ଇଣ୍ଟରନେଟ୍ ଏବଂ ସୋସିଆଲ ମିଡିଆ ଜରିଆରେ ଅନେକେ ଜିରୋରୁ ହିରୋ ହୋଇ ଚର୍ଚ୍ଚାକୁ ଆସିଥିବା ନଜିର ରହିଛି। ସେମିତି ଜଣେ ଯୁବକ ହେଉଛନ୍ତି ଖବାନେ ଲେମ୍। ଖାସ୍ କଥା ହେଲା ସେ ତାଙ୍କ ଭିଡିଓରେ ଗୋଟିଏ ବି ଶବ୍ଦ କୁହନ୍ତନି। ମାତ୍ର ତାଙ୍କ ଭାବଭଙ୍ଗୀ ଯୋଗୁ ସେ ଲୋକଙ୍କ ହୃଦୟରେ ରାଜ୍ କରୁଛନ୍ତି। ବର୍ତ୍ତମାନ ସୋସିଆଲ ମିଡିଆରେ ସେ ସୁପରଷ୍ଟାର ହୋଇସାରିଛନ୍ତି।
୨୧ ବର୍ଷୀୟ ଲେମ୍ ଗତବର୍ଷ ଏକ କମ୍ପାନୀରେ ଚାକିରି କରୁଥିଲେ। କରୋନା ମହାମାରୀ ଯୋଗୁ ଲକ୍ଷଲକ୍ଷ ଲୋକ ଚାକିରି ହରାଇଥିଲେ। ଲେମ୍ଙ୍କର ମଧ୍ୟ ଚାକିରି ଚାଲିଯାଇଥିଲା। ଏକ ସାକ୍ଷାତକାରରେ ଲେମ୍ କହିଛନ୍ତି, ଯେତେବେଳେ ମୋ ଚାକିରି ଚାଲିଗଲା ମୋତେ ବହୁତ କଷ୍ଟ ଲାଗିଥିଲା। ପରେ ନିଜକୁ ସମ୍ଭାଳି ନେଇଥିଲି। ସେ କହିଛନ୍ତି, ମୋତେ ଯେତେବେଳେ ସମୟ ମିଳିଲା ମୁଁ ଟିକ୍ଟକ୍ରେ ଭିଡିଓ କଲି। ଏଥିରେ ମୋତେ ଫାଇଦା ବି ମିଳିଲା। କିଛିଦିନ ପରେ ମୋ’ ଭିଡିଓ ଖୁବ୍ ଭାଇରାଲ ହେଲା। ଆଜିର ଦିନରେ ଲେମ୍ଙ୍କର ଟିକ୍ଟକରେ ୧୦୦ ମିଲିୟନରୁ ଅଧିକ ଫଲୋଅର୍ସ ରହିଛନ୍ତି। ଲେମ୍ଙ୍କ କିଛି ଫଲୋର୍ସ ତାଙ୍କୁ ମଡର୍ନ ହିରୋ ଏବଂ ଚାର୍ଲି ଚାପଲିନ୍ ମଧ୍ୟ କୁହନ୍ତି। ଚାର୍ଲି ଚାପଲିନ ଫିଲ୍ମ ପରି ଲେମ୍ ତାଙ୍କ ଭିଡିଓରେ କିଛି କୁହନ୍ତି ନାହିଁ, କେବଳ ଭାବଭଙ୍ଗୀ ଦେଖାନ୍ତି।
ଲେମ୍ଙ୍କର ଅଧିକାଂଶ ଫଲୋଅର୍ସ ଦକ୍ଷିଣ ଆମେରିକା ଏବଂ ବ୍ରାଜିଲର ଅଟନ୍ତି। ସୋସିଆଲ ମିଡିଆ ଜରିଆରେ ସେ ଏବେ କୋଟି କୋଟି ଟଙ୍କା ରୋଜଗାର କରୁଛନ୍ତି। ସୋସିଆଲ ମିଡିଆରେ ଲୋକପ୍ରିୟ ହେବା ପରେ ତାଙ୍କୁ ଏବେ ଅନେକ ଅଫିସରୁ ଚାକିରି ପାଇଁ ଅଫର ମଧ୍ୟ ଆସୁଛି। ଲେମ୍ କୁହନ୍ତି, ତାଙ୍କର ଆଉ କୌଣସି ଚାକିରି ଦରକାର ନାହିଁ। ସୋସିଆଲ ମିଡିଆ ଜରିଆରେ ଲୋକଙ୍କ ମନୋରଞ୍ଜନ କରିବା ତାଙ୍କର ମୁଖ୍ୟ କାମ। ଏଥିରୁ ତାଙ୍କୁ ବହୁତ ଆନନ୍ଦ ମିଳୁଛି ବୋଲି କୁହନ୍ତି।
