ମ୍ୟାଚ୍‌ ଫିକ୍ସର ଦାଣ୍ଡିଓ୍ବାଲ ଗିରଫ
6:00 amJuly 7, 2020July 7, 2020 / 21

ଚଣ୍ଡିଗଡ଼, ୭ା୭ (ପି.ଟି.)-ପଞ୍ଜାବ ପୋଲିସ ସୋମବାର ମୋହାଲି ଜିଲାରେ ଖେଳାଯାଇଥିବା ଏକ ଟି୨୦ ମାଚ୍‌ ସହିତ ସମ୍ପୃକ୍ତିକୁ ନେଇ ମ୍ୟାଚ ଫିକ୍ସର ବୋଲି କୁହାଯାଉଥିବା ରବିନ୍ଦର ଦାଣ୍ଡିଓ୍ବାଲଙ୍କୁ ଗିରଫ କରିଛି। କିନ୍ତୁ ଅନ୍‌ଲାଇନ୍‌ ଷ୍ଟ୍ରିମ୍‌ରେ ଏହି ମ୍ୟାଚ ଶ୍ରୀଲଙ୍କାରେ ଖେଳାଯାଇଥିବା ଦର୍ଶାଯାଇଥିଲା। ଗତ ମାସରେ ଅନୁଷ୍ଠିତ ଏହି ମ୍ୟାଚ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଦୁର୍ନୀତି ନିବାରଣ ଶାଖା (ଏସିୟୁ), ପୋଲିସ ଓ ଶ୍ରୀଲଙ୍କା କ୍ରିକେଟ (ଏସଏଲସି)ର ଦୃଷ୍ଟି ଆକର୍ଷଣ କରିଥିଲା। ରବିନ୍ଦର ଦାଣ୍ଡିଓ୍ବାଲ୍‌ ଏହି ର଼୍ୟାକେଟର କିଙ୍ଗ୍‌ପିନ୍‌ ବୋଲି କୁହାଯାଉଛି। ତାଙ୍କୁ ପଞ୍ଜାବରୁ ଗିରଫ କରାଯାଇଥିବା ଖରାର୍‌ ପୋଲିସ ଡିଏସ୍‌ପି ପାଲ୍‌ ସିଂ ସୂଚନା ଦେଇଛନ୍ତି। ଲକ୍‌ଡାଉନ୍‌ ସମୟରେ ଖେଳାଯାଇଥିବା ଏହି ଟି୨୦ ମ୍ୟାଚକୁ ନେଇ ପୂର୍ବରୁ ଅନ୍ୟ ଦୁଇ ଜଣ ଗିରଫ ହୋଇ ସାରିଛନ୍ତି। ଗିରଫ ସମୟରେ ଦାଣ୍ଡିଓ୍ବାଲଙ୍କ ନିକଟରୁ କିଛି ଲାପ୍‌ଟପ୍‌, ମୋବାଇଲ ଫୋନ୍‌ ଏବଂ ଡକୁମେଣ୍ଟ ଜବତ ହୋଇଛି। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଦାଣ୍ଡିଓ୍ବାଲ ପ୍ରକୃତରେ ହେଉଛନ୍ତି ରାଜସ୍ଥାନ ବାସିନ୍ଦା। ସେ ଅତୀତରେ ଏହି ଭଳି ଠକାମିି ଟୁର୍ନାମେଣ୍ଟମାନ ଆୟୋଜନ କରିଥିବା ନଜିର ରହିଛି। ଶୁକ୍ରବାର ଏକ ଖବର କାଗଜ ରିପୋର୍ଟରେ ପ୍ରକାଶ ପାଇଥିଲା ଯେ, ମ୍ୟାଚ୍‌ଟି ଜୁନ୍‌ ୨୯ରେ ଚଣ୍ଡିଗଡ଼ଠାରୁ ୧୬ କିଲୋମିଟର ଦୂର ସାଓ୍ବାରା ଗ୍ରାମରେ ଖେଳାଯାଇଥିଲା। କିନ୍ତୁ ଅନ୍‌ଲାଇନ୍‌ ଷ୍ଟ୍ରିମ୍‌ରେ ଏହାକୁ ଶ୍ରୀଲଙ୍କା ଅନ୍ତର୍ଗତ ବାଦୁଲା ସିଟିରେ ଖେଳାଯାଇଥିବା ‘ୟୁଭା ଟି୨୦ ଲିଗ୍‌’ର ଏକ ମ୍ୟାଚ ବୋଲି ଦର୍ଶାଯାଇଥିଲା। ହେଲେ ଏହି ଲିଗ୍‌ ସହ ସେମାନଙ୍କ ସମ୍ପୃକ୍ତି ନ ଥିବା ଉଭୟ ୟୁଭା ପ୍ରୋଭିନ୍ସ କ୍ରିକେଟ ଆସୋସିଏଶନ (ୟୁପିସିଏ) ଏବଂ ଶ୍ରୀଲଙ୍କା କ୍ରିକେଟ ସ୍ପଷ୍ଟ କରିଛନ୍ତି। ପଞ୍ଜାବ ପୋଲିସ୍‌ ପୂର୍ବରୁ କହିଥିଲା ଯେ, ଏହି ଲିଗ୍‌ ସହ କୌଣସି ବେଟିଂ ସିଣ୍ଡିକେଟ ସମ୍ପୃକ୍ତ ଅଛିକି ନା ସେ ନେଇ ତଦନ୍ତ ଚାଲିଛି। ଅନ୍ୟପକ୍ଷରେ ବିସିସିଆଇ କହିଥିଲା, ଘଟଣାଟି ଉପରେ ନଜର ରଖାଯାଇଛି। ଏହା ସହିତ କେଉଁମାନେ ସଂଶ୍ଳିଷ୍ଟ ଅଛନ୍ତି ତାହାର ଖୋଜ ଖବର ନିଆଯାଉଛି। ବିସିସିଆଇର ଦୁର୍ନୀତି ନିବାରଣ ଶାଖା ମଙ୍ଗଳବାର ଚଣ୍ଡିଗଡ ଯିବ ଏବଂ ଦାଣ୍ଡିଓ୍ବାଲଙ୍କ ସମ୍ପର୍କରେ ତଥ୍ୟ ସଂଗ୍ରହ କରିବ ବୋଲି ଏହାର ମୁଖ୍ୟ ଅଜିତଥ ସିଂ କହିଛନ୍ତି।