ନୂଆଦିଲ୍ଲୀ,୧୫ା୩: ଓଡ଼ିଶାରେ ପ୍ରଧାନମନ୍ତ୍ରୀ ଆବାସ ଯୋଜନା (ପିଏମ୍ଏଓ୍ବାଇ)ରେ କୌଣସି ଅନିୟମିତତା ହୋଇଥିବା ନେଇ କେନ୍ଦ୍ର ସରକାର ଅବଗତ କି। ଏହା ଉପରେ କେନ୍ଦ୍ର କୌଣସି ପ୍ରକାର ତଦନ୍ତ କରାଇଛି କି ବୋଲି ମଙ୍ଗଳବାର ବିଜେଡି ପକ୍ଷରୁ ଲୋକ ସଭାରେ ପ୍ରଶ୍ନ କରାଯାଇଛି। କଟକ ଏମ୍ପି ଭର୍ତ୍ତୃହରି ମହତାବ ଗ୍ରାମାଞ୍ଚଳ ବିକାଶ ମନ୍ତ୍ରଣାଳୟକୁ ଏହି ପ୍ରଶ୍ନ କରିଥିଲେ। ଏହାର ଉତ୍ତରରେ କେନ୍ଦ୍ର ଗ୍ରାମାଞ୍ଚଳ ବିକାଶ ରାଷ୍ଟ୍ରମନ୍ତ୍ରୀ ସାଧ୍ୱୀ ନିରଞ୍ଜନ ଜ୍ୟୋତି କହିଥିଲେ, ୨୦୨୦ ଫେବୃୟାରୀରେ ଓଡ଼ିଶାରେ ପିଏମ୍ଏଓ୍ବାଇରେ ଦୁର୍ନୀତି ହୋଇଥିବା ସମ୍ପର୍କରେ ୯ ଏମ୍ପିଙ୍କ ଏକ ପ୍ରତିନିଧି ଦଳ ଭେଟି ଅନିୟମିତତା ଅଭିଯୋଗ ଆଣିଥିଲେ। ଏହାର ତଦନ୍ତ ପାଇଁ ଏକ କେନ୍ଦ୍ରୀୟ ଟିମ୍ ଗଠନ କରାଯାଇଥିଲା। ଉକ୍ତ ଟିମ୍ ୨୦୨୧ ଫେବୃୟାରୀ ଓଡ଼ିଶା ଯାଇ ୨୦୨୨ ମାର୍ଚ୍ଚରେ ରିପୋର୍ଟ ପ୍ରଦାନ କରିଥିଲା। ନିର୍ମିତ ଆବାସଗୁଡ଼ିକରେ ଏପିଏମ୍ଏଓ୍ବାଇ-ଜି ଲୋଗୋ ନ ଥିବା, ଦୁର୍ବଳ ନିର୍ମାଣ, ଅସମ୍ପୂର୍ଣ୍ଣ ଆବାସଗୁଡ଼ିକୁ ଏମ୍ଆଇଏସ୍ରେ ସମ୍ପୂର୍ଣ୍ଣ ହୋଇଥିବା ଦର୍ଶାଯାଇଥିଲା। ସେହିପରି ଅଯୋଗ୍ୟ ହିତାଧିକାରୀମାନଙ୍କୁ ଆବାସ ଆବଣ୍ଟନ ଭଳି ଅନିୟମିତତା ହୋଇଥିବା ଉକ୍ତ ରିପୋର୍ଟରେ ଉଲ୍ଲେଖ କରାଯାଇଥିଲା। କେନ୍ଦ୍ର ସରକାର ରାଜ୍ୟ ସରକାରଙ୍କୁ ସମ୍ପୃକ୍ତ ଅଧିକାରୀମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇ ଏସମ୍ପର୍କିତ ରିପୋର୍ଟ ଦାଖଲ କରିବାକୁ କହିଥିଲେ। ରାଜ୍ୟ ସରକାର ଦାଖଲ କରିଥିବା ରିପୋର୍ଟକୁ ପୁଙ୍ଖାନୁପୁଙ୍ଖ ଯାଞ୍ଚ କରିବା ପରେ ମନ୍ତ୍ରଣାଳୟ ଅଭିଯୋଗ ଆଣିଥିବା ଏମ୍ପିମାନଙ୍କୁ ୨୦୨୨ ଅକ୍ଟୋବରରେ ଚୂଡ଼ାନ୍ତ ଉତ୍ତର ଦେଇଥିଲା।
