ରାୟପୁର,୨୭।୧୨ : ଏକ ଛାଡପତ୍ର ମାମଲାର ଶୁଣାଣି ବେଳେ ଛତିିଶଗଡ଼ ହାଇକୋର୍ଟ ଏହାର ଗୁରୁତ୍ୱପୂର୍ଣ୍ଣ ନିଷ୍ପତ୍ତିରେ କହିଛନ୍ତି ଯେ ଯଦି ସ୍ତ୍ରୀ ପାନ ମସାଲା, ଗୁଟଖା ଏବଂ ମଦ୍ୟପାନ କରି ଆମିଷ ଖାଇ ସ୍ବାମୀଙ୍କୁ ହଇରାଣ କରନ୍ତି ତେବେ ଏହା କ୍ରୁରତା ଭାବେ ପରିଗଣିତ ହେବ।
ଜଷ୍ଟିସ ଗୌତମ ଭାଦୁରୀ ଏବଂ ଜଷ୍ଟିସ ରାଧା କିଶନ ଅଗ୍ରୱାଲଙ୍କ ଡବଲ ବେଞ୍ଚ ପରିବାର କୋର୍ଟଙ୍କ ଆଦେଶକୁ ଖାରଜ ସ୍ବାମୀଙ୍କ ଦ୍ୱାରା ଦାଖଲ ହୋଇଥିବା ଛାଡପତ୍ର ଆବେଦନକୁ ଗ୍ରହଣ କରିଛନ୍ତି।
କୋରାବା ଜିଲାର ବାଙ୍କି ମୋଙ୍ଗରାରେ ରହୁଥିବା ଜଣେ ଯୁବକ କାଟଘୋରା ର ଜଣେ ଯୁବତୀଙ୍କୁ ବିବାହ କରିଥିଲେ। ବିବାହର ୭ ଦିନ ପରେ, ୨୬ ମେ ୨୦୧୫ ସକାଳେ ତାଙ୍କ ସ୍ତ୍ରୀ ବିଛଣାରେ ଚେତାଶୂନ୍ୟ ହୋଇ ପଡ଼ିଥିଲେ। ଯେତେବେଳେ ସ୍ବାମୀ ତାଙ୍କୁ ଚିକିତ୍ସା ପାଇଁ ଡାକ୍ତରଙ୍କ ନିକଟକୁ ନେଇଗଲେ, ସେତେବେଳେ ସେ ଜାଣିବାକୁ ପାଇଲେ ଯେ ସେ ମଦ୍ୟପାନ କରିବା ସହିତ ଆମିଷ ଖାଇବା ଏବଂ ଗୁଟଖା ବ୍ୟବହାର କରିବାକୁ ନିଜର ଏକ ଅଭ୍ୟାସରେ ପରିଣତ କରି ଏଥିପ୍ରତି ଆସକ୍ତ ଥିଲେ।
ଯେତେବେଳେ ମହିଳାଙ୍କ ଶାଶୁ ଏବଂ ବନ୍ଧୁମାନେ ଏହା ବିଷୟରେ ଜାଣିଲେ, ସେମାନେ ମଧ୍ୟ ତାଙ୍କୁ ବିଭିନ୍ନ ଉପାୟରେ ବୁଝାଇବାକୁ ଚେଷ୍ଟା କରିଥିଲେ, କିନ୍ତୁ ସେ ରାଜି ହୋଇ ନ ଥିଲେ। ଏହା ପରେ ସେ ଶାଶୁ ଏବଂ ସ୍ବାମୀଙ୍କ ସହ ଖରାପ ବ୍ୟବହାର କରିବା ଆରମ୍ଭ କଲେ।
ସ୍ବାମୀଙ୍କ ସହିତ ଝଗଡା କରି ମହିଳା ଜଣକ ୩୦ ଡିସେମ୍ବର ୨୦୧୫ରେ ନିଜକୁ ଜାଳି ଆତ୍ମହତ୍ୟା କରିବାକୁ ଚେଷ୍ଟା କରିଥିଲେ। ଏଥିପାଇଁ ସେ ଦୁଇଥର ଛାତରୁ ଡେଇଁପଡିଥିଲେ ଏବଂ ପରେ ଦୁଇଥର କୀଟନାଶକ ମଧ୍ୟ ପିଇଥିଲେ। ତଥାପି, ପ୍ରତ୍ୟେକ ଥର ସେ ବଞ୍ଚି ଯାଇଥିଲେ। ଏନେଇ ବିବ୍ରତ ହୋଇ ସ୍ବାମୀ ପରିବାର କୋର୍ଟରେ ଛାଡପତ୍ର ପାଇଁ ଆବେଦନ କରିଥିଲେ ମଧ୍ୟ ଆବେଦନକୁ ପରିବାର କୋର୍ଟ ପ୍ରତ୍ୟାଖ୍ୟାନ କରିଥିଲେ। ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରି ସ୍ବମୀ ହାଇକୋର୍ଟରେ ଆବେଦନ କରିଥିଲେ। ହାଇକୋର୍ଟର ଡବଲ ବେଞ୍ଚ ଫ୍ୟାମିଲି କୋର୍ଟଙ୍କର ଆଦେଶକୁ ଖାରଜ କରି ସ୍ବାମୀଙ୍କ ଛାଡପତ୍ର ଆବେଦନକୁ ଅନୁମତି ଦେଇଛନ୍ତି।
