ଦୁବାଇ,୨୬।୯: ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି)ର ପରାଜୟ ଧାରାରେ ବ୍ରେକ୍ ଲାଗିଛି। ଚଳିତ ଆଇପିଏଲର ଦ୍ୱିତୀୟ ଫେଜରେ ଲଗାତାର ଦୁଇଟି ପରାଜୟ ପରେ ପ୍ରଥମ ବିଜୟ ହାସଲ କରିଛି ବିରାଟ କୋହଲିଙ୍କ ନେତୃତ୍ୱାଧୀନ ଦଳ। ରବିବାର ଖେଳାଯାଇଥିବା ମ୍ୟାଚ୍ରେ ମୁମ୍ବାଇ ଇଣ୍ଡିଆନ୍ସକୁ ୫୪ ରନ୍ରେ ହରାଇ ଦେଇଛି ବାଙ୍ଗାଲୋର। ଏହି ବିଜୟ ପଛରେ ଅନେକ ହିରୋ ଥିଲେ। ସବୁଠୁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା ହର୍ଶଲ ପଟେଲଙ୍କ ହ୍ୟାଟ୍ରିକ।
ପ୍ରଥମେ ଅଧିନାୟକ ବିରାଟ କୋହଲିଙ୍କ ୫୧ (୩ ଲେଖାଏ ଚୌକା ଓ ଛକା) ଓ ଗ୍ଲେନ ମ୍ୟାକ୍ସଓ୍ବେଲ ୫୬ (୬ ଚୌକା ଓ ୩ ଛକା) ରନର ଅର୍ଦ୍ଧଶତକୀୟ ପାଳି ବଳରେ ଆରସିବି ୬ ଉଇକେଟ ହରାଇ ୧୬୫ ରନ୍ କରିଥିଲା। ଜବାବରେ ମୁମ୍ବାଇକୁ ଧୂଆଁଦାର ଆରମ୍ଭ ଦେଇଥିଲେ ରୋହିତ ଶର୍ମା (୪୩) ଓ କୁଇଣ୍ଟନ ଡି’କକ୍ (୨୪)। ପେସରଙ୍କୁ ବିଶେଷ ଫାଇଦା ନ ମିଳିବାରୁ ଦୁଇ ସ୍ପିନରଙ୍କୁ ଲଗାଇଥିଲେ କୋହଲି। ୟୁଜବେନ୍ଦ୍ର ଚହଲ ୩ ଓ ମ୍ୟାକ୍ସଓ୍ବେଲ ୨ ଉଇକେଟ ନେଇ ବିଗାଡ଼ି ଦେଇଥିଲେ ମୁମ୍ବାଇର ବ୍ୟାଟିଂ ଲାଇନ୍ ଅପ୍। ଶେଷକୁ ହ୍ୟାଟ୍ରିକ ଉଇକେଟ ନେଇ ଆରସିବିର ବିଜୟରେ ମୋହର ଲଗାଇଥିଲେ ହର୍ଶଲ। ଫଳରେ ୧୮.୧ ଓଭରରେ ୧୧୧ ରନ୍ରେ ଅଲଆଉଟ୍ ହୋଇଯାଇଥିଲା ମୁମ୍ବାଇ। ଆଇପିଏଲ ଇତିହାସରେ ପ୍ରଥମ ଥର ପାଇଁ ମୁମ୍ବାଇକୁ ଅଲଆଉଟ୍ କରିଛି ଆରସିବି।
