ଭୁବନେଶ୍ୱର,୪।୧୧ (ବ୍ୟୁରୋ): ଜାତୀୟ ରାଜପଥ ନଂ.୧୬ରୁ ହଂସପାଳ ନିକଟରୁ ବାହାରିଥିବା ପୁରୀ କେନାଲ ବନ୍ଧ ରାସ୍ତାର ଅଣ୍ଡିଲୋ ପର୍ଯ୍ୟନ୍ତ ଟ୍ରାଫିକ ସମସ୍ୟା ଲାଗି ରହିଛି। ସରକାରୀ ରାସ୍ତା ଉପରେ ବହୁ ଦୋକାନ ଗଢ଼ି ଉଠିଥିବାରୁ ଗାଡ଼ି ମୋଟର ଯାତାୟାତରେ ସମସ୍ୟା ଉପୁଜୁଛି। ଫଳରେ ଘଣ୍ଟା ଘଣ୍ଟା ଧରି ଟ୍ରାଫିକ୍ ଜାମ୍ରେ ଲୋକମାନେ ଫସି ରହୁଥିବା ବାରମ୍ବାର ଅଭିଯୋଗ ହେଉଛି। ଏହାକୁ ଦୃଷ୍ଟିରେ ରଖି ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡିଏ) ପକ୍ଷରୁ ଗୁରୁବାର ବେଆଇନ ଉଚ୍ଛେଦ କରାଯାଇଛି।
ସାଧାରଣ ପ୍ରଶାସନ ବିଭାଗର ଅନୁମୋଦନକ୍ରମେ ଗୁରୁବାର ହଂସପାଳ ନିକଟ ପୁରୀ କେନାଲ ବନ୍ଧ ରାସ୍ତାରୁ ପ୍ରାୟ ଅଧା କିଲୋମିଟର ପର୍ଯ୍ୟନ୍ତ ଉଚ୍ଛେଦ କରାଯାଇଛି। ଏଥିରେ ୧୩ଟି ବାଉଁଶ ଓ ପଲିଥିନ ନିର୍ମିତ ଦୋକାନ, ୭ କ୍ୟାବିନ, ୩ ଲୁହା ପାଚେରି ଏବଂ ଗୋଟିଏ ୫୦ ଫୁଟ ଲମ୍ବର ପାଚେରି ଭଙ୍ଗାଯାଇଥିଲା। ଆଇନଶୃଙ୍ଖଳା ରକ୍ଷା ପାଇଁ ଏକ ପ୍ଲାଟୁନ ରିଜର୍ଭ ପୋଲିସ ଫୋର୍ସ ଓ ଗୋଟିଏ ସେକ୍ସନ ମହିଳା ପୋଲିସ ମୁତୟନ କରାଯାଇଥିଲା। ଉଚ୍ଛେଦ ସମୟରେ ବିଡିଏ ଲିଆସନ ଅଫିସର ଶୁଭ୍ରାଂଶୁ ଶେଖର ମହାନ୍ତି, ଜିଏ ସହକାରୀ ନିର୍ଦ୍ଦେଶକ(ଏନ୍ଫୋର୍ସମେଣ୍ଟ) ଅମୀୟ ଦାସ ଓ ପାହାଳ ଥାନା ଆଇଆଇସି ସୁଚିତ୍ରା ପରିଡ଼ା ପ୍ରମୁଖ ଉପସ୍ଥିତ ଥିଲେ।
