ଚଣ୍ଡିଗଡ଼,୧୨।୧୦ : ମେଡେନ ଫାର୍ମାସ୍ୟୁଟିକାଲ୍ସ ଲିମିଟେଡର କଫ ସିରପ ଉତ୍ପାଦନ ଉପରେ ହରିୟାଣା ସରକାର ରୋକ ଲଗାଇଛନ୍ତି। ଗାମ୍ବିଆରେ ୬୬ ପିଲାଙ୍କ ମୃତ୍ୟୁ ପରେ ବିଶ୍ୱ ସ୍ବାସ୍ଥ୍ୟ ସଂଗଠନ ହରିୟାଣାର ମେଡେନ ଫାର୍ମାସ୍ୟୁଟିକାଲ୍ସର ୩ଟି କଫ ସିରପ ବିରୋଧରେ ଡାକ୍ତରୀ ଆଲର୍ଟ ଜାରି କରିଛି। ସେବେଠାରୁ କମ୍ପାନୀର କଫ ସିରପକୁ ନେଇ ବିବାଦ ଲାଗି ରହିଥିଲା।
ହରିୟାଣା ସ୍ବାସ୍ଥ୍ୟମନ୍ତ୍ରୀ ଅନିଲ ବିଜ କହିଛନ୍ତି ଯେ ରାଜ୍ୟ ସରକାର କମ୍ପାନୀର କଫ ସିରପ ଉତ୍ପାଦନ ଉପରେ ପ୍ରତିବନ୍ଧକ ଲଗାଇଛନ୍ତି। ସେ କହିଛନ୍ତି ଯେ ବିଶ୍ୱସ୍ବାସ୍ଥ୍ୟ ସଂଗଠନ ଦ୍ୱାରା ଚିହ୍ନଟ ହେବା ପରେ ସୋନିପତର ଫାର୍ମାସ୍ୟୁଟିକାଲ କମ୍ପାନୀର ତିନୋଟି କଫ ସିରପ ନମୁନା ପରୀକ୍ଷା ପାଇଁ କୋଲକାତାର ସେଣ୍ଟ୍ରାଲ ଡ୍ରଗ ଲ୍ୟାବକୁ ପଠାଯାଇଥିଲା। ଯାହାର ରିପୋର୍ଟ ଏପର୍ଯ୍ୟନ୍ତ ଆସି ନାହିଁ। ଏହାପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଅନିଲ ବିଜ କହିଛନ୍ତି ଯେ କେନ୍ଦ୍ର ସରକାରଙ୍କ ଅଧିକାରୀମାନେ ସମ୍ପୂର୍ଣ୍ଣ ତଥ୍ୟ ସଂଗ୍ରହ କରୁଛନ୍ତି। ରିପୋର୍ଟ ଆସିବା ପରେ ଯଦି କିଛି ଭୁଲ ଦେଖାଯାଏ ତେବେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ହରିୟାଣାର ଏବଂ କେନ୍ଦ୍ର ସରକାରଙ୍କ ଫାର୍ମାସ୍ୟୁଟିକାଲ ବିଭାଗର ମିଳିତ ଯାଞ୍ଚ ପରେ ପ୍ରାୟ ୧୨ଟି ତ୍ରୁଟି ମିଳିଛି। ଏହାକୁ ଦୃଷ୍ଟିରେ ରଖି ସମସ୍ତ ଉତ୍ପାଦନ ବନ୍ଦ କରିବାକୁ ନିଷ୍ପତ୍ତି ନିଆଯାଇଛି। ଏ ସମ୍ପର୍କରେ ନୋଟିସ ଦିଆଯାଇଛି ବୋଲି ସେ କହିଛନ୍ତି।
