ଥିରୁଭାନନ୍ତପୁରମ୍, ୨୦।୨ : ସ୍ବାମୀଙ୍କ ବାରମ୍ବାର ବାରଣ ସତ୍ତ୍ୱେ ସ୍ତ୍ରୀ ନିଜ ବୟଫ୍ରେଣ୍ଡ୍ଙ୍କ ସହିତ ଲୁଚିଲୁଚି ଗପିବା ଦାମ୍ପତ୍ୟ କ୍ରୁରତା। କେରଳ ହାଇକୋର୍ଟ ଏକ ଛାଡ଼ପତ୍ର ମାମଲାର ବିଚାର କରି ଏଭଳି ରାୟ ଦେଇଛନ୍ତି। ଦମ୍ପତିଙ୍କୁ ଛାଡପତ୍ରର ଏକ ଆଦେଶ ପ୍ରଦାନ କରୁଥିବାବେଳେ କୋର୍ଟ କହିଛନ୍ତି ଯେ ଜଣେ ସ୍ତ୍ରୀ ବୟଫେଣ୍ଡ୍ଙ୍କ ସହିତ ଗୁପ୍ତ ଫୋନ କଲ କରି ବିବାହ ବନ୍ଧନର ବିରୁଦ୍ଧାଚରଣ କରିବା ସହିତ ତାଙ୍କ ସ୍ବାମୀଙ୍କ ବାରଣକୁ ଅବମାନନା କରିଛନ୍ତି। ଜଷ୍ଟିସ କାଉଜର ଏଡାପ୍ପାଗଥ୍ଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏଭଳି କହିଛନ୍ତି।
ପାରିବାରିକ ଅଦାଲତର ନିଷ୍ପତ୍ତିକୁ ଚ୍ୟାଲେଞ୍ଜ୍ କରି ସ୍ବାମୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ବିବାହ ଆରମ୍ଭରୁ ହିଁ ସ୍ତ୍ରୀ ବିଭିନ୍ନ ଅନୈତିକ କାର୍ଯ୍ୟ କରି ତାଙ୍କ ଜୀବନକୁ ଜୀବନ୍ତ ନର୍କରେ ପରିଣତ କରିଥିଲେ ବୋଲି ସ୍ବାମୀ ଅଭିଯୋଗ କରିଥିଲେ। ସେ ତାଙ୍କ ବିବାହ ପୂର୍ବରୁ ଏବଂ ତା’ପରେ ମଧ୍ୟ ବିଭିନ୍ନ ବୟଫ୍ରେଣ୍ଡ୍ଙ୍କ ସହିତ ଖରାପ ସମ୍ପର୍କ ବଜାୟ ରଖିଛନ୍ତି ବୋଲି ସ୍ବାମୀ ହାଇକୋର୍ଟରେ କରିଥିବା ଆବେଦନରେ ଉଲ୍ଲେଖ କରିଥିଲେ।
ଏନେଇ ସ୍ବାମୀଙ୍କ ଆଡଭୋକେଟ୍ ଟି.ଏମ୍. ରମଣ କାର୍ଥା ବିଏସ୍ଏନ୍ଏଲ୍ର କଲ୍ ଡିଟେଲସ୍ର ପ୍ରିଣ୍ଟଆଉଟ ମଧ୍ୟ କୋର୍ଟରେ ଉପସ୍ଥାପନ କରିଥିଲେ।
ସ୍ତ୍ରୀଙ୍କ ପକ୍ଷରୁ ହାଜର ହୋଇଥିବା ହେବାକୁ ଆଡଭୋକେଟ ଏମ୍.ବି. ସନ୍ଦୀପ୍ ଯୁକ୍ତି ଦର୍ଶାଇଥିଲେ ଯେ ସ୍ତ୍ରୀ ଅଫିସିଆଲ କଥାବାର୍ତ୍ତା କରୁଥିଲେ।
ଅଦାଲତ ଉଲ୍ଲେଖ କରିଛନ୍ତି ଯେ କେବଳ ନିୟମିତ କଲ୍ କରିବା କାରଣରୁ ସ୍ତ୍ରୀଙ୍କ ସମ୍ପର୍କକୁ ଅନୈତିକ ବୋଲି କୁହାଯାଇ ପାରିବ ନାହିଁ। ଖଣ୍ଡପୀଠ ଏହା ମଧ୍ୟ କହିଥିଲେ ଯେ ବ୍ୟଭିଚାରର ଅଭିଯୋଗକୁ ପ୍ରମାଣ କରିବା ପାଇଁ ଏକ ଉଚ୍ଚସ୍ତରର ପ୍ରମାଣ ରହିବା ଆବଶ୍ୟକ। ସ୍ବାମୀଙ୍କ ଅଭିଯୋଗ ପ୍ରମାଣ ପର୍ଯ୍ୟାପ୍ତ ନୁହେଁ।
ସ୍ତ୍ରୀଙ୍କ ଦ୍ୱାରା ବ୍ୟଭିଚାର କରିଥିବାର ପ୍ରମାଣ ଯଥେଷ୍ଟ ନୁହେଁ, ତଥାପି ଏପରି କଲ କରିବା ଦାମ୍ପତ୍ୟ ଜୀବନର ସନ୍ତୁଳନକୁ ବିଗାଡ଼ି ଦେବ। ଖଣ୍ଡପୀଠ କହିଛନ୍ତି ଯେ ବିବାହ ଆରମ୍ଭରୁ ହିଁ ଦାମ୍ପତ୍ୟ ସମ୍ପର୍କରେ ଆନ୍ତରିକତା ନ ଥିଲା। ସ୍ତ୍ରୀ-ସ୍ବାମୀ ତିନିଥର ଅଲଗା ହୋଇ ପୁଣି ଏକାଠି ହୋଇଛନ୍ତି।
ତେବେ ଅଶାନ୍ତିକୁ ଦୃଷ୍ଟିରେ ରଖି ସେମାନଙ୍କ ଛାଡ଼ପତ୍ରକୁ ମଞ୍ଜୁର କରାଯାଉଥିବା ଖଣ୍ଡପୀଠ କହିଛନ୍ତି।
