ଓ୍ବାଶିଂଟନ୍,୧୨ା୬: ହାର୍ଭାର୍ଡ ବିଶ୍ୱବିଦ୍ୟାଳୟରୁ ଉଚ୍ଚଶିକ୍ଷା ଲାଭ କରିଥିବା କୁଖ୍ୟାତ୍ ଗଣିତଜ୍ଞ ଟେଡ୍ କଜିନ୍ସ୍କିଙ୍କ ଶନିବାର ୮୧ ବର୍ଷ ବୟସରେ ମୃତ୍ୟୁ ଘଟିଛି। ଆମେରିକାର ନର୍ଥ କାରୋଲିନା ଜେଲରୁ ତାଙ୍କ ମୃତଦେହ ଉଦ୍ଧାର ହୋଇଛି। ୟୁନାବମ୍ବର ନାମରେ କୁଖ୍ୟାତ୍ ଏହି ସିରିଏଲ୍ କିଲର ୧୯୭୮ରୁ ୧୯୯୫ ମଧ୍ୟରେ ୧୬ ଥର ବିସ୍ଫୋରଣ ଘଟାଇଥିଲେ। ଏଥିରେ ୩ ଜଣଙ୍କ ମୃତ୍ୟୁ ଘଟିଥିବାବେଳେ ୨୩ ଆହତ ହୋଇଥିଲେ। ଦୁଇ ଦଶନ୍ଧି ଧରି ପୋଲିସ ଆଖିରେ ଧୂଳିଦେଇ ଚମ୍ପଟ ମାରିବା ପରେ ୧୯୯୬ ଏପ୍ରିଲରେ ୟୁନାବମ୍ବରଙ୍କୁ ମୋଣ୍ଟାନାସ୍ଥିତ ତାଙ୍କ ନିଃସଙ୍ଗ କ୍ୟାବିନରୁ ଗିରଫ କରାଯାଇଥିଲା। ତାଙ୍କୁ ବିନା ପାରୋଲରେ ୪ ଥର ଆଜୀବନ କାରାଦଣ୍ଡାଦେଶ ହୋଇଥିଲା। ୧୯୪୨ ମେ’ ୨୨ରେ ଶିକାଗୋରେ କଜିନ୍ସ୍କିଙ୍କ ଜନ୍ମ। ୧୯୭୦ ଦଶକ ଶେଷାର୍ଦ୍ଧରୁ ୧୯୮୦ ଦଶକ ମଧ୍ୟରେ କଜିନ୍ସ୍କି ଦେଶବ୍ୟାପୀ ବିସ୍ଫୋରଣ ଅଭିଯାନ ଚଳାଇ ଆତଙ୍କବାଦୀ ସାଜିଥିଲେ। ଫେଡେରାଲ ବ୍ୟୁରୋ ଅଫ୍ ଇନ୍ଭେଷ୍ଟିଗେଶନ୍ (ଏଫ୍ବିଆଇ) ତାଙ୍କୁ ୟୁନିଭର୍ସିଟି ଏବଂ ଏୟାରଲାଇନ୍ ବମ୍ବର ମିଶ୍ରଣରେ ୟୁନାବମ୍ବର ନାମ ଦେଇଥିଲା। ୧୯୯୫ରେ ୟୁନାବମ୍ବର ଓ୍ବାଶିଂଟନ ପୋଷ୍ଟ ଓ ନ୍ୟୁୟର୍କ ଟାଇମ୍ସ ତାଙ୍କର ୩୫,୦୦୦ ଶବ୍ଦ ସମ୍ବଳିତ ମେନିଫେଷ୍ଟୋ ପ୍ରକାଶ କରୁ ବୋଲି ଦାବି କରିଥିଲେ। ସେମାନେ ମନା କଲେ ଏକ ଅଜ୍ଞାତ ସ୍ଥାନରେ ଏକ ବୋମା ବିସ୍ଫୋରଣ କରିବେ ବୋଲି ସେ ଧମକ ଦେଇଥିଲେ। ଫଳରେ ଆମେରିକାର ଆଟର୍ନି ଜେନେରାଲ ଏବଂ ଏଫ୍ବିଆଇ ଡାଇରେକ୍ଟର ମେନିଫେଷ୍ଟୋ ପ୍ରକାଶନ ପାଇଁ ସୁପାରିସ କରିଥିଲେ। ଓ୍ବ୍ାଶିଂଟନ୍ ପୋଷ୍ଟରେ ନ୍ୟୁଜ୍ ସେକ୍ସନ ବ୍ୟତୀତ ୮ ପୃଷ୍ଠା ସମ୍ବଳିତ ଏହାର ଏକ ସପ୍ଲିମେଣ୍ଟ ପ୍ରକାଶ ପାଇଥିଲା। ନ୍ୟୁୟର୍କ ଟାଇମ୍ସ ମଧ୍ୟ ତାଙ୍କ ‘ଇଣ୍ଡଷ୍ଟ୍ରିଆଲ ସୋସାଇଟି ଆଣ୍ଡ ଇଟ୍ସ ଫ୍ୟୁଚର’ ଶୀର୍ଷକ ଇସ୍ତାହାର ପ୍ରକାଶ କରିଥିଲା। ଶିଳ୍ପ-ବୈଷୟିକ ବ୍ୟବସ୍ଥାକୁ ସେ ଏଥିରେ ଘୋର ବିରୋଧ କରିଥିଲେ। ବିଜ୍ଞାନ ଓ କାରିଗରି ପ୍ରତି ୟୁନାବମ୍ବରଙ୍କ ମନରେ ଥିବା ଘୃଣାଭାବ ଯୋଗୁ ସେ ୟୁନିଭର୍ସିଟି, ଏୟାରଲାଇନ୍ସ ଏବଂ ଟେକ୍ନୋଲୋଜି ସହ ଜଡ଼ିତ ଥିବା ବ୍ୟକ୍ତିମାନଙ୍କୁ ଟାର୍ଗେଟ କରୁଥିଲେ। ଜେଲର ହସ୍ପିଟାଲକୁ ସ୍ଥାନାନ୍ତରିତ ହେବା ପୂର୍ବରୁ ୧୯୯୮ ମେ’ରେ ୟୁନାବମ୍ବରଙ୍କୁ କଲୋରାଡୋସ୍ଥିତ ଫ୍ଲୋରେନ୍ସର ଏକ ଫେଡେରାଲ ସୁପରମାକ୍ସ ପ୍ରିଜନରେ ରଖାଯାଇଥିଲା। ସେ ୪ ଥର ଆଜୀବନ ଓ ଅତିରିକ୍ତ ୩୦ ବର୍ଷ ଜେଲଦଣ୍ଡ ଭୋଗୁଥିଲେ।
