ହାଟଡିହୀ/ଛେନାପଦୀ,୨।୫(ନିରାକାର ପରିଡା/ଶୁଭକାନ୍ତ ନାୟକ): କେନ୍ଦୁଝର ଜିଲା ହାଟଡିହୀ ବ୍ଲକ ବିଡ଼ିଓ ରଞ୍ଜନ କୁମାର ପରିଡ଼ାଙ୍କ ଅଫିସରେ ପଶି ଜଣେ ବ୍ୟକ୍ତି ଧମକ ଦେବା ସହ କେନ୍ଦୁଝର ଜିତୁ ମୁଣ୍ଡା ପରି ଆଜି ତତେ କଙ୍କାଳ କରିଦେବି କହିଥିଲେ l ଯାହାକି ଏବେ ଚର୍ଚ୍ଚାର ବିଷୟ ପାଲଟିଛି।
ବିଡିଓ ରଞ୍ଜନ ପରିଡାଙ୍କ ସୂଚନା ଅନୁସାରେ, ବଞ୍ଚୋ ଗ୍ରାମର ସୁଦନ ବରାଳ ହଠାତ ତାଙ୍କ ଅଫିସ ଭିତରକୁ ପଶି ଆସିଥିଲେ । ଧମକ ଦେଇ ଆବାସ ଗୃହ ନିର୍ମାଣ ବାବଦରେ ମିଳୁଥିବା ଏନ୍ଆରଜିଏସ୍ ଟଙ୍କା ଦିଅ ବୋଲି ମାଗିଥିଲେ। ଆଜି ପଇସା ନ ଦେଲେ କେନ୍ଦୁଝର ଜିତୁ ମୁଣ୍ଡା ପରି ଆଜି ଶେଷ କରି କଙ୍କାଳ କରି ଦେବି କହି ତାଙ୍କ ଆଡ଼କୁ ଦୌଡି ଆସିଥିଲେ । ଉପସ୍ଥିତ ଲୋକ ଏବଂ ଅନ୍ୟ କର୍ମଚାରୀ ତାଙ୍କୁ କାବୁ କରିଥିଲେ।
ବ୍ଲକରେ ରେକର୍ଡ ଅନୁଧ୍ୟାନ କରିବା ପରେ ଜଣାପଡିଛି ଯେ ଉକ୍ତ ବ୍ୟକ୍ତି ଆବାସ ଯୋଜନାରେ ଅନ୍ତର୍ଭୁକ୍ତ ହିତାଧିକାରୀ ନୁହନ୍ତି କିମ୍ବା କୌଣସି ଏନ୍ଆର୍ଜିଏସ୍(ମନରେଗା) ଅର୍ଥ ମଧ୍ୟ ତାଙ୍କର ପାଇବାର ନାହିଁ। ଖବର ପାଇ ନନ୍ଦିପଦା ଥାନାଧିକାରୀ ଧର୍ମେନ୍ଦ୍ର ଶାନ୍ତି, ସୁଷମା ସୁନ୍ଦରୀ ସେଠୀ, ବଳିଆ ବାରିକ, ଗୋପାଳ ମିଶ୍ର ଏବଂ ଅନ୍ୟ ପୋଲିସ କର୍ମଚାରୀ ବ୍ଲକ କାର୍ଯ୍ୟାଳୟରେ ପହଞ୍ଚି ସୁଦନଙ୍କୁ ଧରି ଥାନାକୁ ନେଇଥିଲେ। ଏପରି ଘଟଣାକୁ ନେଇ କର୍ମଚାରୀମାନେ ଭୟଭୀତ ହୋଇଥିବା ବେଳେ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ବିଡିଓ ପରିଡା କହିଛନ୍ତି, ପ୍ରଥମ ଥର ପାଇଁ ଅଣ୍ଡରଟେକିଂ ଲେଖି ବ୍ୟକ୍ତି ଜଣଙ୍କୁ ଛାଡି ଦେବା ପାଇଁ ପୋଲିସକୁ କହିଛି। ପୁନର୍ବାର ଏମିତି କଲେ ଥାନାରେ ଲିଖିତ ଅଭିଯୋଗ ହେବ।
ଥାନାଧିକାରୀ ଧର୍ମେନ୍ଦ୍ର ଶାନ୍ତି କହିଛନ୍ତି କୌଣସି ଲିଖିତ ଅଭିଯୋଗ ହୋଇନି। ତେଣୁ ଅଟକ ଥିବା ବ୍ୟକ୍ତିଙ୍କୁ ଛାଡି ଦିଆଯାଇଛି। ଘଟଣା ଉପରେ ନଜର ରଖାଯାଇଛି ।
