ବଲିଉଡରେ ଡ୍ରିମଗାର୍ଲ ଭାବେ ସମସ୍ତଙ୍କ ନିକଟରେ ପରିଚିତ ଅଭିନେତ୍ରୀ ହେମାମାଳିନୀ ଆଜି ୭୨ତମ ଜନ୍ମଦିନ ପାଳୁଛନ୍ତି। ୧୯୪୮ ମସିହା ଅକ୍ଟୋବର ୧୬ ତାରିଖ ଆଜିର ଦିନରେ ତାମିଲନାଡୁର ଅମାନକୁଡିରେ ଜନ୍ମ ଗ୍ରହଣ କରିଥିଲେ ହେମାମାଳିନୀ। ସେ ତାଙ୍କ ଅଭିନୟ କ୍ୟାରିୟର ମଧ୍ୟରେ ଅନେକ ସୁପରହିଟ ଫିଲ୍ମ ଦେଇଛନ୍ତି। ହେମାମାଳିନୀ ଶାସ୍ତ୍ରୀୟ ନୃତ୍ୟରେ ପାରଦର୍ଶୀ ଥିଲେ। ଭାରତନାଟ୍ୟମରୁ ସେ କୁଚିପୁଡି ଏବଂ ଓଡ଼ିଶୀ ଭଳି ସମସ୍ତ ନୃତ୍ୟରେ ପାରଙ୍ଗମ ଥିଲେ। ହେମାମାଳିନୀ ‘ସୀତା ଏବଂ ଗୀତା’ ଫିଲ୍ମ ଜରିଆରେ ବଲିଉଡ୍ରେ ପ୍ରସିଦ୍ଧି ଅର୍ଜନ କରିଥିଲେ। ସୀତା ଏବଂ ଗୀତା ଫିଲ୍ମର ସୁଟିଂ ସମୟରେ ଧର୍ମେନ୍ଦ୍ର ଏବଂ ହେମା ପରସ୍ପରର ନିକଟତର ହୋଇଥିଲେ। ଏହା ପରେ ଏହି ଯୋଡି ଅନେକ ଚଳଚ୍ଚିତ୍ରରେ ଏକାଠି କାମ କରିଥିଲେ ଏବଂ ପ୍ରାୟ ସଫଳ ଚଳଚ୍ଚିତ୍ର ଦର୍ଶକଙ୍କୁ ଭେଟି ଦେଇଥିଲେ। ଦର୍ଶକମାନେ ମଧ୍ୟ ସେମାନଙ୍କ ଯୋଡିକୁ ବହୁତ ପସନ୍ଦ କରିଥିଲେ। ଏହା ସହିତ ଧର୍ମେନ୍ଦ୍ର ଏବଂ ହେମାମାଳିନୀଙ୍କ ମଧ୍ୟରେ ସମ୍ପର୍କ ଧୀରେ ଧୀରେ ଦୃଢ ହେଲା। ଏହି ସମୟ ମଧ୍ୟରେ ବଲିଉଡ ଅଭିନେତା ଜିତେନ୍ଦ୍ର ମଧ୍ୟ ହେମାଙ୍କୁ ପ୍ରେମ କରି ବସିଥିଲେ। ଉଭୟଙ୍କ ପରିବାର ସାକ୍ଷାତ କରି ଦୁହିଁଙ୍କ ବିବାହ ବିଷୟରେ ଆଲୋଚନା କରିଥିଲେ। କାଳେ ହେମାଙ୍କ ମନ ବଦଳିଯିବ ସେଥିପାଇଁ ଜିତେନ୍ଦ୍ର ତାଙ୍କୁ ଶୀଘ୍ର ବିବାହ କରିବାକୁ ଚାହୁଁଥିଲେ। ଏହି ସମୟରେ ହେମାଙ୍କ ପାଖକୁ ଧର୍ମେନ୍ଦ୍ରଙ୍କ ଫୋନ କଲ୍ ଆସିଲା। ସେ ହେମାଙ୍କୁ ଶୀଘ୍ର କୌଣସି ନିଷ୍ପତ୍ତି ନ ନେବାକୁ ବୁଝାଇଥିଲେ। ଏହା ପରେ ହେମାଙ୍କ ପାଖକୁ ଆଉ ଏକ କଲ୍ ଆସିଲା। ଏଥର ଧର୍ମେ ନୁହେଁ ଫୋନ୍ କରିଥିଲେ ଜୀତେନ୍ଦ୍ରଙ୍କ ଦୀର୍ଘ ଦିନର ଗର୍ଲଫ୍ରେଣ୍ଡ ଏୟାର ହୋଷ୍ଟେସ ଶୋଭା ସିପି। ସେ ମଧ୍ୟ ହେମାଙ୍କୁ ହଠାତ୍ ନିଷ୍ପତ୍ତି ନେବା ଉଚିତ୍ ନୁହେଁ ବୋଲି କହିଥିଲେ। ପରେ ହେମାମାଳିନୀ ପିତାଙ୍କର ହଠାତ୍ ମୃତ୍ୟୁ ଘଟିଥିଲା। ପିତାଙ୍କ ମୃତ୍ୟୁ ପରେ ହେମା ଏକୁଟିଆ ହୋଇଯାଇଥିଲେ। ଏହି ସମୟରେ ଧର୍ମେନ୍ଦ୍ର ତାଙ୍କୁ ସମର୍ଥନ କରିଥିଲେ। ଉଭୟଙ୍କ ମଧ୍ୟ ପ୍ରେମ ସମ୍ପର୍କ ଆରମ୍ଭ ହୋଇଥିଲା। ହେମା ଏବଂ ଧର୍ମେନ୍ଦ୍ର ୧୯୭୯ରେ ବିବାହ କରିଥିଲେ।
