ଭଞ୍ଜନଗର, ୫।୧୦ (ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଟାଟା ପାୱାର ଅଧୀକ୍ଷଣ ଯନ୍ତ୍ରୀଙ୍କ ଅଧୀନରେ କାର୍ଯ୍ୟରତ ଠିକା ବିଦ୍ୟୁତ କର୍ମଚାରୀଙ୍କ ଛଟେଇ ଆଶଙ୍କା ଏବଂ କଣ୍ଟ୍ରୋଲ୍ ରୁମ୍ରେ କର୍ମଚାରୀ ସଂଖ୍ୟା ହ୍ରାସକୁ ବିରୋଧ କରି ଓଡ଼ିଶା ବିଦ୍ୟୁତ କର୍ମଚାରୀ ମହାସଂଘ (ଓବିକେଏମ୍) ପକ୍ଷରୁ ସୋମବାର ଧାରଣା ଦିଆଯାଇଛି। ଭଞ୍ଜନଗର ସର୍କଲ ଅନ୍ତର୍ଗତ ବୌଦ୍ଧ, ଫୁଲବାଣୀ ଓ ଭଞ୍ଜନଗର ଡିଭିଜନର କର୍ମଚାରୀମାନେ ସମ୍ପୃକ୍ତ କାର୍ଯ୍ୟାଳୟରେ ଧାରଣାରେ ବସିଥିଲେ।
କର୍ମଚାରୀଙ୍କ ସମସ୍ୟାର ସମାଧାନ ନ ହେଲେ ଆଗାମୀ ଦିନରେ ଆନ୍ଦୋଳନକୁ ଅଧିକ ତୀବ୍ର କରାଯିବ ବୋଲି ସଂଘ ପକ୍ଷରୁ ଚେତାବନୀ ଦିଆଯାଇଛି। ଆବଶ୍ୟକ ପଡ଼ିଲେ କାର୍ଯ୍ୟବନ୍ଦ ଆନ୍ଦୋଳନ କରାଯିବ ବୋଲି ମଧ୍ୟ ଆଜିର ବୈଠକରେ ସଂଘ ପକ୍ଷରୁ ନିଷ୍ପତ୍ତି ନିଆଯାଇଛି।
ସୂଚନା ଅନୁଯାୟୀ, ଭଞ୍ଜନଗର ସର୍କଲର ଉକ୍ତ ତିନୋଟି ଡିଭିଜନରେ ୨ ହଜାରରୁ ଊର୍ଦ୍ଧ୍ୱ କର୍ମଚାରୀ କଣ୍ଟ୍ରୋଲ୍ ରୁମ୍ ଓ କ୍ଷେତ୍ରସ୍ତରରେ ବିଦ୍ୟୁତ ସେବା ସହ ଜଡ଼ିତ ବିଭିନ୍ନ କାର୍ଯ୍ୟ କରୁଛନ୍ତି। ପୂର୍ବରୁ ଜିଭିଇ (GVE) ଏଜେନ୍ସି ମାଧ୍ୟମରେ ଏହି କାର୍ଯ୍ୟ ପରିଚାଳିତ ହେଉଥିବା ବେଳେ ଚଳିତ ଅକ୍ଟୋବର ମାସରୁ ସ୍ୱିଚ୍ ଲୋଡ୍ (Switch Load) ଏଜେନ୍ସି ଦାୟିତ୍ୱ ଗ୍ରହଣ କରିଛି।
ସଂଘ ପକ୍ଷରୁ ଅଭିଯୋଗ ହୋଇଛି ଯେ, ନୂତନ ଏଜେନ୍ସି ପକ୍ଷରୁ ପ୍ରତ୍ୟେକ ସବ୍ଡିଭିଜନରୁ ୧୦ ଜଣ ଲେଖାଏଁ କର୍ମଚାରୀଙ୍କୁ ଛଟେଇ କରାଯିବାକୁ ଯୋଜନା ହୋଇଛି। ଏହାଦ୍ୱାରା ବହୁ କର୍ମଚାରୀ ଚାକିରି ହରାଇବା ଆଶଙ୍କାରେ ରହିଛନ୍ତି।
