ବେଙ୍ଗାଲୁରୁ,୬ା୧୧: ମହୀଶୂର ସହରାଞ୍ଚଳ ବିକାଶ କର୍ତ୍ତୃପକ୍ଷ (ଏମ୍ୟୁଡିଏ) ଦୁର୍ନୀତି ମାମଲାରେ କର୍ନାଟକ ହାଇକୋର୍ଟ ମଙ୍ଗଳବାର ମୁଖ୍ୟମନ୍ତ୍ରୀ ସିଦ୍ଦାରାମାୟା, ତାଙ୍କ ସ୍ତ୍ରୀ ବି.ଏମ୍. ପାର୍ବତୀ, ଶାଳକ ମଲ୍ଲିକାର୍ଜୁନ ସ୍ବାମୀ, କେନ୍ଦ୍ର ସରକାର, ସିବିଆଇ, ରାଜ୍ୟ ସରକାର, ରାଜ୍ୟ ପୋଲିସ ମୁଖ୍ୟ, ଲୋକାୟୁକ୍ତ ପୋଲିସ ଓ ଅନ୍ୟମାନଙ୍କୁ ନୋଟିସ ଜାରି କରିଛନ୍ତି। ଉକ୍ତ ଦୁର୍ନୀତି ମାମଲାର ତଦନ୍ତ ଦାୟିତ୍ୱ ଲୋକାୟୁକ୍ତ ପୋଲିସଠାରୁ ନେଇ ସିବିଆଇକୁ ଦେବା ନିମନ୍ତେ ନିର୍ଦ୍ଦେଶ ଦେବା ପାଇଁ ଆବେଦନ ହୋଇଥିଲା। ଏମ୍ୟୁଡିଏ ଦୁର୍ନୀତିର ସ୍ବାଧୀନ, ନିରପେକ୍ଷ ଏବଂ ସ୍ବଚ୍ଛ ତଦନ୍ତ ଲାଗି ସାମାଜିକ କର୍ମୀ ସ୍ନେହମୟୀ କ୍ରିଷ୍ଣା ପିଟିଶନ ଦାଏର କରିଥିଲେ। ଏମ୍ୟୁଡିଏ ବେଆଇନ ଭାବେ ସିଦ୍ଦାରାମାୟାଙ୍କ ସ୍ତ୍ରୀ ପାର୍ବତୀଙ୍କୁ ୧୪ଟି ପ୍ଲଟ୍ ଆବଣ୍ଟନ କରିଥିବା ଅଭିଯୋଗ ଉପରେ ଲୋକାୟୁକ୍ତ ପୋଲିସ ତଦନ୍ତ ଚଳାଇଛି। ଦୁର୍ନୀତି ସହ ସମ୍ପୃକ୍ତ ଅଭିଯୋଗରେ ମୁଖ୍ୟମନ୍ତ୍ରୀ ସିଦ୍ଦାରାମାୟା, ତାଙ୍କ ସ୍ତ୍ରୀ ଓ ଅନ୍ୟମାନେ ତଦନ୍ତର ସମ୍ମୁଖୀନ ହାଇଛନ୍ତି।
