ଭାରତୀୟ ଦଳର ସବୁଠାରୁ ସଫଳ ଅଧିନାୟକ ଭାବରେ ଜଣାଶୁଣା ମହେନ୍ଦ୍ର ସିଂ ଧୋନୀ ଆଜି ୩୯ ବର୍ଷରେ ପଦାର୍ପଣ କରିଛନ୍ତି। ରାଞ୍ଚି ପରି ଏକ ଛୋଟ ସହରରୁ ଆସି ମାହି ବିଶ୍ୱ କ୍ରିକେଟରେ ରାଜ କରିଛନ୍ତି। ଭାରତୀୟ ରେଳବାଇରେ ଟିକେଟ ସଂଗ୍ରହକାରୀ ଭଳି ସରକାରୀ ଚାକିରି ପାଇବା ସତ୍ତ୍ୱେ ଧୋନୀ ଏଥିରେ ସନ୍ତୁଷ୍ଟ ନ ଥିଲେ। ଚାକିରି ଛାଡିବା ପରେ ତାଙ୍କୁ ପିତାଙ୍କ ଗାଳି ମଧ୍ୟ ସହିବାକୁ ପଡିଲା, କିନ୍ତୁ ଏହାଠାରୁ ବଡ କିଛି ତାଙ୍କ ଭାଗ୍ୟରେ ଲେଖା ହୋଇଥିଲା।
ମହେନ୍ଦ୍ର ସିଂ ଧୋନୀ ଆରମ୍ଭରୁ କ୍ରିକେଟ ପ୍ରତି ଆଗ୍ରହ ପ୍ରକାଶ କରି ନ ଥିଲେ। ସେ ବିଦ୍ୟାଳୟ ସ୍ତରରେ ଫୁଟବଲ ଦଳର ଗୋଲକିପର ଥିଲେ ଏବଂ ଏହି କ୍ଷେତ୍ରରେ ଆଗକୁ ବଢିବାକୁ ଚାହୁଁଥିଲେ। ଧୋନୀ ଷଷ୍ଠ ଶ୍ରେଣୀରେ ପଢୁଥିବାବେଳେ ସ୍କୁଲ କ୍ରିକେଟ ଦଳରେ ହଠାତ୍ ଜଣେ ଉଇକେଟ କିପର ଆବଶ୍ୟକ ପଡିଲା। ସେତେବେଳେ କ୍ରିକେଟ ପ୍ରଶିକ୍ଷକ ତାଙ୍କ ଗୋଲକିପିଂ ଦେଖିଲେ, ଧୋନୀଙ୍କ ଉପରେ ସେ ବହୁତ ପ୍ରଭାବିତ ହୋଇଥିଲେ।ସେ ହିଁ ଉଇକେଟ କିପିଂ ଦାୟିତ୍ୱ ତୁଲାଇ ପାରିବେ ଭାବି ତାଙ୍କୁ ସେହି ଦାୟିତ୍ୱ ଦେଇଥିଲେ। ଆଗ୍ରହ ନ ଥିଲେ ମଧ୍ୟ ଧୋନୀ କିପିଂ ଶିଖି ମ୍ୟାଚ୍ ଖେଲି ସଫଳ ମଧ୍ୟ ହୋଇଥିଲେ। ସେବେଠେୁ ଆରମ୍ଭ ହୋଇଥିଲା ଧୋନୀଙ୍କ କ୍ରିକେଟ ଜୀବନ। ଏହାପରେ କ୍ରିକେଟ ଟ୍ରେନିଂ ପାଇଁ ଅନେକ ସଂଘର୍ଷ କରିଥିଲେ। ବେଳେବେଳେ କ୍ରିକେଟ ଟ୍ରେନିଂ ନେବା ପାଇଁ ଟ୍ରେନ୍ ଟଏଲେଟ୍ ପାଖରେ ବସି ଯିବାକୁ ପଡୁଥିଲା।
୧୮ ବର୍ଷ ହେବା ବେଳକୁ ଧୋନୀ ନିଜ ସହରରେ ବେଶ ପ୍ରସିଦ୍ଧ ହୋଇଥିଲେ। ଅଳ୍ପ ବୟସରେ ସେ ବିହାର ପାଇଁ ରଣଜୀ ଖେଳିବାର ସୁଯୋଗ ମଧ୍ୟ ପାଇଥିଲେ। ତା’ପରେ ସେ ରେଳବାଇ ପକ୍ଷରୁ ଖେଳିଥିଲେ। ରେଳବିଭାଗ ପକ୍ଷରୁ ତାଙ୍କ ଟିଟି ଚାକିରି ମଧ୍ୟ ମିଳିଥିଲା। ସ୍ବଳ୍ପ ମଧ୍ୟବିତ୍ତ ପରିବାରର ପୁଅ ସ୍ଅଳ୍ପ ବୟସରେ ସରକାରୀ ଚାକିରି ପାଇବା ପରିବାର ପାଇଁ ଏକ ବଡ଼ସ୍ବପ୍ନ ପୂରଣ କରିବା ପରି ଥିଲା। ଘରେ ଖୁସିର ଲହରୀ ଖେଳିଗଲା।
