ଭୁବନେଶ୍ୱର,୨୦।୮(ବ୍ୟୁରୋ): ଜେଇଇରେ ଭଲ କରି ନ ଥିବାରୁ ଗୁରୁବାରଠାରୁ ଘରୁ ପଳାଇ ଆସିଥିଲେ ଝିଅ। ଶୁକ୍ରବାର ଏକ ଫାର୍ମ ହାଉସ୍ ପୋଖରୀରୁ ତାଙ୍କ ମୃତଦେହ ମିଳିଛି। ଏଭଳି ଏକ ସ୍ପର୍ଶକାତର ଘଟଣା ଘଟିଛି ରାଜଧାନୀ ଭୁବନେଶ୍ୱରରେ। ନନ୍ଦନକାନନ ଥାନା ଅଞ୍ଚଳରେ ଥିବା ଉକ୍ତ ଫାର୍ମ ହାଉସ ପୋଖରୀରୁ ମିଳିଥିବା ଏହି ମୃତା ଯୁବତୀଙ୍କ ଘର ନୟାଗଡ଼। ତାଙ୍କ ବାପା ଜଣେ ପ୍ରଫେସର। ଜେଇଇରେ ଭଲ କରି ନ ଥିବାରୁ ସେ ଗୁରୁବାର ଘରୁ ପଳାଇ ଆସିଥିଲେ ବୋଲି କୁହାଯାଉ ଥିବା ବେଳେ ତାଙ୍କ ବାପା କହିଛନ୍ତି, ଝିଅ ବହୁତ ମେଧାବୀ ଥିଲା। ଭଲ ଆର୍ଟ କରୁଥିଲା। ଜେଇଇରେ ତା’ର ଟିକେ ଖରାପ ହୋଇଥିଲା। ପାଠପାଢ଼ା ନେଇ ଘର ତରଫରୁ ତା’ ଉପରେ କୌଣସି ଚାପ ନ ଥିଲା। ଘର ତଥା ପାଖ ଅଞ୍ଚଳର ସିସିଟିଭିରୁ ଜଣାପଡୁଛି ରାତି ୨ଟାରେ ଝିଅ ଫାର୍ମହାଉସ ଭିତରେ ପଶିଛି। ତେବେ ଏତେ ଅନ୍ଧାର ରାତିରେ ୧୦ ଫୁଟ ଉଚ୍ଚ ପାଚେରି ଡେଇଁ ସେ କେମିତି ଭିତରେ ପଶିଲା? ମନକୁ ମନ ସେ ଫାର୍ମ ହାଉସକୁ ଆସିଥିବ ବୋଲି ଭାବିପାରୁନାହିଁ। କୌଣସି ଲୋକ ହୁଏତ ତାକୁ ପ୍ରଲୋଭିତ କରି ଆଣିଥାଇପାରେ। ସେ ଆତ୍ମହତ୍ୟା କରିଥାଇପାରେ। ହେଲେ ପୋଲିସ ତଦନ୍ତ ପରେ ବାକି କାରଣ ଜଣାପଡ଼ିବ ବୋଲି ସେ କହିଛନ୍ତି।
