର ବିଶ୍ୱସନୀୟତା ବାହାରେ ଅଧିକ ରହିଥିଲା। ଏହି ଜିଲାରେ ପ୍ରଚୁର ପରିମାଣରେ ମହୁ ଉତ୍ପାଦନ ହେଉଥିଲା। ପ୍ରାକୃତିକ ପରିବେଶରେ ବଣଜଙ୍ଗଲରେ ମହୁମାଛି ଫେଣା କରୁଥିଲେ। ବିଭିନ୍ନ ପ୍ରକାରର ଫୁଲରୁ ମଧୁ ସଂଗ୍ରହ କରି ଏହି ଫେଣା ପ୍ରସ୍ତୁତ କରୁଥିଲେ। ବନବାସୀମାନେ ଏହି ମହୁଫେଣାରୁ ମହୁ ସଂଗ୍ରହ କରି ଘରେ ଘରେ ତଥା ହାଟବଜାରରେ ବିକ୍ରି କରୁଥିଲେ ଓ ଜୀବନଜୀବିକା ନିର୍ବାହ କରୁଥିଲେ।
ତେବେ କିଛି ବର୍ଷ ହେଲା ବ୍ୟାପକ ଜଙ୍ଗଲ କ୍ଷୟ, ଜଳବାୟୁରେ ପରିବର୍ତ୍ତନ ଯୋଗୁ ମହୁ ଉତ୍ପାଦନ କମିଯାଇଛି। ବନବାସୀମାନେ ଆଉ ସେଭଳି ମହୁ ସଂଗ୍ରହ କରିପାରୁନାହାନ୍ତି। ଏବେ ପ୍ରାୟତଃ ଦେଶୀ ମହୁ ମିଳିବା କଷ୍ଟକର ହେଉଥିବାରୁ ଲୋକେ ବାହାର କମ୍ପାନୀ ମହୁ ଉପରେ ନିର୍ଭର କରିଥାନ୍ତି। ଏପରିକି କବିରାଜ ମାନେ ମଧ୍ୟ ଔଷଧ ପ୍ରସ୍ତୁତ କରିବା ପାଇଁ ଆବଶ୍ୟକ ମହୁ ବାହାରୁ ସଂଗ୍ରହ କରିଥାନ୍ତି। ଏଣୁ ଏହାର ଚାହିଦା ଓ ଆବଶ୍ୟକତାକୁ ଉପଲବ୍ଧି କରି ଉଦ୍ୟାନ ବିଭାଗ ପକ୍ଷରୁ କୁଅଁର ଠାରେ ବିଭାଗୀୟ ନର୍ସରୀରେ ମହୁଚାଷ କରିବା ପାଇଁ ଏକ ଯୋଜନା ଆରମ୍ଭ କରିଥିଲେ। ତେବେ ଉପଯୁକ୍ତ ତଦାରଖ ଅଭାବରୁ ସେସବୁ ନଷ୍ଟ ହୋଇଯାଇଥିବାରୁ ସରକାରଙ୍କ ଲକ୍ଷ ଲକ୍ଷ ଟଙ୍କା ପାଣିରେ ପଡିଲା। ଅନ୍ୟ ପକ୍ଷରେ ପୁଣି ଥରେ ଅର୍ଥ ଖର୍ଚ୍ଚ କରି ପୁନରୁଦ୍ଧାର କରିବାକୁ ବିଭାଗ ପକ୍ଷରୁ ଉଦ୍ୟମ ଚାଲିଛି। ତେବେ କର୍ମଚାରୀ ଅଭାବ ଥିବାରୁ ତାହା ପୂରଣ ନ କରି ପୁନରୁଦ୍ଧାର କରାଗଲେ ପୁଣି ଥରେ ଯୋଜନାର ବିଫଳ ହେବ ବୋଲି ମତପ୍ରକାଶ ପାଉଛି।
କେନ୍ଦୁଝର ଜିଲା ଉଦ୍ୟାନ ବିଭାଗ ତିନି ବର୍ଷ ତଳେ ମହୁ ଚାଷ ପାଇଁ କୁଅଁର ଫାର୍ମରେ ୧୨୦ଟି ବାକ୍ସ ବସାଇଥିଲା। ତେବେ ଦୁଇ ବର୍ଷ ହେଲା ସେସବୁ ବାକ୍ସ କାମରେ ଲାଗୁନାହିଁ ା ବାହାରେ ଖରାବର୍ଷାରେ ନଷ୍ଟ ହେବାକୁ ବସିଛି ା ଫଳରେ ସରକାରଙ୍କ ମହତ ଯୋଜନା ଫଳପ୍ରସୂ ହୋଇପାରୁନାହିଁ ା ମହୁମାଛି ସହିତ ପ୍ରତ୍ୟେକ ମହୁବାକ୍ସର ମୂଲ୍ୟ ପ୍ରାୟ ୪୫୦୦ ଟଙ୍କା ା ଏହି ହିସାବରେ ପାଖାପାଖି ସାଢେ ୫ ଲକ୍ଷ ଟଙ୍କା ଖର୍ଚ୍ଚ ହୋଇଥିବା ସରକାରୀ ଅର୍ଥ ସବୁ ପାଣିରେ ପଡିଲା ବୋଲି ଅଭିଯୋଗ ହେଉଛି। ତେବେ କାହା ପାଇଁ ଏଭଳି ଅର୍ଥ ବରବାଦ ହେଲା ସେ ନେଇ କୌଣସି ଯାଞ୍ଚ କିମ୍ବା କାର୍ଯ୍ୟାନୁଷ୍ଠାନ ଗ୍ରହଣ ନ ହେବା ଆଲୋଚ୍ୟର ବିଷୟ ହୋଇଛି ା
ଏନେଇ ଉଦ୍ୟାନ ଉପନିର୍ଦ୍ଦେଶକ ଦାୟିତ୍ୱରେ ଥିବା ସୁକାନ୍ତ ନାୟକ କହିଛନ୍ତି ଯେ ସବୁ ମହୁ ବାକ୍ସ ନଷ୍ଟ ହୋଇଯାଇଛି। ଏହାର ପୁନରୁଦ୍ଧାର ପାଇଁ ବିଭାଗ ପକ୍ଷରୁ ପଦକ୍ଷେପ ନେବା ପାଇଁ ଉଦ୍ୟମ ଚାଲିଛି ା ତେବେ ସେ ଯେହେତୁ ସେତେବେଳେ ନ ଥିଲେ ଏଣୁ ଖର୍ଚ୍ଚ ହିସାବ ଓ ନଷ୍ଟ ହେବା କାରଣ ଜାଣିନାହାନ୍ତି।
