ବାରିପଦା ଅଫିସ, ୨୦।୨ ହାଇକୋର୍ଟ ଦୁଇ ବିଚାରପତି ଶତୃଘ୍ନ ପୂଜାହାରୀ ଓ ଦେବବ୍ରତ ଦାଶ ଶନିବାର ମୟୂରଭଞ୍ଜ ଜିଲା ବାରିପଦା ଗସ୍ତରେ ଆସି କୋର୍ଟ ଗୃହ ନିର୍ମାଣ ନେଇ ଓକିଲ ସଂଘ ସହିତ ଆଲୋଚନା କରିଛନ୍ତି ା କୋର୍ଟ ପରିସରରେ ଚାଲି ରହିଥିବା ସଂଲଗ୍ନ ସ୍ଥାନ ପାଇଁ ଓକିଲ ସଂଘ ପକ୍ଷରୁ ଆବଶ୍ୟକ କାଗଜପତ୍ର ପ୍ରଦାନ କରିବା ପରେ ନୂତନ କୋର୍ଟ ଗୃହ ନିର୍ମାଣ କରାଯିବା ନେଇ ପଦକ୍ଷେପ ଗ୍ରହଣ କରାଯିବ। ବିଚାରପତିଙ୍କ ନିର୍ଭର ପ୍ରତିଶ୍ରୁତି ପାଇବା ପରେ ସଂଘ ପକ୍ଷରୁ ଆନ୍ଦୋଳନକୁ ସ୍ଥଗିତ କରାଯିବା ସହ ଆସନ୍ତା ସୋମବାର ଓକିଲମାନେ କାର୍ଯ୍ୟରେ ଯୋଗଦେବେ ବୋଲି ଜିଲା ଓକିଲ ସଂଘ ବାରିପଦାର ସମ୍ପାଦକ ବସନ୍ତ କୁମାର ଭୋଳ ପ୍ରକାଶ କରିଛନ୍ତି ା
କୋର୍ଟ ଗୃହ ନିର୍ମାଣ ନେଇ ଓକିଲ ସଂଘ ପକ୍ଷରୁ କାର୍ଯ୍ୟବନ୍ଦ ଆନ୍ଦୋଳନ କରାଯାଇଥିଲା ା ଆଭାସୀ ମାଧ୍ୟମରେ ହାଇକୋର୍ଟ ବିଚାରପତି ଓ ଓକିଲ ସଂଘ ପକ୍ଷରୁ ଏକ ବୈଠକ ହୋଇଥିଲା। ଶନିବାର ବାରିପଦା ଗସ୍ତରେ ଯାଇ ତଦନ୍ତ ପୂର୍ବକ ସମୀକ୍ଷା କରିବା ପରେ ନିଷ୍ପତ୍ତି ନିଆଯାଇଥିଲା ା ହାଇକୋର୍ଟ ବିଚାରପତି ପୂଜାହାରୀ, ବିଚାରପତି ଦାଶ ଏବଂ ଜିଲାଜଜ୍ ପ୍ରଦୀପ କୁମାର ପଟ୍ଟନାୟକ ବାରିପଦା କୋର୍ଟ ପରିସରରେ ପହଞ୍ଚିଥିଲେ। ଆଇନଜୀବୀଙ୍କ ଗହଣରେ କୋର୍ଟ ପରିସର ପରିଦର୍ଶନ କରିଛନ୍ତି ା ପରେ ସଂଘ ସଭାଗୃହରେ ଜିଲା ଓକିଲ ସଂଘ ସଭାପତି ପ୍ରବୀର କୁମାର ବସାଙ୍କ ସମେତ ସଦସ୍ୟଙ୍କ ସହ ଆଲୋଚନା କରାଯାଇଥିଲା। ନୂତନ କୋର୍ଟ ଗୃହ କେଉଁଠାରେ ସ୍ଥାପନ କରାଯିବ ସେନେଇ କୌଣସି ନିଷ୍ପତ୍ତି ଗ୍ରହଣ କରାଯାଇନାହିଁ ବୋଲି ମୁଖ୍ୟ ବିଚାରପତି ପ୍ରକାଶ କରିଥିଲେ। ଏଡିଆର କକ୍ଷରେ ସଂଘର ପ୍ରତିନିଧି ଦଳଙ୍କ ସହ ଗୃହ ନିର୍ମାଣକୁ ନେଇ ଉପୁଜିଥିବା ସମସ୍ୟା ସମ୍ପର୍କରେ ଗୁରୁତ୍ୱାରୋପ କରାଯାଇଛି। ସଂଘ ଉପସଭାପତି ସୁଜାତା ମିଶ୍ର, ସହସମ୍ପାଦକ ସ୍ବରୂପ କୁମାର ମିଶ୍ର, ସଦସ୍ୟ କୈଳାସ ପ୍ରସାଦ ସାହୁଙ୍କ ସମେତ ସଦସ୍ୟମାନେ ଅଂଶଗ୍ରହଣ କରଛନ୍ତି।
