ଢେଙ୍କାନାଳ ଅଫିସ,୬ା୧୦
ଗଁ। ପାଖ ଦେଇ ଜଙ୍ଗଲକୁ ଯିବାବେଳେ ଏକ କଂକ୍ରିଟ୍ ନାଳ ମଧ୍ୟରେ ଖସି ପଡ଼ିଥିଲା ଛୁଆ ହାତୀ। ଦଳରେ ଥିବା ସାଥୀମାନେ ଆଗକୁ ବଢ଼ିଯାଇଥିଲେ ବି ନିଜ ଛୁଆ ପାଇଁ ଅଟକି ଯାଇଥିଲା ମା’। ଅଣଓସାରିଆ ନାଳ ମଧ୍ୟରୁ ତାକୁ କେମିତି ଉଦ୍ଧାର କରିବ ସେ ନେଇ ଆରମ୍ଭ କରିଥିଲା ଉଦ୍ୟମ। ଶେଷରେ ବାଲିବସ୍ତା ପକାଇ ବନ ବିଭାଗ ବଳ ଯୋଗାଇ ଦେବା ପରେ ମୁଣ୍ଡରେ ଠେଲି ଠେଲି ଛୁଆକୁ ଉପରକୁ ଉଠାଇ ଆଣିଥିଲା ମା’ ହାତୀ।
ବିପଦ ମୁହଁରେ ପଡ଼ିଥିବା ନିଜ ଛୁଆକୁ ମା’ ହାତୀ ଏପରି ସାହା ହେବା ଘଟଣା ଦେଖିବାକୁ ମିଳିଛି ଢେଙ୍କାନାଳ ଜିଲାରେ। ସୋମବାର ସକାଳେ ସଦର ରେଞ୍ଜ ଗଦାଶିଳା ସେକ୍ସନ ବ୍ରାହ୍ମଣୀ ନଦୀକୂଳ ଗୁଣୁଦେଇ ଗ୍ରାମଦେଇ ୨୧ଟି ହାତୀ ୫୫ନଂ ଜାତୀୟ ରାଜପଥ ନିକଟସ୍ଥ ଜଙ୍ଗଲ ଆଡକୁ ଯାଉଥିଲେ। ଏହି ସମୟରେ ଗଁା ରାସ୍ତା ପାର୍ଶ୍ୱରେ ଥିବା ଏକ କଂକ୍ରିଟ ନାଳ ଭିତରକୁ ହାତୀ ଛୁଆଟି ଖସିପଡିଥିଲା। ଗଭୀର ହୋଇ ନ ଥିଲେ ବି ଅଣଓସାରିଆ ଥିବାରୁ ହାତୀଟି ସେଥିରୁ ଉଠିପାରି ନ ଥିଲା। ଏହା ଦେଖି ସହାୟତା ପାଇଁ ମା’ ହାତୀ ଆଗେଇ ଆସିଥିଲା। ଅନ୍ୟ ହାତୀମାନେ ଜଙ୍ଗଲକୁ ପଳାଇଯାଇଥିଲେ ମଧ୍ୟ ଛୁଆକୁ ନାଳରୁ ଉଠାଇ ସାଥିରେ ନେବାକୁ ମା’ ଦୀର୍ଘ ସମୟ ଧରି ଉଦ୍ୟମ ଜାରି ରଖିଥିଲା। ଏହା ଦେଖି ସ୍ଥାନୀୟ ଲୋକେ ବନ ବିଭାଗକୁ ଜଣାଇଥିଲେ। ଖବରପାଇ ଗଦାଶିଳା ସେକ୍ସନ ବନ କର୍ମଚାରୀ ଓ ସ୍କ୍ବାଡ୍ ସଦସ୍ୟମାନେ ପହଁଞ୍ଚି ନାଳ ଭିତରେ ବାଲି ବସ୍ତା ପକାଇଥିଲେ। ଏହାପରେ ମା’ ହାତୀଟି ପଛରୁ ଠେଲି ଠେଲି ଛୁଆକୁ ବାଲି ବସ୍ତା ଉପରେ ଚଢାଇ ନାଳରୁ ଉଦ୍ଧାର କରିଥିଲା। ବନ କର୍ମଚାରୀଙ୍କ ଉପସ୍ଥିତିରେ ଉଭୟ ମା’ ଓ ଛୁଆ ହାତୀ ୫୫ନଂ ଜାତୀୟ ରାଜପଥ ପାରହୋଇ ଜୀବନଖୋଲ ଜଙ୍ଗଲ ଆଡକୁ ଚାଲିଯାଇଥିବା ସଦର ରେଞ୍ଜର ଧରିତ୍ରୀ ମୁର୍ମୁ ସୂଚନା ଦେଇଛନ୍ତି।
