ଜଗନ୍ନାଥପ୍ରସାଦ,୧୨ା୧୦(ଡି.ଏନ.ଏ.): ଗଞ୍ଜାମ ଜିଲା ଜଗନ୍ନାଥପ୍ରସାଦ ଥାନା ଅନ୍ତର୍ଗତ ସୁଗୁମୁ ଗ୍ରାମର ଜଣେ ଯୁବକଙ୍କୁ ଗତ ୭ ତାରିଖରେ ଘରୁ ଡାକି ନେଇ ହତ୍ୟା କରାଯାଇଛି। ମୃତକ ହେଲେ ମାଧବ ନାଇକ (୧୯)। ୬ ଦିନ ପରେ ମଙ୍ଗଳବାର ପୋଲିସ ସ୍ଥାନୀୟ ମଳିଙ୍ଗି କାଜୁ ଜଙ୍ଗଲରୁ ମାଧବଙ୍କ ଗଳିତ ମୃତଦେହ ମାଟିତଳୁ ଜବତ କରିଛି। ଘଟଣାରେ ସମ୍ପୃକ୍ତ ଥିବା ଜଣେ ଅଭିଯୁକ୍ତଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି। ସ୍ତ୍ରୀଙ୍କ ସହିତ ଅନୈତିକ ସମ୍ପର୍କ ରଖିଥିବା ସନ୍ଦେହ ହେବାରୁ ମାଧବଙ୍କୁ ହତ୍ୟା କରିଛନ୍ତି ବୋଲି ଅଭିଯୁକ୍ତ ସ୍ବୀକାର କରିଛନ୍ତି। ଏ ନେଇ ପୋଲିସ ନଂ. ୩୭୭/୨୧ରେ ମାମଲା ରୁଜୁ କରିଛି।
ସୂଚନାନୁସାରେ, ଅଭିଯୁକ୍ତ ଗତ ୭ ତାରିଖରେ ବୁଲିଯିବାକୁ କହି ମାଧବଙ୍କୁ ଘରୁ ଡାକି ନେଇଥିଲେ। କିନ୍ତୁ ସନ୍ଧ୍ୟା ସୁଦ୍ଧା ମାଧବ ଆଉ ଘରକୁ ଫେରି ନଥିଲେ। ତାଙ୍କ ପରିବାର ଲୋକେ ଅଭିଯୁକ୍ତଙ୍କୁ ପଚାରିବାରୁ ସେ ଜାଣିନଥିବା କହିଥିଲେ। ଚାରିଆଡ଼େ ଖୋଜାଖୋଜି କରି ମାଧବଙ୍କୁ ନ ପାଇବାରୁ ତାଙ୍କ ବାପା ଯୋଗେନ୍ଦ୍ର ସୋମବାର ଜଗନ୍ନାଥପ୍ରସାଦ ଥାନାରେ ଏତଲା ଦେଇଥିଲେ। ପୋଲିସ ସନ୍ଦେହରେ ସମ୍ପୃକ୍ତ ବ୍ୟକ୍ତିଙ୍କୁ ଥାନାରେ ଅଟକ ରଖି ପଚରାଉଚରା କରିବାରୁ ଏକ ଲୁହାଛଡ଼ରେ ଆକ୍ରମଣ କରି ହତ୍ୟା କରିବା ସହ ମାଧବଙ୍କ ମୃତଦେହକୁ ଗ୍ରାମଠାରୁ ପ୍ରାୟ ୧୨ କିଲୋମିଟର ମଲିଙ୍ଗି କାଜୁ ଜଙ୍ଗଲରେ ପୋତି ଦେଇଥିବା କହିଥିଲେ। ମଙ୍ଗଳବାର ସକାଳୁ ସ୍ଥାନୀୟ ତହସିଲଦାର ମନୋଜ କୁମାର ତ୍ରିପାଠୀଙ୍କ ଉପସ୍ଥିତିରେ ପୋଲିସ ମୃତକ ପରିବାର ସହାୟତାରେ କାଜୁ ଜଙ୍ଗଲରୁ ମାଧବଙ୍କ ଗଳିତ ମୃତଦେହକୁ ମାଟି ତଳୁ ଖୋଳି ବାହାର କରିଥିଲା।