ପରିବାରର ଖୁସି ପାଇଁ ଧୋନୀ ମଧ୍ୟ ଏହି ଚାକିରିରେ ଯୋଗ ଦେଇଥିଲେ। କିନ୍ତୁ ସେ ଦୀର୍ଘ ଦିନ ପର୍ଯ୍ୟନ୍ତ ଏହି କାମ କରିପାରି ନ ଥିଲେ। ଶେଷରେ ଦିନେ ସେ ଚାକିରି ଛାଡି ଘରକୁ ଫେରି କ୍ରିକେଟ ପଡ଼ିଆରେ ଅଭ୍ୟାସ ଆରମ୍ଭ କଲେ। ଏହି କାର୍ଯ୍ୟ ପରେ ମାହିଙ୍କୁ ମଧ୍ୟ ପିତାଙ୍କ ଅସନ୍ତୋଷର ସାମ୍ନା କରିବାକୁ ପଡିଥିଲା।
ଦାଦା ଧୋନିଙ୍କ ପ୍ରଦର୍ଶନ ଦ୍ୱାରା ପ୍ରଭାବିତ ହୋଇଥିଲେ
୨୦୦୪ରେ ତତ୍କାଳୀନ ଅଧିନାୟକ ସୌରଭ ଗାଙ୍ଗୁଲି ମହେନ୍ଦ୍ର ସିଂ ଧୋନିଙ୍କୁ ଟିମ ଇଣ୍ଡିଆରେ ପ୍ରଥମ ସୁଯୋଗ ଦେଇଥିଲେ। ୨୦୦୩ରେ ଜିମ୍ବାୱେ ଏବଂ କେନିଆ ଗସ୍ତରେ ଧୋନି ଇଣ୍ଡିଆ ଏ ଦଳରେ ସ୍ଥାନ ପାଇଥିଲେ। ମାହି ଏହି ସୁଯୋଗର ହରାତଛଡା ନ କରି ୭ଟି ମ୍ୟାଚରେ ୩୬୨ ରନ ସଂଗ୍ରହ କରିଥିଲେ। ଏହି ସମୟରେ ସେ ୭ଟି କ୍ୟାଚ ଏବଂ ଚାରିଟି ଷ୍ଟମ୍ପିଂ ମଧ୍ୟ କରିଥିଲେ। ଥରେ ଧୋନୀ ସିନିୟର ଦଳରେ ପାଦ ଦେବା ପରେ ସେ ପଛକୁ ଚାହିଁ ନଥିଲେ।
ପ୍ରଥମ ଚାରିଟି ମ୍ୟାଚରେ ଫ୍ଲପ
ମହେନ୍ଦ୍ର ସିଂ ଧୋନି (ଏମଏସ ଧୋନି) ବାଂଲାଦେଶ ବିପକ୍ଷରେ ଏକଦିବସୀୟ ଡେବ୍ୟୁ କରିଥିଲେ। ସେ ଏହି ପୁରା ସିରିଜରେ ଫ୍ଲପ ହୋଇଥିଲେ। ତିନି ମ୍ୟାଚରେ ମାତ୍ର ୧୯ ରନ ଅର୍ଜନ କରିଥିଲା। ୨୦୦୫ ମସିହା ପ୍ରାରମ୍ଭରେ ପାକିସ୍ତାନ ଦଳ ଭାରତ ଗସ୍ତ କରିଥିଲା। ପ୍ରଥମ ମ୍ୟାଚରେ ସେ ମାତ୍ର ତିନି ରନ ସ୍କୋର କରିବାରେ ସକ୍ଷମ ହୋଇଥିଲେ। ଏହା ପରେ ଧୋନି ବିଶାଖାପାଟନମରେ ତିନି ନମ୍ବରରେ ବ୍ୟାଟିଂ ପାଇଁ ଆସିଥିବା ଧୋନୀ ଏହି ମ୍ୟାଚରେ ୧୨୩ ବଲରେ ୧୪୮ ରନ ସଂଗ୍ରହ କରିଥିଲେ। ମାହି ଏହାପରଠାରୁ ଦଳର ଏକ ଗୁରୁତ୍ୱପୂର୍ଣ୍ଣ ଅଂଶ ହୋଇଥିଲେ।
ମାହି ଆଇସିସି ଟୁର୍ନାମେଣ୍ଟରେ ରାଜ୍ କରିଥିଲେ
ଭାରତୀୟ କ୍ରିକେଟ ଇତିହାସରେ ମହେନ୍ଦ୍ର ସିଂ ଧୋନୀଙ୍କ ନାମରେ ଏମିତି ରେକର୍ଡ ଅଛି ଯାହା ଅନ୍ୟ କୌଣସି ଅଧିନାୟକଙ୍କ ନାମରେ ନାହିଁ। ଧୋନୀ ୩ଟି ଆଇସିସି ଟୁର୍ନାମେଣ୍ଟରେ ଭାରତକୁ ଚାମ୍ପିୟନ କରିଛନ୍ତି। ପ୍ରଥମ ଟି -୨୦ ବିଶ୍ୱକପ, ୨୦୧୧ ମସିହାରେ ଭାରତକୁ ୫୦ ଓଭର ବିଶ୍ୱକପ ଦେଇଥିଲେ ମାହି। ଧୋନୀଙ୍କ ଅଧିନାୟକତ୍ୱରେ ଦୁଇ ବର୍ଷ ପରେ ଭାରତ ଚାମ୍ପିଅନ୍ସ ଟ୍ରଫି ମଧ୍ୟ ଜିତିଥିଲା
