ଭୁବନେଶ୍ୱର, ୧୯ା୪(ବ୍ୟୁରୋ): ରାଜ୍ୟର ସମସ୍ତ ଉଚ୍ଚଶିକ୍ଷାନୁଷ୍ଠାନ ସୋମବାରଠାରୁ ବନ୍ଦ ରହିବ। କଲେଜ ଓ ବିଶ୍ୱବିଦ୍ୟାଳୟକୁ ଛାତ୍ରୀଛାତ୍ରଙ୍କ ପାଇଁ ବନ୍ଦ ଘୋଷଣା କରାଯାଇଥିବାବେଳେ ପରୀକ୍ଷାକୁ ସ୍ଥଗିତ ରଖାଯାଇଛି। ଏହା ପୂର୍ବରୁ ହଷ୍ଟେଲ ଖାଲି କରିବା ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି। ତେଣୁ ରବିବାର ସୁଦ୍ଧା ଉଚ୍ଚ ଶିକ୍ଷାନୁଷ୍ଠାନଗୁଡ଼ିକ ଖାଲି ହୋଇଛି। ବିଭିନ୍ନ ହଷ୍ଟେଲରୁ ପିଲାମାନେ ନିଜ ନିଜ ଘରକୁ ଫେରିଛନ୍ତି। ଏଥିପାଇଁ ବସ୍ଷ୍ଟାଣ୍ଡ ଓ ରେଳ ଷ୍ଟେଶନରେ ପ୍ରବଳ ଗହଳି ହୋଇଥିବା ଦେଖିବାକୁ ମିଳିଥିଲା। ତେବେ କଲେଜ ଓ ବିଶ୍ୱବିଦ୍ୟାଳୟ ଛାତ୍ରୀଛାତ୍ରଙ୍କ ପାଇଁ ବନ୍ଦ ରହୁଥିଲେ ମଧ୍ୟ ୫୦ପ୍ରତିଶତ କର୍ମଚାରୀଙ୍କୁ ନେଇ ଏସବୁ ଶିକ୍ଷାନୁଷ୍ଠାନ ଚାଲିବ। ସିଲାବସ୍ ଶେଷ କରିବା ପାଇଁ ଅନ୍ଲାଇନ୍ କ୍ଲାସ୍ କରାଯିବ। ଏ ନେଇ ଉଚ୍ଚଶିକ୍ଷା ବିଭାଗର ପ୍ରମୁଖ ସଚିବ ଶାଶ୍ୱତ ମିଶ୍ର ସମସ୍ତ ବିଶ୍ୱବିଦ୍ୟାଳୟ କୁଳପତି, ସମସ୍ତ ସରକାରୀ, ଅନୁଦାନପ୍ରାପ୍ତ ଓ ଅଣଅନୁଦାନପ୍ରାପ୍ତ କଲେଜ ଅଧ୍ୟକ୍ଷଙ୍କୁ ଚିଠି ଲେଖି ଜଣାଇଦେଇଛନ୍ତି।
ସେହିପରି ରାଜ୍ୟର ସମସ୍ତ ବୈଷୟିକ ବିଶ୍ୱବିଦ୍ୟାଳୟ, ଇଞ୍ଜିନିୟରିଂ ଓ ପ୍ରଫେଶନାଲ କଲେଜ, ଡିପ୍ଲୋମା ଇନ୍ଷ୍ଟିଚ୍ୟୁଟ୍, ଆଇଟିଆଇଗୁଡ଼ିକ ବନ୍ଦ ରହିବ। ଏ ନେଇ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ପକ୍ଷରୁ ପୂର୍ବରୁ ନିର୍ଦ୍ଦେଶନାମା ଜାରି ହୋଇଛି। ଏଥିସହ ସମସ୍ତ କ୍ଲାସ୍ ବନ୍ଦ କରାଯାଇଥିବାବେଳେ ପରୀକ୍ଷା ଓ ସିଲାବସ୍ ସାରିବା ପାଇଁ ଅନ୍ଲାଇନ୍ରେ କ୍ଲାସ୍ କରିବାକୁ କୁହାଯାଇଛି। ତେବେ ଗବେଷଣା ବା ପ୍ରୋଜେକ୍ଟ ପାଇଁ ସ୍କଲାର୍, ରିସର୍ଚ୍ଚର ଓ ଛାତ୍ରୀଛାତ୍ର ହଷ୍ଟେଲରେ ରହିପାରିବେ। କିନ୍ତୁ ଏଥିପାଇଁ କର୍ତ୍ତୃପକ୍ଷଙ୍କଠାରୁ ଅନୁମତି ଆଣିବା ନିମନ୍ତେ ବାଧ୍ୟତାମୂଳକ କରାଯାଇଛି।