ଅନ୍ୟପକ୍ଷରେ, ପୂର୍ବରୁ କଣ୍ଟ୍ରୋଲ୍ ରୁମ୍ରେ ୭ ଜଣ କର୍ମଚାରୀ କାର୍ଯ୍ୟ କରୁଥିବା ବେଳେ ଏବେ ୪ ଜଣଙ୍କୁ ରଖାଯାଇ ଅନ୍ୟ ୩ ଜଣଙ୍କୁ ଛଟେଇ କରାଯିବା ନେଇ ଚର୍ଚ୍ଚା ହେଉଥିବା ସଂଘ ପକ୍ଷରୁ କୁହାଯାଇଛି। କଣ୍ଟ୍ରୋଲ୍ ରୁମ୍ରେ ଆବଶ୍ୟକ ସଂଖ୍ୟକ କର୍ମଚାରୀ ନିୟୋଜିତ ନ ହେଲେ ବିଦ୍ୟୁତ ସେବା ପରିଚାଳନା ଓ କର୍ମଚାରୀଙ୍କ ସୁରକ୍ଷା ପ୍ରଭାବିତ ହେବାର ଆଶଙ୍କା ରହିଛି ବୋଲି ସଂଘ ପକ୍ଷରୁ ଉଦ୍ବେଗ ପ୍ରକାଶ କରାଯାଇଛି। ତେବେ ଏ ସମ୍ପର୍କିତ ନିୟମ ଉଲ୍ଲଂଘନ ଅଭିଯୋଗର ସ୍ୱତନ୍ତ୍ର ଯାଞ୍ଚ ଆବଶ୍ୟକ ବୋଲି ସଂଘ ମତ ଦେଇଛି।
ସଂଘର ଅଭିଯୋଗ ଅନୁସାରେ, ଟାଟା ପାୱାର ପରିଚାଳନା ପକ୍ଷରୁ ଉଚ୍ଚପଦସ୍ଥ ଅଧିକାରୀଙ୍କୁ ବାର୍ଷିକ ୨୦ରୁ ୩୦ ଲକ୍ଷ ଟଙ୍କା ପର୍ଯ୍ୟନ୍ତ ଦରମା ଦିଆଯାଉଥିବା ବେଳେ ତୃଣମୂଳସ୍ତରର କର୍ମଚାରୀମାନେ ମାସିକ ମାତ୍ର ୧୨ରୁ ୧୫ ହଜାର ଟଙ୍କା ଦରମାରେ କାର୍ଯ୍ୟ କରୁଛନ୍ତି। ଦିନରାତି ପରିଶ୍ରମ କରି ବିଦ୍ୟୁତ ସେବା ସ୍ୱାଭାବିକ ରଖୁଥିବା କର୍ମଚାରୀଙ୍କ ସମସ୍ୟା ପ୍ରତି ଉଚ୍ଚ କର୍ତ୍ତୃପକ୍ଷ ଗୁରୁତ୍ୱ ଦେଉନଥିବା ସଂଘ ଅଭିଯୋଗ କରିଛି।
କର୍ମଚାରୀଙ୍କ ଦାବି ପୂରଣ, ପ୍ରସ୍ତାବିତ ଛଟେଇ ବନ୍ଦ, କଣ୍ଟ୍ରୋଲ୍ ରୁମ୍ରେ ଆବଶ୍ୟକ ସଂଖ୍ୟକ କର୍ମଚାରୀ ନିଯୁକ୍ତି, ଉପଯୁକ୍ତ ଦରମା ଓ କାର୍ଯ୍ୟସୁରକ୍ଷା ପ୍ରଦାନ ଆଦି ଦାବି ନେଇ ଏହି ଧାରଣା ଦିଆଯାଇଛି। ଦାବିଗୁଡ଼ିକର ସମାଧାନ ନ ହେଲେ ଆଗାମୀ ଦିନରେ କାର୍ଯ୍ୟବନ୍ଦ ଆନ୍ଦୋଳନ କରାଯିବ ବୋଲି ସଂଘ ପକ୍ଷରୁ କୁହାଯାଇଛି।
ଏହି ଆନ୍ଦୋଳନରେ ଓଡ଼ିଶା ବିଦ୍ୟୁତ କର୍ମଚାରୀ ମହାସଂଘର ହରପ୍ରସାଦ ବିଷୋୟୀ, ମୁନା ପାତ୍ର, ରବିନାରାୟଣ ପଟ୍ଟନାୟକ, ମିଟୁ ମହାରଣା ଓ ଋଷି ପାତ୍ରଙ୍କ ସମେତ ଅନ୍ୟ କର୍ମଚାରୀମାନେ ସାମିଲ ହୋଇଥିଲେ। କର୍ମଚାରୀଙ୍କ ଦାବି ପ୍ରତି ଟାଟା ପାୱାର କର୍ତ୍ତୃପକ୍ଷ ତୁରନ୍ତ ଦୃଷ୍ଟି ଦେଇ ଆଲୋଚନା ମାଧ୍ୟମରେ ସମାଧାନର ପଥ ବାହାର କରିବାକୁ ସଂଘ ପକ୍ଷରୁ ଦାବି କରାଯାଇଛି।