ନୂଆଦିଲ୍ଲୀ,୮ା୯: କଂଗ୍ରେସ ନେତା ରାହୁଲ ଗାନ୍ଧୀ ବୁଧବାର ତାମିଲନାଡୁର ଶ୍ରୀପେରୁମ୍ବୁଦୁରରେ ‘ଭାରତ ଯୋଡ଼ୋ ଯାତ୍ରା’ ଆରମ୍ଭ କରିଛନ୍ତି। ଏହି ଅବସରରେ ସେ ତାଙ୍କ ସ୍ବର୍ଗତ ପିତା ତଥା ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ସ୍ମୃତିପୀଠରେ ପୁଷ୍ପମାଲ୍ୟ ଅର୍ପଣ କରି ଶ୍ରଦ୍ଧାଞ୍ଜଳି ଦେଇଛନ୍ତି। ଯାତ୍ରା ଆରମ୍ଭରେ ରାହୁଲ କହିଛନ୍ତି, ଘୃଣା ଓ ବିଭାଜନ ଯୋଗୁ ସେ ତାଙ୍କ ବାପାଙ୍କୁ ହରାଇଛନ୍ତି। ଏବେ ଦେଶକୁ ହରାଇବାକୁ ଚାହଁୁ ନାହାନ୍ତି।
୧୯୯୧ ମେ’ ୨୧ରେ ଶ୍ରୀପେରୁମ୍ବୁଦୁରରେ ନିର୍ବାଚନୀ ପ୍ରଚାର ବେଳେ ରାଜୀବ ଗାନ୍ଧୀ ଏକ ଆମତ୍ଘାତୀ ବିସ୍ଫୋରଣରେ ପ୍ରାଣ ହରାଇଥିଲେ।
ଓ୍ବାୟନାଡ୍ ଏମ୍ପି ରାହୁଲ ଗାନ୍ଧୀ ଦଳର ଭାରତ ଯୋଡ଼ୋ ଯାତ୍ରା ଆରମ୍ଭ କରିବା ଅବସରରେ ନିଜ ବାପାଙ୍କୁ ମନେପକାଇଛନ୍ତି। ସେ କହିଛନ୍ତି, ଘୃଣା ଉପରେ ଭଲ ପାଇବାର ବିଜୟ ହେବ। ଆମେ ସମସ୍ତେ ମିଶି ଘୃଣା ଓ ବିଭାଜନକୁ ପ୍ରତିହତ କରିବା। ଦକ୍ଷିଣାଞ୍ଚଳର ଉପକୂଳ ଜିଲା କନ୍ୟାକୁମାରୀରେ ଥିରୁଭଲ୍ଲୁଭର ଓ ସ୍ବାମୀ ବିବେକାନନ୍ଦଙ୍କ ପ୍ରତିମୂର୍ତ୍ତି ଦର୍ଶନ କରିବା ପରେ ସେ ଏହି ଯାତ୍ରା ଆରମ୍ଭ କରିଛନ୍ତି।
୧୫୦ ଦିନ ବ୍ୟାପୀ ଚାଲିବାକୁ ଥିବା ଭାରତ ଯୋଡ଼ୋ ଯାତ୍ରା ୧୨ ରାଜ୍ୟର ୩,୫୦୦ କି.ମି. ଦେଇ ଗତି କରିବ। ତାମିଲନାଡୁ ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ୍ ରାହୁଲଙ୍କୁ ଖଦିରେ ନିର୍ମିତ ଏକ ଜାତୀୟ ପତାକା ଉପହାର ଦେଇଛନ୍ତି। କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଏହାକୁ ଏକ ଐତିହାସିକ ଅଭିଯାନ ବୋଲି ଅଭିହିତ କରିଛନ୍ତି। କନ୍ୟାକୁମାରୀରେ ରାହୁଲ ମା’ ସୋନିଆଙ୍କ ବାର୍ତ୍ତା ପଢ଼ି ଶୁଣାଇଥିଲେ। କନ୍ୟାକୁମାରୀରୁ କଶ୍ମୀର ପର୍ଯ୍ୟନ୍ତ ଚାଲିବାକୁ ଥିବା ଏହି ଯାତ୍ରାରେ ସୋନିଆ ସ୍ବାସ୍ଥ୍ୟଗତ କାରଣରୁ ବ୍ୟକ୍ତିଗତ ଭାବେ ଯୋଗଦେଇ ପାରୁ ନ ଥିବାରୁ ଦୁଃଖିତ। ତେବେ ସେ ବିଚାରଗତ ଓ ଆବେଗିକ ଭାବେ ଏଥିରେ ସାମିଲ ହେବେ। ଏହି ପଦଯାତ୍ରା ଭାରତୀୟ ରାଜନୀତି ପାଇଁ ଏକ ବଡ଼ ପରିବର୍ତ୍ତନ ପାଲଟିବ। ଅନ୍ୟପକ୍ଷେ କଂଗ୍ରେସର ଏହି ଅଭିଯାନକୁ ନେଇ ଏକ ପୋଷ୍ଟର ଉପରେ ବିବାଦ ସୃଷ୍ଟି ହୋଇଛି। ଏଥିରେ ସୋନିଆଙ୍କ ଜ୍ୱାଇଁ ରବର୍ଟ ଭଦ୍ରାଙ୍କ ଫଟୋ ସ୍ଥାନିତ ହୋଇଥିବାରୁ ଭାଜପା ଏହାକୁ ‘ପରିବାର ବଞ୍ଚାଅ ଅଭିଯାନ’ ବୋଲି ସମାଲୋଚନା କରିଛି। ଭାଜପା ନେତା ଶେହଓ୍ବାଜ୍ ପୁନାଓ୍ବାଲା କହିଛନ୍ତି, କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ବ୍ୟବସାୟୀ ସ୍ବାମୀ ରବର୍ଟ ଭଦ୍ରାଙ୍କୁ ମେଗା ରାଲି ପୋଷ୍ଟରରେ ସ୍ଥାନ ଦେବାର ତାତ୍ପର୍ଯ୍ୟ ହେଉଛି ପରିବାରକୁ ଯୋଡ଼ିବା। ଏହା ଭାରତକୁ ଯୋଡ଼ିବା ପାଇଁ ଉଦ୍ଦିଷ୍ଟ ନୁହେଁ।