ଖବର ଅନୁଯାୟୀ, ହରିୟାଣା ଖାଦ୍ୟ ଏବଂ ଔଷଧ ପ୍ରଶାସନ କମ୍ପାନୀର କଫ ସିରପ ଉତ୍ପାଦନ କାରଖାନାର ତ୍ରୁଟି ଦର୍ଶାଇଛି। ହରିୟାଣାର ଫାର୍ମାସ୍ୟୁଟିକାଲ ଅଧିକାରୀମାନେ ସୋନିପତରେ କମ୍ପାନୀର ଉତ୍ପାଦନ କାରଖାନା ଯାଞ୍ଚ କରିଥିଲେ। ଯାଞ୍ଚ ପରେ ଔଷଧ ଉତ୍ପାଦନର ଉଲ୍ଲଂଘନର ୧୨ ପଏଣ୍ଟ କର୍ତ୍ତୃପକ୍ଷ ତାଲିକାଭୁକ୍ତ କରିଥିଲେ।
ହରିୟାଣା ଡ୍ରଗ କଣ୍ଟ୍ରୋଲର୍ ମେଡେନ ଫାର୍ମାସ୍ୟୁଟିକାଲ୍ସକୁ କାରଣ ଦର୍ଶାଅ ନୋଟିସ ଜାରି କରିଛି ଏବଂ ଏହାର ଉତ୍ପାଦନ ଲାଇସେନ୍ସ କାହିଁକି ବାତିଲ କରାଯିବ ନାହିଁ ବୋଲି ପଚାରିଛନ୍ତି। ଅକ୍ଟୋବର ୧୪ ସୁଦ୍ଧା ମେଡେନ ଫାର୍ମାସ୍ୟୁଟିକାଲ୍ସକୁ ଏହାର ଜବାବ ଦେବାକୁ ପଡିବ ।
ହରିୟାଣାର ଖାଦ୍ୟ ଏବଂ ଔଷଧ ପ୍ରଶାସନ ବିଭାଗ ଅନୁଯାୟୀ, ମେଡେନ ଫାର୍ମାସ୍ୟୁଟିକାଲ୍ସ କମ୍ପାନୀ ଉତ୍ପାଦନ ଏବଂ ପରୀକ୍ଷଣ କ୍ଷେତ୍ରରେ ଉପକରଣର ଲଗ ବୁକ ପ୍ରସ୍ତୁତ କରିବାରେ ବିଫଳ ହୋଇଥିଲା। ଅଧିକାରୀ କହିଛନ୍ତି ଯେ ଔଷଧ ଉତ୍ପାଦନରେ ବ୍ୟବହୃତ ପ୍ରୋପିଲିନ ଗ୍ଲାଇକଲ, ସୋର୍ବିଟୋଲ ସଲ୍ୟୁସନ ଏବଂ ସୋଡିୟମ ମିଥାଇଲପାରାବେନର ବ୍ୟାଚ ସଂଖ୍ୟା ଉଲ୍ଲେଖ କରାଯାଇ ନାହିଁ। ଅନୁସନ୍ଧାନରୁ ଜଣାପଡିଛି ଯେ ମେଡେନ ଫାର୍ମାସ୍ୟୁଟିକାଲ୍ସ ଚାରୋଟି କଫ ସିରପ ପାଇଁ ପ୍ରକ୍ରିୟା ଯାଞ୍ଚ ଏବଂ ଆନାଲିଟିକାଲ ପଦ୍ଧତି ଯାଞ୍ଚ କରିନାହିଁ। ଏପର୍ଯ୍ୟନ୍ତ ଚାରିଟି ରାଜ୍ୟ କହିଛନ୍ତି ଯେ ଫାର୍ମା କମ୍ପାନୀର ଅନେକ ଔଷଧ ଗୁଣାତ୍ମକ ମାନ ସହିତ ମେଳ ଖାଉ ନାହିଁ। ୨୦୧୧ରେ ଭିଏତନାମ ଏହି କମ୍ପାନୀକୁ ନିଷିଦ୍ଧ କରିଥିଲା।
