କଟକ,୨୧ା୪(ଦିବାକର ସାହୁ)ଦିନକୁ ଦିନ ରାଜ୍ୟରେ ବୃଦ୍ଧି ପାଇବାରେ ଲାଗିଛି ତାପମାତ୍ରା। ପ୍ରଚଣ୍ଡ ଗ୍ରୀଷ୍ମ ପ୍ରବାହ କାରଣରୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ଦିନ ୧୦ଟା ପରେ ଘରୁ ବାହାରକୁ ବାହାରି ପାରୁନାହାନ୍ତି ଲୋକେ। ଗତ କିଛିଦିନ ହେବ କଟକ-ଭୁବନେଶ୍ୱରର ତାପମାତ୍ରା ୪୦ ଡିଗ୍ରୀ ପାର କରୁଛି । ସା ୬ଟା ପର୍ଯ୍ୟନ୍ତ ଖରା ସହ ଗୁଳୁଗୁଳି ହେଉଛି ଫଳରେ ତାତିରେ ଦୈତନଗରୀ ବାସିନ୍ଦା ଅତିଷ୍ଠ ହୋଇପଡ଼ିଲେଣି। ଏହାର ପ୍ରଭାବ ବିଶେଷଭାବେ ବ୍ୟବସାୟ ଉପରେ ମଧ୍ୟ ପଡ଼ୁଛି। ଦିନବେଳା ଲୋକେ ଘରୁ ବାହାରକୁ ବାହାରୁ ନ ଥିବାରୁ ରାସ୍ତାରେ ବ୍ୟବସାୟ କରୁଥିବା ବ୍ୟବସାୟୀଙ୍କ ବେପାର ମାନ୍ଦା ହେଉଛି। ପ୍ରଚଣ୍ଡ ଖରାକୁ ବେପାର ମାନ୍ଦା ଏବେ ବ୍ୟବସାୟୀଙ୍କ ଚିନ୍ତାର କାରଣ ପାଲଟିଛି।
ଆଗରୁ ଯେମିତି ବେପାର ହେଉଥିଲା ଏବେ ସେମିତି ହେଉନି। ପୂର୍ବରୁ ଦିନକୁ ୪ହଜାର ପର୍ଯ୍ୟନ୍ତ ବେପାର ହେଉଥିବାବେଳେ ଏବେ ୩ହଜାର ଛୁଇଁବା ମୁସ୍କିଲ ହୋଇପଡ଼ିଛି। ଖରା କାରଣରୁ ରାତି ୪ଟାରୁ ପ୍ରସ୍ତୁତ ହେଉଥିବା ଦହିବରା ଆଳୁଦମ୍ ଦିନ ୨ଟା ବେଳକୁ ନଷ୍ଟ ହୋଇଯାଉଛି। ଫଳରେ ବହୁତ କ୍ଷତି ସହିବାକୁ ପଡ଼ୁଛି।
ରାହୁଲ ପରିଡ଼ା, ଦହିବରା ବ୍ୟବସାୟୀ
ଖରା କାରଣରୁ ଅଧିକାଂଶ ଲୋକ ଦିନବେଳେ ବାହାରକୁ ବାହାରୁ ନାହାନ୍ତି। ରାସ୍ତା ପାର୍ଶ୍ୱରେ ପରିବା ବ୍ୟବସାୟ କରୁଥିବାରୁ ପୂର୍ବାହ୍ନ ୧୦ଟା ପରେ ବ୍ୟବସାୟ ହୋଇପାରୁ ନାହିଁ। ଅତ୍ୟଧିକ ଖରା କାରଣରୁ ପରିବା ପଚି ଶଢ଼ି ଯାଉଛି। ପରିବା ନଷ୍ଟ ହୋଇଯାଉଥିବାରୁ ଦର ମଧ୍ୟ ବୃଦ୍ଧି ପାଉଛି। ତେଣୁ ଲୋକେ କମ୍ କିଣୁଛନ୍ତି। ତରଭୁଜ ବେପାର ବି ମଧ୍ୟ ସେତେଟା ହେଉନାହିଁ। କହିବାକୁ ଗଲେ ଖରା ଯୋଗୁ ବେପାର ପୂରା ମାନ୍ଦା ହୋଇଯାଇଛି।
ମିଲୁ ମହାନ୍ତି,ପରିବା ବ୍ୟବସାୟୀ
ତ୍ରିଶୂଳିଆ ବ୍ରିଜ୍ ଦେଇ ଦୈନିକ ହଜାର ହଜାର ଲୋକ ଯାତାୟାତ କରନ୍ତି। ହେଲେ ଖରା କାରଣରୁ ଦିନବେଳା ସେତେ ଲୋକ ଯିବା ଆସିବା କରୁନାହାନ୍ତି। ଆଗରୁ ଦିନକୁ ୧୦୦ରୁ ୧୫୦ ପଇଡ଼ ବିକ୍ରି ହେଉଥିବା ବେଳେ ଏବେ ୬୦ଟି ପଇଡ଼ ବି ବିକ୍ରି ହେଉନି। ଲୋକେ ଏବେ ପଇଡ଼ ଅପେକ୍ଷା ଥଣ୍ଡା ପାନୀୟ ଦୋକାନରେ ଭିଡ଼ ଜମାଉଛନ୍ତି। ତେଣୁ ବ୍ୟବସାୟ ପାଖାପାଖି ଅଧା ହୋଇଯାଇଛି।
ପିଣ୍ଟୁ ବାରିକ, ପଇଡ଼ ବ୍ୟବସାୟୀ
