ରିଷିଡା, ୬।୮(ସୁଶାନ୍ତ ମଲ୍ଲିକ): କର୍ଲାମୁଣ୍ଡା ବ୍ଲକର ରିଷିଡା ସ୍ଥିତ ସରକାରୀ ଡାକ୍ତରଖାନାରେ କାର୍ଯ୍ୟରତ ଡାକ୍ତର ଆଜକୁ ପ୍ରାୟ ୨ମାସ ହେଲା ଛୁଟିରେ ରହିଛନ୍ତି । ଫଳରେ ରୋଗୀ ସେବାରେ ଗୁରୁତର ପ୍ରଭାବ ପଡୁଛି । ଡାକ୍ତର ଛୁଟିରେ ଥିବାରୁ ତାଙ୍କ ବଦଳରେ ଆଉ ଜଣେ ଡାକ୍ତରକୁ ସାମୟିକ ଭାବେ ନିୟୋଜିତ କରିବା କଥା । କିନ୍ତୁ ଏ ଦିଗରେ ସ୍ୱାସ୍ଥ୍ୟବିଭାଗ ତତ୍ପରତା ଦେଖାଉନଥିବାରୁ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଉଛି ।
କେବେ କେମତି ଜଣେ ଆୟୁଷ ଡାକ୍ତରକୁ ଏଠାକୁ ପଠାଇ ବିଭାଗ ନିଜ ଦାୟିତ୍ୱ ସାରିଦେଉଥିବା ଦେଖିବାକୁ ମିଳିଛି । ଅଞ୍ଚଳରେ ରିଷିଡା ଏକ ପ୍ରମୁଖ ସ୍ଥାନ ହୋଇଥିବା ବେଳେ ଆଖପାଖ ଅଞ୍ଚଳର ୩୦ହଜାରରୁ ଅଧିକ ରୋଗୀ ଏହି ହସ୍ପିଟାଲ ଉପରେ ନିର୍ଭର କରିଥାନ୍ତି । ଏଠାରେ ମଧ୍ୟ ପ୍ରସୂତୀ କାମ ହୋଇଥାଏ । ଏଠାରେ ସ୍ଥାୟୀ ଭାବେ ଅନ୍ତତଃ ଜଣେ ଏମବିବିଏସ ଡାକ୍ତର ରହିବା କଥା କିନ୍ତୁ କାହିଁକି ଅଣଦେଖା କରାଯାଉଛି । ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଗତ ସୋମବାର ଦିନ ଭବାନୀପାଟଣା ଠାରେ ଅନୁଷ୍ଠିତ ଜିଲାପାଳଙ୍କ ଯୁଗ୍ମଜନଶୁଣାଣୀ ଶିବିରରେ ସ୍ଥାନୀୟ ଯୁବସଂଗଠକ ସଲିମ ଶେଖର ରଣା ଏନେଇ ଲିଖିତ ଅଭିଯୋଗ କରିଥିଲେ । ଜିଲାପାଳଙ୍କ ନିର୍ଦ୍ଦେଶକ୍ରମେ ସିଡିଏମଓ ସାତଦିନ ମଧ୍ୟରେ ଡାକ୍ତର ନିଯୁକ୍ତି ଦିଆଯିବ ବୋଲି ପ୍ରକାଶ କରିଥିଲେ ।
ବର୍ତ୍ତମାନ ସମୟରେ କର୍ଲାମୁଣ୍ଡା ସିଏଚସିରୁ ଜଣେ ଡାକ୍ତରଙ୍କୁ ଏଠାରେ ସାମୟିକ ଭାବେ ନିୟୋଜିତ କରିବା ସହ ଏଠାରେ ଆବଶକୀୟ ଖାଲି ପଦବୀ ପୂରଣ କରିବା ପାଇଁ ଜିଲା ସ୍ୱାସ୍ଥ୍ୟବିଭାଗ ଦୃଷ୍ଟିଦେବାକୁ ଦାବି ହେଉଛି । ନଚେତ ଆଗାମୀ ଦିନରେ ଆନ୍ଦୋଳନ ପଦକ୍ଷେପ ନିଆଯିବ ବୋଲି ଯୁବଗୋଷ୍ଠୀ ଚେତାବନୀ ଦେଇଛନ୍ତି ।
